ខេត្តប៉ៃលិន ៖ រហូតមកដល់វេលាម៉ោង១១និង៣០នាទីព្រឹក ថ្ងៃទី០៤ ខែមករា ឆ្នាំ២០១៩ សពស្ត្រីវ័យចំណាស់ម្នាក់ដែលជាវីរនារីស្ថាបនិកសាសនាគ្រិស្តដំបូងចូលទៅក្នុងខេត្តប៉ៃលិនត្រូវបានគ្រិស្តបរិស័ទទូទាំងខេត្តរៀបចំបញ្ចុះនៅក្នុងបរិវេណព្រះវិហារឧត្តមសាម៉ារី ក្នុងភូមិអូរតាពុកលើ សង្កាត់ប៉ៃលិន ក្រុងប៉ៃលិន…
ខេត្តប៉ៃលិន ៖ រហូតមកដល់វេលាម៉ោង១១និង៣០នាទីព្រឹក ថ្ងៃទី០៤ ខែមករា ឆ្នាំ២០១៩ សពស្ត្រីវ័យចំណាស់ម្នាក់ដែលជាវីរនារីស្ថាបនិកសាសនាគ្រិស្តដំបូងចូលទៅក្នុងខេត្តប៉ៃលិនត្រូវបានគ្រិស្តបរិស័ទទូទាំងខេត្តរៀបចំបញ្ចុះនៅក្នុងបរិវេណព្រះវិហារឧត្តមសាម៉ារី ក្នុងភូមិអូរតាពុកលើ សង្កាត់ប៉ៃលិន ក្រុងប៉ៃលិន ខេត្តប៉ៃលិន ។
បន្ទាប់ពីស្ត្រីរូបនេះបានទទួលមរណភាពដោយសារជម្ងឺរោគាពាធ នៅក្នុងមន្ទីរពេទ្យឯកជនមួយ ក្នុងទីក្រុងភ្នំពេញ កាលពីវេលាម៉ោង២និង០៨នាទីរំលងអធ្រាត្រឈានចូលថ្ងៃទី០២ ខែមករា ឆ្នាំ២០១៩ ហើយសពក៏បានដឹកតាមរថយន្តពេទ្យចូលមកដល់ខេត្តប៉ៃលិនវិញ កាលពីរសៀលថ្ងៃដដែល ។
សូមបញ្ជាក់ថា ស្ត្រីម្នាក់ឈ្មោះ ចាន់ សុវណ្ណ អាយុ៥៦ឆ្នាំ ជាកូនទី៧ ហើយជាស្ថាបនិកគ្រិស្តសាសនាដំបូងចូលទៅក្នុងខេត្តប៉ៃលិន កាលពីឆ្នាំ១៩៩៩ បន្ទាប់ពីប្រទេសកម្ពុជាទទួលសមាហរណកម្មដោយលោកស្រីមានស្រុកកំណើតរស់នៅក្នុងភូមិអូរបាគ្រង ឃុំបាកាន ស្រុកបាកាន ខេត្តពោធិ៍សាត់ បច្ចុប្បន្នរស់នៅក្នុងភូមិអូរច្រាកើត សង្កាត់ទួលល្វា ក្រុងប៉ៃលិន ខេត្តប៉ៃលិន ។
លោកស្រីមានឪពុកឈ្មោះ មាន ចាន់ ម្តាយឈ្មោះ សយ ស៊ីសាង៉ា មានបងប្អូនចំនួន៩នាក់ ហើយលោកស្រីបានទទួលជឿព្រះយេស៊ូវ (កាន់សាសនាគ្រិស្ត) កាលពីឆ្នាំ១៩៩៨ ។
ប្រភពព័ត៌មានពីលោកព្រហ្ម សាវុន ជាគ្រូគង្វាលប្រចាំព្រះវិហារមួយក្នុងក្រុងប៉ៃលិនបានឱ្យដឹងថា លោកស្រី ចាន់ សុវណ្ណ ជាមនុស្សស្រីម្នាក់ដែលមានកេរ្តិ៍ឈ្មោះល្អ នៅក្នុងក្រុមជំនុំ ហើយជាអ្នកដែលបានយកចិត្តទុកដាក់ចំពោះអ្នកបម្រើព្រះជាម្ចាស់ផ្សេងៗជាច្រើនទៀតនៅក្នុងខេត្ត ដោយមិនរើសអើងនោះឡើយ ។ លោកបន្តទៀតថា កាលពីជាង២០ឆ្នាំមុនដែលចូលមកក្នុងខេត្តប៉ៃលិន ដើម្បីផ្សព្វផ្សាយដំណឹងពីព្រះយេស៊ូវ គឺមានក្រុមយុវជនជាច្រើននាក់បានរស់នៅដោយសារស្ត្រីខាងលើជាអ្នកផ្គត់ផ្គង់ទាំងម្ហូបអាហារ សម្លៀកបំពាក់ និងរបស់របរផ្សេងៗទៀតស្ទើរគ្រប់យ៉ាង ។
បើគិតទៅលោកចាត់ទុកអ្នកស្រី ចាន់ សុវណ្ណ ជាម្តាយទីពីរដែលបានបីបាច់ថែរក្សា និងជំរុញ រហូតដល់ក្លាយទៅជាគ្រូគង្វាលដឹកនាំព្រះវិហារគ្រិស្តដល់សព្វថ្ងៃនេះ ។ លោកបញ្ជាក់ទៀតថា បន្ទាប់ពីចប់សង្គ្រាម គឺសមាហរណកម្មប្រហែលជា ឆ្នាំ១៩៩៧-១៩៩៨ នៅក្នុងខេត្តប៉ៃលិន បានចាប់ផ្តើមកកើតមានព្រះវិហារដំបូងដោយសារស្នាដៃរបស់លោកស្រី ហើយដាក់ឈ្មោះព្រះវិហារនោះថាឧត្តមសាម៉ារី រហូតមកដល់សព្វថ្ងៃនេះ ។
បន្ទាប់មកទៀតទើបមានព្រះវិហារថ្មីៗចាប់ផ្តើមសាងសង់ដោយរហូតមកដល់សព្វថ្ងៃនេះមានជាង២០ព្រះវិហារនៅទូទាំងខេត្ត ។ ទោះបីជាយ៉ាងណាក៏ដោយគ្រិស្តបរិស័ទទូទាំងខេត្តប៉ៃលិនរាប់រយនាក់មិនភ្លេចគុណូបការរបស់លោកស្រីឡើយដោយនាំគ្នាសស្រាក់សស្រាំចូលរួមធ្វើបុណ្យ និងដង្ហែក្បួនសពលោកស្រីយកទៅបញ្ចុះនៅក្នុងបរិវេណព្រះវិហារខាងលើ ដោយចារិកឈ្មោះ ទុកជាវីរនារី ក្នុងការបង្កើតព្រះវិហារដំបូងគេក្នុងខេត្តប៉ៃលិនដែលសព្វថ្ងៃនេះមានសមាជិកជាច្រើនគួរឱ្យកត់សម្គាល់ ៕
ចែករំលែកព័តមាននេះ