ខេត្តកំពង់ចាម ៖ មានហេតុការណ៍ភ្ញាក់ផ្អើលមួយបានកើតឡើងកាលពីម៉ោងជាង៨យប់ ថ្ងៃទី០៥ ខែមករា ឆ្នាំ២០១៩ នៅហាងខារ៉ាអូខេយីហោវីឡា ស្ថិតនៅក្នុងសង្កាត់វាលវង់ ក្រុងកំពង់ចាម ។…
ខេត្តកំពង់ចាម ៖ មានហេតុការណ៍ភ្ញាក់ផ្អើលមួយបានកើតឡើងកាលពីម៉ោងជាង៨យប់ ថ្ងៃទី០៥ ខែមករា ឆ្នាំ២០១៩ នៅហាងខារ៉ាអូខេយីហោវីឡា ស្ថិតនៅក្នុងសង្កាត់វាលវង់ ក្រុងកំពង់ចាម ។ ដោយមានលោកឧកញ៉ាម្នាក់ឈ្មោះ វ៉ន ប៊ុនថៃ ហៅឧកញ៉ាថៃ អតីតឈ្មួញរកស៊ីឈើដ៏ល្បីល្បាញនៅក្នុងស្រុកអូររាំងឪ បានប្រើអំពើហិង្សាលើស្ត្រីរត់តុខារ៉ាអូម្នាក់ក្នុងបន្ទប់លេខ៦៦៦៦ ហើយត្រូវបានកម្លាំងអាវុធហត្ថ និងនគរបាលបានចុះមកអន្តរាគមន៍នាំខ្លួនមកសួរនាំ នៅស្នងការដ្ឋាននគរបាលខេត្តទាំងយប់ ។
តាមមន្ត្រីអាវុធហត្ថក្រុងកំពង់ចាមមួយរូបសូមមិនបញ្ចេញឈ្មោះប្រាប់ឲ្យដឹងថា ក្រោយពីមានហេតុការណ៍កើតឡើងនៅក្នុងបន្ទប់ហាងខារ៉ាអូខេខាងលើ ត្រូវបានមេបញ្ជាការអាវុធហត្ថឲ្យចុះទៅពិនិត្យមើល។ ក្នុងពេលដែលបានចុះទៅដល់នោះ បានឃើញឧកញ៉ាថៃកំពុងតែស្ថិតនៅក្នុងបន្ទប់កើតហេតុ ហើយក៏ត្រូវបានកម្លាំងនគរបាលការិយាល័យព្រហ្មទណ្ឌកំរិតស្រាលខេត្ត បានចុះមកនាំខ្លួនដាក់តាមរថយន្តបញ្ជូនមកកាន់ស្នងការដ្ឋាននគរបាលខេត្ត ដើម្បីសួរនាំ។
មន្ត្រីកងរាជអាវុធរូបនោះបានប្រាប់បន្តថា ហេតុការណ៍ខាងលើបានបង្កឲ្យមានការភ្ញាក់ផ្អើលពេញហាងខារ៉ាអូខេតែម្តង។ ជាមួយគ្នានោះក៏មានក្រុមអ្នកសារព័ត៌មានជាច្រើននាក់ បានមកតាមប្រមាញ់ ដើម្បីថតយករូបភាពរបស់លោកឧកញ៉ាខាងលើផងដែរ។ ម្ចាស់ហាងថា ចាប់តាំងពីពេលដែលបើកហាងមកពុំដែលមានហេតុការណ៍ភ្ញាក់ផ្អើលបែបនេះទេ ទើបកើតឡើងតែម្តងដោយឧកញ៉ាថៃបានបង្កហិង្សាលើអ្នកបំរើការងារនៅក្នុងខារ៉ាអូខេ ហើយរហូតមកដល់ថ្ងៃទី០៦ មករានេះ តាមដំណឹងឧកញ៉ារូបនោះមិនត្រូវបានដោះលែងនៅឡើយទេ ដោយកម្លាំងនគរបាលកំពុងតែទុកគាត់នៅស្នងការដ្ឋាននគររបាលខេត្ត។
អ្នករងគ្រោះឈ្មោះ ចាន់ ហួយ បំភ្លឺថា យប់ថ្ងៃកើតហេតុទី០៥ មករា ២០១៩ ឧកញ៉ាថៃនូវពេលដែលបានចូលមកផឹកស៊ីច្រៀងខារ៉ាអូខេ បន្ទាប់មកបានចាប់នាងលូកលាន់ស្ទាបអង្អែល តែនាងមិនព្រម… ចាប់ទាញបណ្តាច់អាវ ហើយអ្នកនោះបានរត់ចុះទៅជាន់ក្រោមបាត់ ។ ចំណែករូបនាងវិញត្រូវឧកញ៉ាថៃចាប់ខោកក្បាល និងបោចសក់អូសបញ្ច្រាស បណ្តាលឲ្យមានការឈឺចាប់រហូតដល់បង្ហូរទឹកភ្នែក។
ថៅកែហាងខារ៉ាអូខាវីឡានៅព្រឹកថ្ងៃទី០៦ មករា ២០១៩ កោះសន្តិភាពបានព្យាយាមទូរស័ព្ទសួរ ដើម្បីសួរនាំរឿងហេតុខាងលើ ដោយទូរស័ព្ទបានចុចចូលជាច្រើនលើក តែមិនមានអ្នកណាលើកនោះទេ។
លោក ហួត វុទ្ធី ព្រះរាជអាជ្ញាអមសាលាដំបូងខេត្ត មានប្រសាសន៍ឲ្យដឹងនៅព្រឹកថ្ងៃទី០៦ មករានេះថា ករណីខាងលើនេះរូបលោកកំពុងតែឲ្យកម្លាំងនគរបាលខេត្ត ចាត់ការតាមនីតិវិធីច្បាប់បញ្ជូនមកឲ្យរូបលោក ដើម្បីចាត់វិធានការតាមច្បាប់ ៕
ចែករំលែកព័តមាននេះ