រាជធានីភ្នំពេញ ៖ បុរសមិនស្គាល់អត្តសញ្ញាណម្នាក់ត្រូវបានគេសង្ស័យថាប្រើប្រាស់ថ្នាំញៀនហួសកំរិត បណ្តាលឱ្យវង្វេងស្មារតីដើរចូលផ្ទះប្រជាពលរដ្ឋ និងបំរុងយកម៉ូតូចេញ តែត្រូវម្ចាស់ឃើញទាន់ក៏ដេញបុរសនោះចេញមកក្រៅវិញ ហើយត្រូវបានគេប្រទះឃើញសន្លប់នៅតាមចិញ្ចើមផ្លូវបង្កការភ្ញាក់ផ្អើលកាលពីវេលាម៉ោង១និង២០នាទីរំលងអធ្រាត្រឈានចូលថ្ងៃទី៤ ខែមករា ឆ្នាំ២០១៩ នៅចំណុចមុខក្រសួងរុក្ខប្រមាញ់និងនេសាទ តាមបណ្តោយផ្លូវព្រះនរោត្តម ស្ថិតក្នុងសង្កាត់ទន្លេបាសាក់ ខណ្ឌចំការមន។
តាមសាក្សីពីបុរសម្នាក់ដែលឃើញហេតុការណ៍នេះបានឲ្យដឹងថា មុនពេលកើតហេតុ គាត់ឃើញបុរសម្នាក់មិនស្គាល់អត្តសញ្ញាណខាងលើដេកនៅកណ្តាលផ្លូវ ដោយសារតែខ្លាចមានបញ្ហា ទើបគាត់លើកបុរសនោះអោយទៅដេកចិញ្ចើមផ្លូវ រួចទំនាក់ទំនងទៅសមត្ថកិច្ចអោយចុះមកដល់ចំណុចកើតហេតុ ដើម្បីចុះមកមើលបុរសម្នាក់នេះ ។
បើតាមប្រភពពីបុរសម្នាក់ និងលោកយាយម្នាក់ទៀតបានឲ្យដឹងថា មុនពេលកើតហេតុ បុរសខាងលើបានដើរចូលផ្ទះរបស់គាត់ហើយបានអូសម៉ូតូរបស់គាត់ចេញ ដោយបុរសម្នាក់នោះបាននិយាយថា ម៉ូតូនេះជារបស់ខ្លួន ពេលនោះពួកគាត់ឃើញទាន់ក៏ចាប់បាន ដោយសារតែបុរសម្នាក់នោះនិយាយដូចមនុស្សបែកថ្នាំទើបពួកគាត់ដេញទៅក្រៅផ្ទះវិញ បន្ទាប់មកក៏ស្រាប់តែផ្អើលថាឃើញបុរសម្នាក់សន្លប់តាមចិញ្ចើមផ្លូវបែបនេះ។
សមត្ថកិច្ចបានសង្ស័យថា បុរសម្នាក់ខាងលើនេះអាចប្រើប្រាស់គ្រឿងស្រវឹងច្រើន ឬអាចប្រើប្រាស់គ្រឿងញៀនហួសកម្រឹតទើបបណ្តាលឱ្យទៅជាបែបនេះ។ ក្រោយកើតហេតុ សមត្ថកិច្ចបានហៅរថយន្តសង្គ្រោះអោយមកដឹកបុរសម្នាក់នោះទៅមន្ទីរពេទ្យកាល់ម៉ែតដើម្បីសង្គ្រោះ៕
ចែករំលែកព័តមាននេះ