ខេត្តកំពង់ស្ពឺ ៖ មិនដឹងថា តើការគ្រប់គ្រងកូនចៅរបស់លោកអធិការនគរបាលស្រុកបសេដ្ឋដែលទើបនឹងឡើងកាន់ដំណែងថ្មីតាមយុទ្ធសាស្ត្ររបៀបណានោះទេ? បើគ្រាន់តែសាច់គោដែលនៅលើឡានបង្កគ្រោះថ្នាក់ចរាចរណ៍ក៏យកដែរ។
ការយកសាច់គោរបស់ប្រជាពលរដ្ឋធ្វើដំណើរតាមរថយន្តឈ្នួលនេះកើតមានឡើងនៅក្នុងហេតុការណ៍គ្រោះថ្នាក់ចរាចរណ៍មួយបានកើតឡើងបណ្តាលឱ្យបុរស២នាក់រងរបួសដោយរថយន្តបុកពេញទំហឹងដួលរដូករណែលពេញផ្លូវ ។ ក្រោយកើតហេតុជនរងគ្រោះត្រូវបានប្រជាពលរដ្ឋទាក់ទងរថយន្តដឹកយកទៅសង្គ្រោះភ្លាមៗផងដែរ រីឯអ្នកបើកបរបានចុះរត់គេចខ្លួនបាត់។
ករណីគ្រោះថ្នាក់ចរាចរណ៍នេះកើតឡើងរវាងរថយន្ត និងម៉ូតូស្របទិសគ្នា កាលពីម៉ោង៩និង៣០នាទី ថ្ងៃទី០៥ ខែមករា ឆ្នាំ២០១៩ នៅលើផ្លូវជាតិលេខ៤១ ចន្លោះគីឡូម៉ែត្រ៤១-៤២ ចំណុចភូមិតានួន ឃុំពោធិម្រាល ស្រុកបសេដ្ឋ ខេត្តកំពង់ស្ពឺ។
ប្រភពពីសាក្សីនៅជិតកន្លែងកើតហេតុបានឱ្យដឹងថា មុនពេលកើតហេតុគេឃើញភាគីម៉ូតូបើកបរមកពីទិសខាងត្បូងឆ្ពោះមកទិសខាងជើង លុះដល់ចំណុចកើតហេតុបានបត់ឆ្លងផ្លូវ (ទៅឆ្វេងដៃ) ស្រាប់តែមានរថយន្តមួយគ្រឿងទៀតម៉ាកសាំយ៉ុង ពណ៌ខៀង ពាក់ស្លាកលេខ ភ្នំពេញ 2AG-8682 (រថយន្តឈ្នួលកំពត-ភ្នំពេញ) អ្នកបើកបរមិនស្គាល់អត្តសញ្ញាណ ដែលកំពុងបើកបរក្នុងល្បឿនលឿនស្របទិសគ្នានោះ បានមកពីក្រោយបុកពេញទំហឹងតែម្តង។បន្ទាប់ពីកើតហេតុ អ្នកបើកបរបានចុះរត់គេចខ្លួនបាត់ បន្សល់ទុកតែវត្ថុតាង និងអ្នកជិះ (រថយន្តឈ្នួល) នៅកន្លែងកើតហេតុ។
ជនរងគ្រោះត្រូវបានប្រជាពលរដ្ឋទាក់ទងរថយន្តសង្គ្រោះដឹកយកទៅសង្គ្រោះភ្លាមៗផងដែរនិងបានរាយការណ៍អោយសមត្ថកិច្ចស្រុកចុះមកធ្វើកំណត់ហេតុវាស់វែង និងនាំយកវត្ថុតាងទាំងពីរទៅរក្សាទុកនៅអធិការដ្ឋាននគរបាលស្រុកបសេដ្ឋ រង់ចាំស្រាវជ្រាវរកម្ចាស់រថយន្តអោយចូលខ្លួនមកដោះស្រាយគ្នានៅពេលក្រោយ។
អ្វីដែលជាការហួសចិត្តនោះនៅពេលដែលអ្នកដំណើរកំពុងតែភ័យតក់ស្លុតនោះ ស្រាប់តែមន្ត្រីនគរបាលស្រុកដែលចុះមកដល់កន្លែងកើតហេតុ បែរជាឆ្លៀតឱកាសយកសាច់គោរបស់អ្នកដំណើរម្នាក់នៅលើឡានដែលទិញយកទៅផ្ញើកូននៅភ្នំពេញ ។ ដោយឃើញទិដ្ឋភាពនៅចំពោះមុខបែបនេះ អ្នកយកព័ត៌មានយើងក៏បានសួរមន្ត្រីនោះថា បង តើយកសាច់គោគេធ្វើអី? ស្រាប់តែគាត់ឆ្លើយមកវិញថា ម្ចាស់ឡានរត់បាត់ហើយ ចង់យកក៏បានដែរ។
រំពេចនោះស្ត្រីម្ចាស់សាច់គោ (មិនស្គាល់ឈ្មោះ) ក៏មកប្រាប់ថា សាច់គោទាំង៧គីឡូនេះ ខ្ញុំទិញអស់លុយ២៤៥.០០០រៀល ដើម្បីយកទៅផ្ញើកូននៅភ្នំពេញ ហេតុអ្វីបានជាមកយករបស់ខ្ញុំបែបនេះ? បើទោះជាមានការនិយាយប្រាប់ពីម្ចាស់សាច់គោយ៉ាងណា ក៏មន្ត្រីរូបនោះនៅតែ យកសាច់គោនោះទាល់តែបាន។
ដោយមើលឃើញនូវទង្វើមិនសមគួរបែបនេះរបស់មន្ត្រីដែលជាកូនចៅ លោក អ៊ុំ ចំរើន ដែលជាអធិការ ហើយម្យ៉ាងអាណិតស្ត្រីម្ចាស់សាច់គោផងនោះ អ្នកយកព័ត៌មានយើងបានរាយការណ៍ប្រាប់ទៅលោកស្នងការ ដើម្បីអន្តរាគមន៍ប្រគល់សាច់គោនោះទៅម្ចាស់វិញ។ មួយសន្ទុះក្រោយមក ស្រាប់តែឃើញលោកអ៊ុំ ចំរើន ធ្វើដំណើរមកដល់ ហើយសួររកមន្ត្រីដែលយកសាច់គោរបស់គេ និងបានប្រាប់មន្ត្រីរបស់ខ្លួនឱ្យប្រគល់សាច់គោដល់ម្ចាស់គេវិញ។
តែមន្ត្រីរូបនោះមិនបានអោយទាំងអស់នោះទេ គឺបានអោយតែពាក់កណ្តាលប៉ុណ្ណោះ ដោយសំអាងថា ខ្លួនខំយកចុះពីលើឡានគេ អីុចឹងម្ចាស់យកវិញតែ៤គីឡូបានហើយ៣គីឡូយកទៅអាំងក្លែមជាមួយមេ។
ព័ត៌មានបន្ថែមពិស្តារនឹងមានផ្សាយនៅកាសែតកោះសន្តិភាព
ចែករំលែកព័តមាននេះ