ខេត្តបន្ទាយមានជ័យ ៖ ច្រករបៀង៣កន្លែងដែលប្រជាពលរដ្ឋចេញចូលទិញទំនិញទៅផ្សាណាត់ថៃ ជាប់ជាយដែន ក្នុង១ថ្ងៃរាប់រយនាក់ ស្ថិតក្នុងស្រុកអូរជ្រៅ ខេត្តបន្ទាយមានជ័យឈមភាគីថៃផ្សារគោកស៊ូង ស្ថិតឃុំតាប្រាយ៉ាខេត្តស្រះកែវ ។
ជាក់ស្តែងកាលពីថ្ងៃទី៤ ខែមករា ឆ្នាំ២០១៩ ឃើញប្រជាពលរដ្ឋខ្មែរចូលទៅប្រទេសថៃ១ថ្ងៃរាប់រយនាក់ មាន១-ច្រករបៀង (អូរបីជាន់) គ្រប់គ្រងដោយលោកអនុសេនីយ៍ឯក មាន សាលួន ជាកម្លាំងយោធាយោធភូមិភាគទី៥ ស្ថិតភូមិ-ឃុំអូរបីជាន់ ស្រុកអូរជ្រៅ ២- ច្រករបៀង(ជោគជ័យ រឺណងចាន់) គ្រប់គ្រងដោយលោកវរសេនីយ៍ទោ អ៊ុន ចាន់ មេបញ្ជាការរងការពារព្រំដែនគោគលេខ៥០៣ ស្ថិតភូមិជោគជ័យ ឃុំអូរបីជាន់ ស្រុកអូរជ្រៅ ៣- ច្រករបៀងតំបន់ប្រាំគ្រប់គ្រងដោយលោកវរសេនីយ៍ត្រី អ៊ិន ថុល មេបញ្ជាការល្បាតចំណុះបញ្ជាការរងការពារព្រំដែនគោគលេខ៥០៣ ស្ថិតភូមិព្រៃចាន់ឃុំអូរបីជាន់ស្រុកអូរជ្រៅ ។
ប្រជាពលរដ្ឋបានប្រាប់ថា ដែលជាពលរដ្ឋចេញចូលទៅថៃតាមច្រកអូរបីជាន់នេះ គឺជារៀងរាល់ថ្ងៃសុក្រ ក្នុង១សប្តាហ៍ មាន១ថ្ងៃ ដែលបើកអោយប្រជាពលរដ្ឋចេញចូលទៅផ្សារណាត់ថៃ គឺផ្សារគោកស៊ូង ស្ថិតស្រុកតាប្រយ៉ា ខេត្តស្រះកែវ ប្រទេសថៃ ដើម្បីចូលទៅទិញទំនិញមានសម្ភារប្រើប្រាស់ និងជីកសិកម្មគ្រឿងបរិភោគ ក្រោយពេលទិញទំនិញបានហើយដឹកចូលមកវិញ ត្រូវបានបង់លុយអោយកម្លាំងឈរជើងច្រកតាមទំនិញតិចច្រើន មានរម៉កកង់បី គោយន្តកន្ត្រៃ រថយន្ត១គ្រឿង បង់លុយ១០.០០០ទៅ១៥.០០០រៀល ។
លោកឧត្តមសេនីយ៍ត្រី ឃួន ជឿន មេបញ្ជាការយោធាការពារព្រំដែនគោកលេខ៥០៣បានប្រាប់ថា ច្រកអូរបីជាន់ដែលបើកអោយប្រជាពលរដ្ឋចេញចូលទៅផ្សារណាត់ថៃជាប់ព្រំដែននេះ គឺជាការស្នើរសុំ និងសំណុំពរពីប្រជាពលរដ្ឋ ហើយយោធភូមិភាគទី៥ រួមជាមួយអាជ្ញាធរនិងភាគីថៃបានបើកអោយប្រជាពលរដ្ឋជាប់ជាយដែនចេញចូលទៅផ្សារណាត់ថៃជាប់ជាយដែនក្នុង១សប្តាហ៍ មាន១ថ្ងៃ គឺថ្ងៃសុក្រជាងរាល់សប្តាហ៍ដែលប្រជាពលរដ្ឋចេញចូលទៅទិញទំនិញ និងគ្រឿងបរិភោគ ។
លោក លី សុវណ្ណារិទ្ធ អភិបាលស្រុកអូរជ្រៅបានបញ្ជាក់ថា ការបើកអោយប្រជាពលរដ្ឋចេញចូលទៅផ្សារណាត់ថៃ គឺមានរាល់តែថ្ងៃប្រជាពលរដ្ឋចេញចូលច្រើនក្នុង១ថ្ងៃក្បែរពាន់នាក់នោះ គឺនៅថ្ងៃសុក្រតាមច្រករបៀងអូរបីជាន់ គ្រប់គ្រងដោយយាធាយោធភូមិភាគីទី៥ និងច្រករបៀងជាច្រើនកន្លែងទៀត ដែលបើកចេញចូលមានតិចតួចតែមានទំនិញខ្លះគេចពន្ធដែលនាំចេញចូលល្មើសច្បាប់ ។
លោកបានបញ្ជាក់ថា បញ្ហាច្រករបៀងខុសច្បាប់នេះរាជរដ្ឋាបាលកម្ពុជាសម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃបានដាក់វិធានការអាជ្ញាធរជាប់ជាយដែនលុបបំបាត់ច្រករបៀងខុសច្បាប់ ដើម្បីទប់ស្កាត់ទំនិញគេចពន្ធ និងពលករចំណាក់ស្រុកខុសច្បាប់ការពារសុវត្ថិភាពបងប្អូនប្រជាពលរដ្ឋ ៕
ចែករំលែកព័តមាននេះ