រាជធានីភ្នំពេញ ៖ ជនសង្ស័យ២នាក់ក្នុងចំណោមគ្នា៤នាក់ត្រូវបានចាប់ខ្លួនដោយកងកម្លាំងនគរបាលខណ្ឌពោធិ៍សែនជ័យ កាលពីវេលាម៉ោង២រសៀល ថ្ងៃទី០៣ ខែមករា ឆ្នាំ២០១៩នៅក្នុងភូមិ ចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។
ក្រុមជនខាងលើត្រូវបាននគរបាលប្រាប់ថា បានធ្វើសកម្មភាពកាប់ប្រហារទៅលើបុរសជនជាតិចិនម្នាក់ប្លន់យកកាបូបលុយបានសម្រេច ។ បណ្ដាលឲ្យជនរងគ្រោះរងរបួសរយះក្បាលយ៉ាងធ្ងន់ធ្ងរដេរជាង៦០ថ្នេរ បន្ទាប់មកបាននាំគ្នារត់គេចខ្លួនបានរយៈពេល១៤ថ្ងៃទើបជាប់អន្ទាក់នាពេលនេះ ។
នគរបាលបានឲ្យដឹងបន្តទៀតថា ក្រុមចោរប្លន់ដែលត្រូវចាប់ខ្លួនបាននោះរួមមាន១-ឈ្មោះ ថន វ៉ាន់ថា អាយុ១៩ឆ្នាំ មុខរបរមិនពិត ស្នាក់នៅផ្ទះជួល ក្នុងភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ ២- ឈ្មោះ មុំ ម៉េងលី អាយុ១៨ឆ្នាំ មុខរបរមិនពិត ស្នាក់នៅផ្ទះជួល ក្នុងភូមិជាមួយគ្នា ចំណែកបក្សពួក២នាក់ទៀតកំពុងរត់គេចខ្លួនមិនទាន់ត្រូវបានស្គាល់អត្តសញ្ញាណនៅឡើយ ។
ប្រភពខាងលើបានបន្តថា ដោយឡែកជនរងគ្រោះនៅក្នុងអំពើប្លន់នេះ គឺជាជនជាតិចិន ឈ្មោះ ចៀន ហ៊ាន់ហ្វឹង ភេទប្រុស អាយុ៤០ឆ្នាំ មានមុខរបរលក់ស្បែកជើង ។ ស្នាក់នៅផ្ទះជួលក្នុងភូមិ ចាក់ជ្រូក សង្កាត់សំរោងក្រោម ខណ្ឌពោធិសែនជ័យនោះដែរ ហើយគាត់បានរងរបួសរយះក្បាល និងថ្ងាសធ្ងន់ធ្ងរ ដោយសាររងនូវផ្លែដាវរបស់ក្រុមចោរ ។ មិនតែប៉ុណ្ណោះបានបាត់បង់លុយចំនួន៩០០ដុល្លារអាមេរិក លិខិតឆ្លងដែន១ច្បាប់ ទូរស័ព្ទដៃចំនួន២គ្រឿងក្នុងនោះមានម៉ាកអាយហ្វូន៦មួយគ្រឿង និងម៉ាកអាយហ្វូនហ្វ័រ១គ្រឿង ។
ប្រភពមួយនេះបានបញ្ជាក់បន្ថែមទៀតថា ហេតុការណ៍នោះបានកើតឡើងតាំងពីវេលាម៉ោង ២យប់រំលងអធ្រាត្រឈានចូលថ្ងៃទី២០ ខែធ្នូ ២០១៨មកម្ល៉េះ នៅតាមផ្លូវបេតុង ត្រង់ចំណុចមុខ ស្ថានីយប្រេងឥន្ធនៈ លីម ឡុង ស្ថិតនៅក្នុងភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។
ដោយនៅក្នុងខណៈនោះជនរងគ្រោះបានដើរចេញពីផ្ទះជួលដែលខ្លួនស្នាក់នៅ ដើម្បីដើររកទិញអីហូប លុះពេលដើរទៅដល់ចំណុចកើតហេតុខាងលើ ស្រាប់តែជនសង្ស័យទាំង៤នាក់ នោះប្រដាប់ដោយដាវក្នុងដៃស្ទុះទៅកាប់ប្រហារលើជនរគ្រោះដណ្ដើមយកកាបូបស្ពាយពីជនរងគ្រោះបានសម្រេចរួចគេចខ្លួនបាត់ ។
ខណៈនោះមិនមាននរណាហ៊ានចូលជួយជនរងគ្រោះឡើយ ហើយក្រោយពីត្រូវជនសង្ស័យកាប់ បណ្ដាលឲ្យរងរបួស បុរសរងគ្រោះក៏បានរត់ត្រឡប់ចូលទៅផ្ទះជួលវិញ ។ ដើម្បីឲ្យមិត្តភក្តិជួយដឹកតាមម៉ូតូរ៉ឺម៉កកង់បីនាំយកទៅកាន់មន្ទីរពហុព្យាបាល «ចុងស៊ិន» ស្ថិតនៅក្នុងសង្កាត់ស្ទឹងមានជ័យ ខណ្ឌមានជ័យ ។
ប៉ុន្តែដោយសារតែរបួសធ្ងន់ធ្ងរពេកទើបគ្រូពេទ្យនៅមន្ទីរពហុព្យាបាលចុងស៊ិនស្ទឹងមានជ័យ បានបញ្ជូនបន្តទៅសង្គ្រោះបន្ទាន់នៅមន្ទីរពេទ្យកាល់ម៉ែត្រ ។ ក្រោយមកទើបជនរងគ្រោះបាន ដាក់ពាក្យប្ដឹង ហើយនគរបាលខណ្ឌពោធិ៍សែនជ័យបានធ្វើការស្រាវជ្រាវរហូតមកដល់វេលាម៉ោង២រសៀលថ្ងៃទី០៣ ខែមករា ឆ្នាំ២០១៩ ទើបចាប់ខ្លួនជនសង្ស័យបាន២នាក់ និងរត់រួច២នាក់ ហើយនគរបាលកំពុងតាមចាប់បន្តទៀតហើយ ៕
ចែករំលែកព័តមាននេះ