ខេត្តកំពង់ឆ្នាំង ៖ សម្រាស់ធំៗប្រមាណជិត១០កន្លែងលើផ្ទៃដីប្រមាណ២ហិកតាត្រូវបានជនឆក់ឱកាសលួចដាក់នៅតំបន់អភិរក្សព្រែកក្បាលកោះក្អែរ ស្ថិតនៅក្នុងឃុំកំពង់ព្រះគគីរ ស្រុកបរិបូណ៍ ។
ករណីនេះត្រូវបានគេសង្ស័យថា គឺមានមន្ត្រីខិលខូចបើកដៃអោយជនល្មើសទើបគេហ៊ានដាក់បែបនេះ ។ យ៉ាងនេះក្តីបន្ទាប់ពីមានសេចក្តីរាយការណ៍អំពីបទល្មើសទាំងនេះ ភ្លាមរួចមក នាយខណ្ឌរដ្ឋបាលផលកំពង់ឆ្នាំងបានបញ្ជាក់ថា លោកនឹងបញ្ជាឲ្យមន្ត្រីជលផលការពារតំបន់អភិរក្ស និងសហគមន៍នេសាទកំពង់ព្រះគគីរ ត្រូវតែរើរុះសម្រាស់ទាំងនោះដឹកចេញពីតំបន់អភិរក្សដែលពួកខ្លួនការពារអោយអស់ទើបរួចខ្លួន ។
ទាក់ទងនឹងបទល្មើសនេះប្រជាពលរដ្ឋបានរាយការណ៍អោយអ្នកយកព័ត៌មានយើងដឹងថា ការដាក់សម្រាស់នៅក្នុងឡូត៍អភិរក្សនេះប្រមាណ២ហិកតា គឺមួយចំនួនត្រូវបានគេដាក់កាលពីទឹកនៅច្រើន និងមួយចំនួនទៀត គឺគេទើបតែដាក់ក្នុងពេលថ្មីៗដោយសម្រាស់មួយចំនួនក្នុងពេលនេះនៅស្រស់ញញឹមមិនទាន់ជ្រុះសន្លឹកនៅឡើយផង ។
ប្រភពដដែលបានបន្តអោយដឹងថា អ្នកដាក់សម្រាស់ខាងលើនេះមានគ្នាចំនួន៣នាក់ដែលជាប្រជាពលរដ្ឋរស់នៅព្រែកគូរ ឃុំប្រឡាយមាស ស្រុកកំពង់លែង ។ ការដាក់សម្រាស់ក្នុងដែនអភិរក្សបានយ៉ាងរលូននេះគេមិនជឿថា អ្នកការពារតំបន់អភិរក្សមិនដឹងនោះឡើយសង្ស័យថាបើកដៃអោយគេក៏ទើបគេហ៊ានដាក់សម្រាស់បានបែបនេះ ។
ដោយឡែកនៅតាមខ្នងកោះជាប់ព្រែកក្បាលកោះក្អែរនេះដែរគេសង្កេតឃើញដើមរាំងមួយចំនួនធំត្រូវគេអារកាត់អស់មែកជាច្រើនដើមផងដែរ ដើម្បីធ្វើជាសម្រាស់យកមកដាក់ក្នុងតំបន់អភិរក្សនេះ ។ នេះ គឺជារឿងត្រីងៀតឈ្លាតពង និងកន្ទេលធំបន្លំដេករបស់មន្ត្រីជលផល និងសហគមន៍នេសាទដែលជាអ្នកទទួលខុសត្រូវការពារតំបន់អភិរក្សនេះដែលនាយខណ្ឌរដ្ឋបាលជលផលមិនគួរអោយរួចខ្លួនឡើយ គួរតែស្រាវជ្រាវចាប់ជនល្មើស និងអ្នកឃុបឃិតមកកសាងសំណុំរឿងបញ្ជូនទៅតុលាការផ្តន្ទាទោសតាមផ្លូវច្បាប់ ដើម្បីជាការព្រមានកុំអោយមានគំរូអាក្រក់ដល់អ្នកក្រោយៗទៀត ។
ទាក់ទងនឹងករណីនេះ លោក លី ឡា នាយខណ្ឌរដ្ឋបាលជលផលកំពង់ឆ្នាំងនៅរសៀលថ្ងៃទី០៤ ខែមករា ឆ្នាំ២០១៩ នេះបានអោយដឹងថា រឿងនេះលោកបានបញ្ជាឲ្យមន្ត្រីជលផល ដែលការពារតំបន់អភិរក្ស និងសហគមន៍នេសាទឃុំកំពង់ព្រះគគីរត្រូវតែសហការគ្នារុះរើសម្រាស់ខាងលើនេះ កាលពីថ្ងៃម្សល់ម៉ិញ និងត្រូវបន្តធ្វើនៅថ្ងៃទី៥ ស្អែកទៀត ព្រោះថ្ងៃទី៤ ជាប់ប្រជុំ ។
លោកបានបញ្ជាក់ថា បញ្ហាសម្រាស់ខាងលើត្រូវលើចេញពីទឹកយកទៅចោលអោយអស់ពីតំបន់អភិរក្ស ដោយមិនត្រូវគ្រាន់តែអូសចេញហើយចោលក្នុងទឹកវិញដដែលនោះទេ ព្រោះវាជាដើមហេតុបង្កឱ្យទឹកក្នុងព្រែកគោករាក់ខុសច្បាប់ ៕
ចែករំលែកព័តមាននេះ