រាជធានីភ្នំពេញ ៖ អ្នកបើកបររថយន្តម៉ាក Jeeb មួយគ្រឿង បើកលឿនពេកក៏រេចង្កូតឡើងខឿនចិញ្ចើមផ្លូវបុកបង្គោលភ្លើងបំភ្លឺផ្លូវ បណ្តាលឲ្យរងការខូចខាតតិចតួច ចំណែកអ្នកបើកបរភ័យរត់ចោលរថយន្តបាត់ ដែលហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង១១និង៣០នាទីយប់ថ្ងៃទី៣ ខែមករា ឆ្នាំ២០១៩ នៅតាមបណ្ដោយផ្លូវបេតុង រោងចក្រដំបូលខៀវ ដែលស្ថិតនៅភូមិត្រពាំងថ្លឹង សង្កាត់ទី១ ខណ្ឌពោធិ៍សែនជ័យ ។
តាមប្រភពពត័មានពីកន្លែងកើតហេតុបានអោយដឹងថា មុនពេលកើតហេតុ គេឃើញបុរសម្នាក់បានបើកបររថយន្តមួយគ្រឿងម៉ាក Jeeb ពណ៌ស្លែ អត់ស្លាកលេខ ធ្វើដំណើរក្នុងទិសដៅពីត្បូងទៅជើងក្នុងល្បឿនយ៉ាងលឿន លុះមកដល់កន្លែងកើតហេតុ ស្រាប់តែរថយន្តខាងលើបានរេចង្កូតទៅផ្នែកខាងស្ដាំ ឡើងខឿនចិញ្ចើមផ្លូវ ហើយបុកបង្គោលភ្លើងរបស់រោងចក្រដំបូលខៀវ បណ្តាលឲ្យរងការខូចខាតតិចតួច ចំណែកអ្នកបើកបរបានចុះពីលើរថយន្តហើយរត់គេចខ្លួនបាត់ បន្ទាប់មកប្រជាពលរដ្ឋបានទាក់ទងនគរបាលប៉ុស្តិ៍ចោមចៅទី១ខាងលើអោយចុះមកពិនិត្យកន្លែងកើតហេតុ។
ក្រោយពេលកើតហេតុ កំលាំងនគរបាលប៉ុស្តិ៍ចោមចៅទី១បានទាក់ទងទៅជំនាញចរាចរណ៍ខណ្ឌពោធិ៍សែនជ័យដើម្បីស្ទូចយករថយន្តខាងលើទៅរក្សាទុករង់ចាំការដោះស្រាយនៅពេលក្រោយ ៕
ចែករំលែកព័តមាននេះ