ឈ្មោះ,ឋានៈ និងកិត្តិយស លោកចោលអស់ក្នុងបន្ទប់ខារ៉ាអូខេតែ១យប់…!
- កំពង់ចាម
ខេត្តកំពង់ចាម ៖ ការភ្ញាក់ផ្អើលមួយបានកើតឡើង នៅវេលាម៉ោងជាង៨យប់ថ្ងៃទី៥ មករា នៅហាងខារ៉ា អូខេយីហោ «វីឡា» ស្ថិតនៅក្នុងសង្កាត់វាលវង់ ក្រុងកំពង់ចាម…
ខេត្តកំពង់ចាម ៖ ការភ្ញាក់ផ្អើលមួយបានកើតឡើង នៅវេលាម៉ោងជាង៨យប់ថ្ងៃទី៥ មករា នៅហាងខារ៉ា អូខេយីហោ «វីឡា» ស្ថិតនៅក្នុងសង្កាត់វាលវង់ ក្រុងកំពង់ចាម ដោយសារតែឧកញ៉ាម្នាក់ឈ្មោះ វ៉ន ប៊ុនថៃ ហៅឧកញ៉ាថៃ អតីតឈ្មួញរកស៊ីឈើដ៏ល្បីល្បាញនៅក្នុងស្រុកអូររាំងឪបានប្រើអំពើហិង្សាលើស្ត្រីបម្រើខារ៉ាអូខេ ក្នុងបន្ទប់លេខ៦៦៦៦ យ៉ាងអមនុស្សធម៌គួរឱ្យថ្កោលទោស ហើយត្រូវបានកម្លាំងអាវុធហត្ថនិងនគរបាល បានចុះមកអន្តរាគមន៍នាំខ្លួនមកសួរនាំ នៅស្នងការដ្ឋាននគរបាលខេត្តទាំងយប់ ក្នុងអាការៈស្រវឹងលិចថ្លើម ដោយត្រូវសមត្ថកិច្ចក្រៀកឱបពីក្រោយចាប់បណ្តើរ ។
តាមមន្ត្រីអាវុធហត្ថក្រុងកំពង់ចាមមួយរូប សូមមិនបញ្ចេញឈ្មោះប្រាប់ឲ្យដឹងថា ក្រោយពីមានហេតុការណ៍កើតឡើងនៅក្នុងបន្ទប់ហាងខារ៉ាអូខេខាងលើ លោកមេបញ្ជាការអាវុធហត្ថបានបញ្ជាឲ្យចុះទៅពិនិត្យមើល ក្នុងពេលដែលបានចុះទៅដល់នោះ បានឃើញឧកញ៉ាថៃកំពុងតែស្ថិតនៅក្នុងបន្ទប់កើតហេតុ ហើយក៏ត្រូវបានកម្លាំងនគរបាល ការិយាល័យព្រហ្មទណ្ឌកម្រិតស្រាលខេត្ត បានចុះមកនាំខ្លួនក្រៀកឱបពីក្រោយនាំដាក់តាមរថយន្តបញ្ជូនមកកាន់ស្នងការដ្ឋាន នគរបាលខេត្តដើម្បីសួរនាំ ។
មន្ត្រីកងរាជអាវុធរូបនោះបានប្រាប់បន្តថា ហេតុការណ៍ខាងលើបានបង្កឲ្យមានការភ្ញាក់ផ្អើលពេញហាងខារ៉ាអូខេតែម្តងគឺជ្រួល ។ ជាមួយនោះ ក៏មានក្រុមអ្នកសារព័ត៌មានច្រើននាក់ បានមកតាមប្រមាញ់រូបភាពជាក់ស្តែងរបស់លោកឧកញ៉ាស្រវឹងធ្លាក់ភ្នែកខាងលើផងដែរ ។ ម្ចាស់ហាងខារ៉ាអូខេបាននិយាយថា ចាប់ តាំងពីបើកហាងមកពុំធ្លាប់មានហេតុការណ៍ភ្ញាក់ផ្អើលបែបនេះទេ មិនដែលមានអ្នកថ្លើមធំមកអុកឡុកទេ គឺទើបកើតឡើងម្តងនេះ ដោយឧកញ៉ាថៃ បានបង្កហិង្សាលើអ្នកបម្រើជានារីភេទនៅក្នុងខារ៉ាអូខេ ហើយរហូតមកដល់ថ្ងៃទី៦ មករា ២០១៩ តាមដំណឹងឧកញ៉ារូបនោះ មិនត្រូវបានដោះលែងឱ្យមានសេរីភាពនៅឡើយទេ ដោយកម្លាំងនគរបាលឃុំខ្លួនទុកម្តុំនៅស្នងការដ្ឋាននគរបាលខេត្ត ។
