ខេត្តកោះកុង ៖ នាព្រឹកថ្ងៃទី៥ ខែមករា ឆ្នាំ២០១៩ នេះទឹកសមុទ្របានហក់ឡើងខ្ពស់ហួសពីការស្មានរួមជាមួយ និងការលាយឡំទៅដោយខ្យល់បក់បោកខ្លាំងបង្កអោយមានរលកធំៗ វាយប្រហារទៅលើលំនៅដ្ឋាន និងតូបលក់ដូរជាច្រើនកន្លែង បណ្តាលអោយមានការខូចខាតមួយចំនួនធំផងដែរ ហេតុការនេះបានកើតឡើងនៅចំនុចឆ្នេរប៉ាក់ខ្លងនៃស្រុកមណ្ឌលសីមា ។
បើតាមការលើកឡើងពីក្រុមអាជីវករដែលលក់ដូរនៅតំបន់ខាងលើបានថ្លែងថា នេះជាលើកទី១ហើយ ដែលបានឃើញមានការហក់ឡើងនៃកំពស់ទឹកខ្ពស់បែបនេះ ហើយពួកគាត់កំពុងតែមានការព្រួយបារម្ភថា បើសិនជាទឹកសមុទ្រ និងរលកអាចកើតមានខ្លាំងជាងនេះ វាពិតជាអាចបង្កអោយមានគ្រោះថ្នាក់ និងផលប៉ះពាល់ខ្លាំងជាក់ជាមិនខាន ។
ប្រភពខាងលើបានបន្តថា ពេលនេះពួកគាត់កំពុងដឹកជញ្ជូនសម្ភារមួយចំនួនយកទៅកាន់ទីទួលមានសុវត្ថិភាព ដើម្បីបញ្ចៀសនូវឧប្បត្តិផ្សេងៗដែលអាចកើតឡើងជាយថាហេតុ ។
លោកហាក់ ឡេង អភិបាលស្រុកមណ្ឌលសីមាបានថ្លែងថា ចំពោះមុខលោកត្រូវបញ្ឍប់ឡានដឹកដី និងឡានដឹកទំនិញធុនធំជាបណ្តោះអាសន្នសិនរង់ចាំទឹកស្រកដូចដើម ទើបអាចបើកអោយធ្វើចរាចរណ៍ជាធម្មតាវិញ ។
លោកបានអោយដឹងថា ចំពោះបញ្ហាទឹកឡើងនេះ គឺវាបានកើតឡើងជារៀងរាល់ឆ្នាំ តែដោយឡែកឆ្នាំនេះ គឺថាស្ថានភាពទឹកឡើងខ្ពស់ហួសពីការរំពឹងទុក ហើយនេះក៏ប្រហែលជាអាចបណ្តាលមកពីចំហាយព្យុះដែលឆ្លងកាត់ប្រទេសថៃនោះតែទោះជាយ៉ាងណាក្តីមកទល់ និងពេលនេះឃើញថា ពុំមានពលរដ្ឋណាម្នាក់បាត់បង់អាយុជីវិតដោយសារហេតុការនេះទេ ដោយគ្រាន់តែមានពលរដ្ឋខ្លះបានរងផលប៉ះពាល់ដល់លំនៅដ្ឋានពួកគាត់បន្តិចបន្ទួចប៉ុណ្ណោះ ហើយចំពោះការជម្លៀសពលរដ្ឋចេញពីតំបន់ខាងលើ គឺនៅពុំទាន់មាននោះឡើយ ដោយសារសភាពការ និងផលប៉ះពាល់វាមានសភាពមិនធ្ងន់ធ្ងរប៉ុន្មាននោះទេ ។
ជាមួយគ្នានេះដែរ លោក ហាក់ ឡេង អភិបាលស្រុកមណ្ឌលសីមាក៏បានអំពាវនាវដល់បងប្អូនដែលរស់នៅតំបន់ជាប់មាត់សមុទ្រមេត្តាបង្កើនការប្រុងប្រយ័ត្នអោយបានខ្ពស់ ដើម្បីជៀសវាងនូវឧប្បត្តិហេតុដែលអាច និងកើតមានដោយចៃដន្យ ។
គូររំលឹកថា កាលពីថ្ងៃទី២ ខែមករា ឆ្នាំ២០១៩ ក្រសួងធនធានទឹក និងឧតុនិយមបានចេញសេចក្តីប្រកាសពីឥទ្ធិពលរបស់ព្យុះ ប៉ាប៊ុក (PABUK) ដោយព្យុះនេះបាននិវត្តន៍ខ្លួនទៅជាព្យុះទីហ្វុង (TI PABUK ) រួចបន្តដំណើរទៅកាន់ ភាគខាងត្បូងប្រទេសថៃ ដែលលក្ខណៈនេះអាចធ្វើអោយខេត្តមួយចំនួន មានភ្លៀងធ្លាក់ពីតិចទៅមធ្យម ។
ជាមួយគ្នានេះដែរក្រសួងធនធានទឹក និងឧតុនិយមបានអំពាវនាវអោយបងប្អូនប្រជានេសាទ និងអ្នកធ្វើដំណើរតាមផ្លូវទឹក ពិសេសពលរដ្ឋដែលរស់នៅតាមបណ្តាកោះនានាត្រូវបង្កើនការប្រុងប្រយ័ត្នចំពោះបាតុភូតព្យុះ ដែលអាចបង្កអោយកើតមានភ្លៀងលាយឡំជាមួយខ្យល់បក់បោកខ្លាំង និងរលកទឹកសមុទ្រខ្ពស់ ៕
ចែករំលែកព័តមាននេះ