រាជធានីភ្នំពេញ ៖ ជនសង្ស័យចំនួន៤នាក់បានធ្វើសកម្មភាពស្ទាក់វាយប្លន់ស្ត្រីជាអាជីវករលក់ផ្លែឈើនៅក្នុងផ្សារជម្ពូវ័នម្នាក់ យកបានម៉ូតូ១គ្រឿង និងទូរស័ព្ទដៃចំនួន២គ្រឿងបានសម្រេច បន្ទាប់មកក្រុមជនសង្ស័យនាំគ្នាជិះម៉ូតូគេចខ្លួនទៅបាត់ស្រមោល ដោយនឹកស្មានថាបានរួចខ្លួនមិនមាននរណាដឹងនោះទេ ។ ទីបំផុតក្រោយពីជនសង្ស័យរត់គេចខ្លួនបាត់រយៈពេលជាង២០ថ្ងៃប៉ុណ្ណោះ ក៏ត្រូវបានកម្លាំង នគរបាលផ្នែកព្រហ្មទណ្ឌខណ្ឌពោធិ៍សែនជ័យធ្វើការស្រាវជ្រាវ និងឈានដល់ការចាប់ឃាត់ខ្លួនបានជនសង្ស័យទាំង៤នាក់នេះតែម្ដង។
ការចាប់ឃាត់ខ្លួនជនសង្ស័យទាំង៤នាក់ខាងលើនោះបានធ្វើឡើងកាលពីវេលាម៉ោង៣និង៣០នាទី រសៀលថ្ងៃទី៦ ខែមករា ឆ្នាំ២០១៩ នៅក្នុងភូមិទួលសំបូរ សង្កាត់ព្រៃវែង ខណ្ឌដង្កោ រាជធានីភ្នំពេញ។
នគរបាលបានឲ្យដឹងថា ជនសង្ស័យទាំង៤នាក់ខាងលើដែលត្រូវសមត្ថកិច្ចចាប់ឃាត់ខ្លួនរួមមាន ១-ឈ្មោះ សំណាង វិសាល ភេទប្រុស អាយុ១៨ឆ្នាំ ស្នាក់នៅក្នុងភូមិទួលពង្រ សង្កាត់ចោមចៅ១ ខណ្ឌពោធិ៍សែនជ័យ ២-ឈ្មោះ គុណ រិទ្ធី ភេទប្រុស អាយុ២០ឆ្នាំ មុខរបរកម្មករស្នាក់នៅបន្ទប់ជួលក្នុងសង្កាត់អូរ បែកក្អម ខណ្ឌសែនសុខ រាជធានីភ្នំពេញ ៣-ឈ្មោះ សុខ ធារ័ត្ន ភេទប្រុស អាយុ១៨ឆ្នាំ ស្នាក់នៅក្នុងភូមិតាឡី សង្កាត់ដង្កោ ខណ្ឌដង្កោ និង៤-ឈ្មោះ ទុំ សីហា ភេទប្រុស អាយុ១៩ឆ្នាំ ស្នាក់នៅក្នុងភូមិទួល សំបូរ សង្កាត់ដង្កោ ខណ្ឌដង្កោ រាជធានីភ្នំពេញ។
ចំណែកជនរងគ្រោះឈ្មោះវន គឹមហៀង ភេទស្រី អាយុ៤៦ឆ្នាំ មុខរបរលក់ផ្លែឈើនៅក្នុងផ្សារជម្ពូវ័ន និងមានទីលំនៅក្នុងភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ។
ប្រភពដដែលបានបន្តឲ្យដឹងទៀតថា អំពើប្លន់ខាងលើនោះបានកើតឡើងកាលពីវេលាម៉ោង៤និង៣០នាទីទៀបភ្លឺថ្ងៃទី១៣ ខែធ្នូ ឆ្នាំ២០១៨ នៅចំណុចជិតផ្លូវរថភ្លើង ស្ថិតនៅក្នុងភូមិត្រពាំងក្រសាំង សង្កាត់ត្រពាំងក្រសាំ ខណ្ឌ ពោធិ៍សែនជ័យ រាជធានីភ្នំពេញ។
នៅមុនពេលកើតហេតុ ស្ត្រីរងគ្រោះបានជិះម៉ូតូ១គ្រឿងខាងលើតែម្នាក់ឯងចេញពីផ្ទះក្នុងបំណងទៅលក់ផ្លែឈើនៅក្នុងផ្សារជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ លុះពេលទៅដល់ត្រង់ចំណុចកើតហេតុជិតផ្លូវរថភ្លើង ក៏បានជួបក្រុមជនសង្ស័យទាំង៤នាក់នោះជិះម៉ូតូ២គ្រឿង ។
ភ្លាមៗនោះជនសង្ស័យបានធ្វើសកម្មភាពស្ទាក់វាយប្លន់ស្ត្រីរងគ្រោះខាងលើយកម៉ូតូមួយគ្រឿងម៉ាកហុងដាឌ្រីម ធុនសេ១២៥ ស៊េរីឆ្នាំ២០១៧ ពណ៌ខ្មៅ ពាក់ស្លាកលេខ ភ្នំពេញ ១GP-៨៤៩៧ និងទូរស័ព្ទដៃម៉ាក iphone 6 plus និងទូរស័ព្ទម៉ាកណូគា១គ្រឿង បានសម្រេច បន្ទាប់មកក្រុមជនសង្ស័យទាំង៤នាក់បានជិះម៉ូតូរត់គេចខ្លួនបាត់ស្រមោលតែម្ដង។
ប្រភពដដែលបានបន្តថា ក្រោយពេលកើតហេតុ ស្ត្រីរងគ្រោះបានដាក់ពាក្យប្ដឹងដើម្បីឲ្យនគរបាលផ្នែកព្រហ្មទណ្ឌខណ្ឌពោធិ៍សែនជ័យ ជួយអន្តរាគមន៍ស្វែងរកក្រុមជនសង្ស័យ ហើយនគរបាលក៏បានធ្វើការស្រាវជ្រាវអស់រយៈពេលជាង២០ថ្ងៃប៉ុណ្ណោះ ទីបំផុតនគរបាលបានកំណត់បានមុខសញ្ញាក្រុមជនសង្ស័យខាងលើ រហូតដល់ថ្ងៃទី៦ ខែមករា ឆ្នាំ២០១៩ ទើបឈានដល់ការឃាត់ខ្លួនជនសង្ស័យទាំង៤នាក់នេះបានតែម្តង និងនាំយកទៅធ្វើការសាកសួរ និងកសាងសំណុំរឿងបញ្ជូនទៅកាន់សាលាដំបូង រាជធានីភ្នំពេញចាត់ការតាមច្បាប់៕
ចែករំលែកព័តមាននេះ