ប្រទេសថៃ ៖ អ្នកទេសចរច្រើនសិបពាន់នាក់បាននាំគ្នាភៀសខ្លួនចេញពីបណ្ដាកោះដែលមានប្រជាប្រិយភាពទាំងឡាយរបស់ថៃ ខណៈព្យុះត្រូពីកាល់ឈ្មោះPABUKជិតបោកបក់មកដល់។ នាថ្ងៃទី៤ មករា ព្យុះនោះនឹងបង្កឲ្យមានភ្លៀងធ្លាក់ខ្លាំងនៅភាគខាងត្បូងថៃ មានខ្យល់បោកបក់ខ្លាំង ព្រមទាំងរលកសមុទ្រធំៗកម្ពស់ច្រើនម៉ែត្រ។ ទោះបីពុំទាន់មានបទបញ្ជាផ្លូវការឲ្យជម្លៀសចេញក៏ដោយ…
ប្រទេសថៃ ៖ អ្នកទេសចរច្រើនសិបពាន់នាក់បាននាំគ្នាភៀសខ្លួនចេញពីបណ្ដាកោះដែលមានប្រជាប្រិយភាពទាំងឡាយរបស់ថៃ ខណៈព្យុះត្រូពីកាល់ឈ្មោះPABUKជិតបោកបក់មកដល់។ នាថ្ងៃទី៤ មករា
ព្យុះនោះនឹងបង្កឲ្យមានភ្លៀងធ្លាក់ខ្លាំងនៅភាគខាងត្បូងថៃ មានខ្យល់បោកបក់ខ្លាំង ព្រមទាំងរលកសមុទ្រធំៗកម្ពស់ច្រើនម៉ែត្រ។
ទោះបីពុំទាន់មានបទបញ្ជាផ្លូវការឲ្យជម្លៀសចេញក៏ដោយ ក៏ពួកអ្នកទេសចរដែលមានច្រើនបំផុត នាឱកាសបុណ្យដំណាច់ឆ្នាំ ចាប់ផ្ដើមជម្លៀសចេញកាលពីថ្ងៃទី២មករា ខណៈព្យុះត្រូវវាយប្រហារនារសៀលថ្ងៃទី៤ មករា លើកោះទេសចរណ៍សាមុយ កោះPHANGNAN និងកោះTAOស្ថិតក្នុងឈូងសមុទ្រថៃ។
លោកKRIKKRAI SONGTHANEEអភិបាលស្រុកកោះPHANGNANថ្លែងប្រាប់សារព័ត៌មានថា មនុស្សរវាងពី៣០.០០០ទៅ៥០.០០០នាក់បានចាកចេញចាប់តាំងពីថ្ងៃទី៣១ធ្នូមក។ ចំណែកអភិបាលបម្រុងស្រុកកោះTAOជាទីតាំងមុជទឹកប្រសើរបំផុតមួយ នៅអាសីុអាគ្នេយ៍គូសបញ្ជាក់ថា បណ្ដានាវាទៅកាន់CHUMPONដឹកអ្នកទេសចរពេញៗទោះបីអ្នកទេសចរច្រើនពាន់នាក់សម្រេចស្ថិតនៅទីនោះក្ដី។
មេប៉ូលិសម្នាក់និយាយថានៅកោះសាមុយ បុរសរុស្សុីម្នាក់អាយុ៥៦ឆ្នាំ ដែលហែលទឹកជាមួយគ្រួសារគេ ទោះមានការហាមឃាត់មិនឲ្យចុះមុជទឹក ត្រូវលុងទឹកព្រោះរលកបោកនាំយកទៅ។ អាជ្ញាធរមូលដ្ឋានប្រកាសពីការបង្កើតជម្រកនានា សម្រាប់បណ្ដាអ្នកដែលសម្រេចមិនចាកចេញ ខណៈអ្នកទេសចរច្រើននាក់ពុំអាចរកជើងយន្តហោះជិះបាន។ នាថ្ងៃទី៤មករាជើងយន្តហោះទៅកាន់កោះសាមុយត្រូវលុបចោល។
វាជារឿងកម្រដែលព្យុះPABUKជាព្យុះត្រូពីកាល់ដំបូងគេប្រចាំឆ្នាំ វាយប្រហារលើផ្នែកនោះរបស់ថៃ ក្រៅរដូវភ្លៀងដែលពុំធ្លាប់មានចាប់តាំងពី៣០ឆ្នាំមកហើយ។ ពួកអ្នកព្យាករណ៍ឧតុនិយមនិយាយថា ព្យុះនោះនឹងប្រែក្លាយទៅជាព្យុះទីហ្វុងមួយ។ ព្យុះនោះអាចនាំឲ្យមានរលកធំៗ កម្ពស់ដល់ពី៥ទៅ៧ម៉ែត្រ។ តាមធម្មតាក្នុងឈូងសមុទ្រថៃ តែងមានរលកត្រឹមកម្ពស់យ៉ាងច្រើន២ម៉ែត្រ។ ពួកអ្នកឧតុនិយមថៃអះអាងថា គេពិបាកក្នុងការព្យាករណ៍ពីភាពធ្ងន់ធ្ងរនៃព្យុះនេះ ដូច្នេះមនុស្សម្នាត្រូវតាមដានធ្វើតាមការណែេនាំរបស់អាជ្ញាធរ។
PABUKដែលជាឈ្មោះត្រីធំមួយនៅឡាវនឹងបណ្ដាលឲ្យមានភ្លៀងធ្លាក់ខ្លាំងនៅតាមកន្លែងទេសចរណ៍សំខាន់ៗឯទៀតរបស់ថៃ ពិសេសកោះក្រាប៊ីឬកោះភូកេតក្នុងសមុទ្រANDAMAN។ ភ្លៀងក៏នឹងធ្លាក់ខ្លាំងដែរក្នុងខេត្តប៉ាតានី ណារ៉ាធីវ៉ាត់និងយ៉ាឡាជាប់ព្រំដែនជាមួយម៉ាឡេសីុ៕
ចែករំលែកព័តមាននេះ