ខេត្តកំពត ៖ តាមសេចក្តីរាយការពីសមត្ថកិច្ចចរាចរណ៍ក្រុងឲ្យដឹងថា នៅវេលាម៉ោង៨និង២០នាទីព្រឹក ថ្ងៃទី០៤ ខែមករា ឆ្នាំ២០១៩ នេះមានករណីគ្រោះថ្នាក់ចរាចរណ៍មួយបានកើតឡើងនៅត្រង់ចំណុចគល់ស្ពាន ព្រែកកំពង់បាយប៉ែកខាងកើត ស្ថិតក្នុងភូមិកំពង់បាយខាងជើង សង្កាត់កំពង់បាយ ក្រុងកំពត ។
បង្កឡើងរវាងរថយន្តម៉ាកកូរ៉ូឡាប៉ះគ្នាជាមួយម៉ូតូម៉ាកសង់កូរ៉េ ពណ៌ក្រហម ពាក់ផ្លាកលេខព្រះសីហនុ 1A- 2867 បើកបរដោយឈ្មោះ សៀក ស៊ីណន ភេទប្រុស អាយុ៥៧ឆ្នាំ រស់នៅភូមិសុវណ្ណសាគរ សង្កាត់កំពង់កណ្តាល ក្រុងកំពត (ម៉ូតូបើកទិសដៅពីកើតទៅលិច) អ្នកបើកបររងរបួសបាក់ជើងខាងស្តាំ (ធ្ងន់) ត្រូវបានដឹកទៅសង្គ្រោះនៅមន្ទីរពេទ្យបង្អែកខេត្តកំពត ។
ចំណែករថយន្តម៉ាកកូរ៉ូឡា ពណ៌ទឹកប្រាក់ ពាក់ផ្លាកលេខភ្នំពេញ 2Y- 7325 បើកបរដោយឈ្មោះ គ្រី ម៉េងហ៊ួ ភេទប្រុស អាយុ២៩ឆ្នាំ រស់នៅភូមិកំពង់បាយខាងជើង សង្កាត់កំពង់បាយ ក្រុងកំពត រថយន្តបើកបរក្នុងទិសដៅពីជើងទៅត្បូងលុះដល់ចំណុចខាងលើក៏បានបុកម៉ូតូរបស់ជនរងគ្រោះតែម្តង ។
ដោយយានយន្តទាំងពីរគ្រឿងសមត្ថកិច្ចយកទៅរក្សាទុកនៅអធិការដ្ឋាននគរបាលក្រុងកំពត រង់ចាំការដោះស្រាយតាមផ្លូវច្បាប់នៅពេលក្រោយ ៕
ចែករំលែកព័តមាននេះ