រាជធានីភ្នំពេញ ៖ ថ្លែងសំដៅទៅការពង្រឹងសមត្ថភាព និងតម្លាភាពយុត្តិធម៌ក្នុងការប្រឡងជ្រើសរើសនាយទាហាននៃកងយោធពលខេមរភូមិន្ទឆ្នាំ២០១៩នេះ ឧត្តមសេនីយឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទមេបញ្ជាការកងទ័ពជើងគោក និងជាប្រធានអនុគណៈកម្មការប្រឡងបានហាមដាច់ខាតមិនឲ្យមានកិច្ចអន្តរាគមន៍ណាមួយទោះថ្នាក់ណាក៏ដោយចូលកិច្ចការប្រកបដោយយុត្តិធម៌របស់គណកម្មការប្រឡងនោះឡើយ។
ឧត្តមសេនីយឯក ហ៊ុន ម៉ាណែត បានលើកថា ការជ្រើសរើសបេក្ខជនឲ្យចូលបម្រើកងទ័ព តាមរយៈគណៈកម្មការប្រលងជ្រើសរើសនាយទាហាននេះធ្វើយ៉ាងណារើសឲ្យបានសុក្រឹត រើសឲ្យបានត្រឹមត្រូវ ។ និយាយរួម គឺមានតែគោលការណ៍មួយគត់ឲ្យអ្នកជាប់ជាប់ដោយសមត្ថភាព និងមានមោទនភាព ហើយអ្នកធ្លាក់ធ្លាក់ដោយអស់ចិត្ត ។
ចំណែកគណកម្មាការដែលមានភាពត្រឹមត្រូវនោះនឹងមិនរងនូវការរិះគន់ ឬវាយប្រហារ ហើយនេះ គឺជាជោគជ័យនៅក្នុងរយៈពេល៤ឆ្នាំនេះនៃសកម្មភាពបំពេញភារកិច្ចរបស់យើង ។ មិនតែប៉ុណ្ណោះការអនុវត្តគោលការណ៍ប្រកបដោយយុត្តិធម៌ និងតម្លាភាពនេះនឹងក្លាយជាបទពិសោធន៍នឹងបន្តជោគជ័យនៅឆ្នាំនេះ និងឆ្នាំក្រោយៗទៀត ។
ឧត្តមសេនីយ៍ឯក ហ៊ុន ម៉ាណែត បានសង្កត់ធ្ងន់ថា ភារកិច្ចចម្បងរបស់យើងនៅក្នុងការជ្រើសរើសនាយទាហាននេះ គឺយើងជ្រើសរើសនាយទាហានដែលមានសមត្ថភាពពិតប្រាកដទៅតាមវិធានការវិធីសាស្ត្រតម្លាភាពប្រសិទ្ធភាព យុត្តិធម៌ ហើយនេះ គឺជាគោលដៅធំដែលថ្នាក់ដឹកនាំប្រគល់ឲ្យ ។
លោកសង្ឃឹមថា គណៈកម្មការនឹងទទួលបានជោគជ័យបន្ថែមទៀតដោយសិក្សាអំពីចំណុចខ្វះខាតពីឆ្នាំកន្លងទៅ ហើយត្រូវធ្វើផែនការឲ្យច្បាស់លាស់ទាំងនីតិវិធី សម្ភារៈពេលវេលាសំដៅយកសុក្រិតភាព និងប្រសិទ្ធភាព ។ លោកបន្តថា ការជ្រើសរើសនាយទាហាននៃកងយោធពលខេមរភូមិន្ទឆ្នាំ២០១៩ នេះមានការកើនឡើង បើប្រៀបធៀបទៅនឹងឆ្នាំ២០១៨កន្លងមក ហើយការកើនឡើងនេះ គឺបានកើនឡើងនៅតាមបណ្តាយោធភូមិភាគ ។
ទន្ទឹមនោះឧត្តមសេនីយ៍ឯក ហ៊ុន ម៉ាណែត ក៏បានណែនាំដាក់បទបញ្ជាយ៉ាងម៉ឺងម៉ាត់ទៅដល់ក្រុមការងារថ្នាក់កណ្តាលនៃអនុគណៈកម្មការប្រឡងជ្រើសរើសក៏ដូចជា គណៈមេប្រយោគអគានុរក្ស និងអនុរក្ស និងផ្សេងមិនឲ្យមានការអន្តរាគម និងមិនត្រូវមានមនោសញ្ចេតនាចំពោះបុគ្គលតែត្រូវមានមនោសញ្ចេតនាទូទៅដោយការប្រកួតប្រជែង ។
ផ្តើមពីនោះ និងត្រូវរៀបចំផែនការអនុវត្តនីតិវិធីឲ្យបានច្បាស់លាស់ និងអនុវត្តបទបញ្ជាឲ្យបានម៉ឺងម៉ាត់នៅក្នុងការដឹកនាំ និងដំណើរការនៃការប្រលងជ្រើសរើសនាយទាហាននៃកងយោពលខេមរភូមិន្ទ ឆ្នាំ២០១៩ ឲ្យមានសុក្រិតភាព និងប្រសិទ្ធភាព ។
គួរបញ្ជាក់ដែរថា ការប្រលងជ្រើសរើសនាយទាហាននៃកងយោពលខេមរភូមិន្ទ វគ្គនាយ ទាហានសកម្មជំនាន់ទី២៣ វគ្គនាយទាហានទ័ពជើងគោកជំនាន់ទី១១ វគ្គនាយទាហានបន្ត វេនជំនាន់ទី១២ និងវគ្គនាយទាហានជំនាញបច្ចេកទេសយោធា ឆ្នាំ២០១៩នេះនឹងប្រព្រឹត្ត ទៅនៅថ្ងៃទី១៣-១៥ ខែមករា ឆ្នាំ២០១៩ ខាងមុខ ដែលមានចំនួន៦មណ្ឌល គឺនៅមណ្ឌល រាជធានីភ្នំពេញ យោធភូមិភាគ ទី១ ទី២ ទី៣ ទី៤ និងទី៥ ដោយផ្ដោតទៅលើវិញ្ញាសារចំណេះដឹងទូទៅភាសាបរទេស និងវិញ្ញាសាកីឡាកាយសម្បទា ៕
ចែករំលែកព័តមាននេះ