នារីឈ្មោះ ចាន់ ហួយ បានបំភ្លឺថា យប់ថ្ងៃកើតហេតុទី៥ មករា ២០១៩ ឧកញ៉ាម្នាក់នេះ បានចូលមកផឹកស៊ីក្លែមខារ៉ាអូខេយ៉ាងសប្បាយជាមួយអ្នកហែហមជាច្រើននាក់ ។ បន្ទាប់មក ដោយសារឧកញ៉ារូបនេះលូកលាន់ស្ទាបអង្អែលមកលើនារីបម្រើ ដោយប្រើដៃរវាមដូចដៃម៉ឹក ។ នាងថា ដោយសារនាងចេះតែរើបម្រះ ដៃម៉ឹករបស់គាត់ បានចាប់ទាញផ្តាច់ឡេវអាវ ធ្វើឱ្យនាងបានរត់ចុះទៅជាន់ក្រោមបាត់ ។ ចំណែករូបនាងវិញដែលនៅទីនោះដែរ ដោយសារឧកញ៉ារូបនេះខឹង ក៏បានចាប់ខោកក្បាល និងបោចសក់នាង អូសបញ្ច្រាស បណ្តាលឲ្យមានការឈឺចាប់រហូតដល់នាងស្រែកយំ ។
ថៅកែហាងខារ៉ាអូខេវីឡា នៅព្រឹកថ្ងៃទី៦ មករា ២០១៩ មិនអាចទាក់ទងសុំការបំភ្លឺបានទេ ដោយទូរស័ព្ទបានចុចចូលជាច្រើនលើក តែមិនមានអ្នកណាលើកទទួលនោះទេ ។ លោកហួត វុទ្ធី ព្រះរាជអាជ្ញាអមសាលាដំបូងខេត្ត មានប្រសាសន៍ឲ្យដឹងនៅព្រឹកថ្ងៃទី៦ មករាថា ករណីខាងលើនេះ រូបលោកកំពុងតែឲ្យកម្លាំងនគរបាលខេត្ត ចាត់ការតាមនីតិវិធីច្បាប់បញ្ជូនមកឲ្យរូបលោក ដើម្បីចាត់វិធានការតាមច្បាប់ ។
ឧកញ៉ាថៃជាឈ្មួញឈើដ៏ល្បីល្បាញម្នាក់ មានទីលំនៅស្រុកអូររាំងឪ ។ ក្នុងករណីមួយនេះ ចាំមើលតើឈានទៅដល់កម្រិតណាទៀត ។
បានកត់សម្គាល់ឃើញថា នៅស្នងការដ្ឋាននគរបាលខេត្ត កន្លងមកមិនដែលចិត្តអាក្រក់ដាក់អ្នកកាសែតទេ ។ ប៉ុន្តែប្លែកណាស់ម្ចាស់ថ្លៃ… ពេលនាំខ្លួនឧកញ៉ាឈ្មួញឈើឈ្មោះថៃ ចូលស្នងការដ្ឋាន ស្រាប់តែលោកប៉ូលិសឃីសយាម នៅច្រកទ្វារចូលលែងស្គាល់គ្នាឯងអ្នកកាសែតតែម្តង…លែងល្អជាមួយគ្នាឯង…ទំនងដូចជួយការពារលាក់បាំងឱ្យឧកញ៉ាថៃទេដឹង ? យ៉ាងណាក៏ដោយ បើមានព័ត៌មានប្លែកបែបណា យើងនឹងផ្សាយជូនបន្តទៀត ។
ចែករំលែកព័តមាននេះ