ទីក្រុងហុងកុង ៖ កាលពីខែធ្នូកន្លងមកនេះ ទីក្រុងហុងកុងមានការទិញលក់ការិយាល័យតែ៣ប៉ុណ្ណោះ ដែលជាចំនួនទាបជាងគេក្នុងរយៈពេល១០ឆ្នាំកន្លងមក ។ នេះបើតាមការចេញពីពីសារព័ត៌មាន South China Morning Post កាលពីថ្ងៃទី២ មករា កន្លងមក ។
យោងតាមក្រុមហ៊ុនអចលនទ្រព្យ Midland IC&I បានឲ្យដឹងថា សម្រាប់ឆ្នាំ ២០១៨ ទាំងស្រុង ហុងកុងមានការលក់ការិយាល័យប្រមាណ១៩៦ដង ដែលទាបជាងឆ្នាំមុនដល់ទៅ ៤៥%។
លោក Eric Ong ដែលជាប្រធានផ្នែកដំណើរការក្រុមហ៊ុននិងប្រធានផ្នែកពាណិជ្ជកម្មនៅក្រុមហ៊ុន Midland បានឲ្យដឹងថា ៖«ការទិញលក់ការិយាល័យបានចាប់ផ្តើមធ្លាក់ចុះក្នុងឆមាសទី២នាឆ្នាំ២០១៨ ព្រោះកត្តាមួយចំនួនដូចជាសង្គ្រាមពាណិជ្ជកម្មរវាងសហរដ្ឋអាមេរិកនិងប្រទេសចិន និងទីផ្សារភាគហ៊ុនដែលមានភាពឡើងចុះប៉ះពាល់ដល់ស្ថានការណ៍វិនិយោគជាដើម »។ ទន្ទឹមនឹងនេះ លោកបានបន្ថែមថា ខែធ្នូក៏ជាខែដែលមិនមានការទិញលក់ការិយាល័យច្រើនដែរក្នុងទីក្រុងមួយនេះ ។
ការអន់ថយនៃការទិញលក់ការិយាល័យកើតមានឡើង ខណៈដែលការទិញលក់ផ្ទះក្នុងហុងកុងមានការធ្លាក់ចុះ និងតម្លៃអន់ថយ បន្ទាប់ពីមានការលូតលាស់អស់២ឆ្នាំជាប់ៗគ្នាមកនេះ ។ អ្នកវិភាគបានព្រមានដល់ម្ចាស់ផ្ទះថា តម្លៃផ្ទះនឹងបន្តធ្លាក់ចុះទៀត ដែលអាចដល់ទៅ ២៥%ឯណោះ ព្រោះសង្គ្រាមពាណិជ្ជកម្ម ទីផ្សារភាគហ៊ុន និងកំណើនអត្រាការប្រាក់បន្លាចអតិថិជន ។
ជាមួយគ្នានេះ តម្រូវការការិយាល័យអាចនឹងមានការអន់ថយ ព្រោះតែមូលហេតុខាងលើនេះ ហើយក្រុមហ៊ុនចាប់ផ្ដើមស្ទាក់ស្ទើរ និងមិនមានភាពប្រាកដប្រជា ថែមទាំងបានពន្យារពេលពង្រីក ឬការប្តូរទីតាំងការិយាល័យ ៕
ចែករំលែកព័តមាននេះ