ខេត្តកណ្ដាល ៖ យុវជនម្នាក់ត្រូវចាប់ខ្លួនសមត្ថកិច្ចនគរបាលខេត្តកណ្តាលសហការជាមួយនគរបាលខេត្តតាកែវចាប់ខ្លួន កាលពីថ្ងៃទី៣ មករានេះ ពាក់ពន្ធពីបទគំរាមហែកកេរ្តិ៍ ប្រព្រឹត្តពីខែតុលា ២០១៨ នៅចំណុចផ្ទះជនរងគ្រោះ ភូមិព្រែកយាយហាយ…
ខេត្តកណ្ដាល ៖ យុវជនម្នាក់ត្រូវចាប់ខ្លួនសមត្ថកិច្ចនគរបាលខេត្តកណ្តាលសហការជាមួយនគរបាលខេត្តតាកែវចាប់ខ្លួន កាលពីថ្ងៃទី៣ មករានេះ ពាក់ពន្ធពីបទគំរាមហែកកេរ្តិ៍ ប្រព្រឹត្តពីខែតុលា ២០១៨ នៅចំណុចផ្ទះជនរងគ្រោះ ភូមិព្រែកយាយហាយ ឃុំព្រែកថ្មី ស្រុកកោះធំ ខេត្តកណ្តាល ។
ជនសង្ស័យឈ្មោះ ចេង មិត្ត ភេទប្រុស អាយុ៣២ឆ្នាំ មានទីលំនៅភូមិសំរោង ឃុំត្រពាំងធំខាងត្បូង ស្រុកត្រាំកក់ ខេត្តតាកែវ មុខរបរកម្មករសំណង់ ។ ជនរងគ្រោះមានគ្នា២នាក់ម្នាក់ឈ្មោះ គ.គ ភេទស្រី អាយុ២៣ឆ្នាំ មានទីលំនៅ ស្រុកកោះធំ ខេត្តកណ្ដាល មុខរបរកម្មការិនីរោងចក្រ និងម្នាក់ឈ្មោះ ជ.ធ ភេទស្រី អាយុ៣៣ឆ្នាំ មានទីលំនៅ ស្រុកកោះធំ ខេត្តកណ្ដាល មុខរបរ កម្មការិនីរោងចក្រ ដូចគ្នា ។
តាមពាក្យបណ្តឹងជនរងគ្រោះដាក់ចូលសមត្ថកិច្ចបានរៀបរាប់ថា កាលពីអំឡុងខែតុលា ឆ្នាំ២០១៨ កន្លងទៅពួកគេទាំង២នាក់ បានមានការទំនាក់ទំនងជាមួយជនសង្ស័យតាមរយៈទូរស័ព្ទលេងហ្វេសប៊ុក ។ ពួកគេបានឆាតលេងជាមួយគ្នាជាហូរហែប្រមាណជាង១សប្ដាហ៍ក្រោយមកស្រាប់តែជនសង្ស័យបានសុំមើលរូបអាក្រាតកាយរបស់ជនទាំង២នាក់ (មើលម្នាក់ម្ដង) មុនក្រោយគ្នា ។
បន្ទាប់មកជនសង្ស័យបានតម្រូវឲ្យពួកនាងផ្ញើរូបថតអាក្រាតកាយទៅឲ្យគេតាមរយៈ Accoun t facebook ឈ្មោះ Ahmoa Tps ហើយពួកនាងក៏ធ្វើតាម ។ ក្រោយពីទទួលបានរូបថតអាក្រាតរបស់នាងទាំង២នាក់នៅក្នុងដៃហើយ ជនសង្ស័យក៏បានទូរស័ព្ទសុំលុយ តែនាងមិនព្រមឲ្យ ពេលនោះជនសង្ស័យបាននិយាយគំរាមថាគេ និងទាញយករូបថតអាក្រាតកាយរបស់ពួកនាងបង្ហោះចូលក្នុងបណ្ដាញសង្គមហ្វេសប៊ុក ដើម្បីឲ្យគេបានឃើញគ្រប់គ្នា ។
ពាក្យបណ្តឹងបានបញ្ជាក់ទៀតថា ដោយមានការភ័យខ្លាច និងរងនូវភាពអាម៉ាសចំពោះទង្វើជនសង្ស័យដែលមានបំណងធ្វើមកលើយករូបភាពអាក្រាតទៅបង្ហោះចូលក្នុងបណ្ដាញសង្គមហ្វេសប៊ុកនោះជនរងគ្រោះទាំង២នាក់បានសម្រេចចិត្តផ្ញើលុយទៅឲ្យជនសង្ស័យតាមរយៈភ្នាក់ងារវេរលុយជាបន្តបន្ទាប់ តាមអ្វីដែលជនសង្ស័យត្រូវការពុំដែលខកខានឡើយ សរុបជាទឹកប្រាក់មានដូចខាងក្រោមនេះ ជនរងគ្រោះទី១- អស់ប្រាក់សរុបចំនួន១.៨០០.០០០ និង ៥០០ដុល្លារអាមេរិកទៀត ។
ជនរងគ្រោះទី២ -អស់ទឹកប្រាក់សរុបចំនួន១៧០០ដុល្លារអាមេរិក និងលុយខ្មែរចំនួន៦៤ម៉ឺនរៀល ។ លុះមកដល់ថ្ងៃទី១៩ ធ្នូ ២០១៨ ជនរងគ្រោះរកលុយផ្ញើឲ្យជនសង្ស័យលែងបានក៏សម្រេចចិត្តទៅដាក់ពាក្យបណ្ដឹងនៅសមត្ថកិច្ចនគរបាលការិយាល័យព្រហ្មទណ្ឌកម្រិតស្រាលខេត្តកណ្តាល ដើម្បីឲ្យជួយស្រាវជ្រាវ និងស្វែងរកចាប់ខ្លួនជនកំហូចរូបនោះ ដើម្បីនាំយកមកចាត់ការតាមផ្លូវច្បាប់ ។
លទ្ធផលនូវការស្រាវជ្រាវនៅថ្ងៃទី២ មករា ឆ្នាំ២០១៩ សមត្ថកិច្ចនគរបាលជំនាញខេត្តកណ្តាល បានសហការជាមួយនគរបាលខេត្ដតាកែវឈានដល់ការឃាត់ខ្លួនជនសង្ស័យនៅចំណុច ផ្សារអង្គរកា ឃុំត្រពាំងធំខាងត្បូង ស្រុកត្រាំកក់ ។
ក្រោយពេលឃាត់ខ្លួនជនសង្ស័យឈ្មោះ ចេង មិត្ដ ក៏បានសារភាពដែរថា ខ្លួនពិតជាបានស្គាល់នារីរងគ្រោះទាំង២ តាមរយៈឆាតលេងហ្វេសប៊ុកជាមួយគ្នាប្រាកដមែន និងបន្ទាប់មកខ្លួនក៏បានលួងលោមជនរងគ្រោះឲ្យថតរូបអាក្រាតកាយផ្ញើឲ្យគ្នាមើលទៅវិញទៅមក ហើយក្រោយមកទៀតក៏បានទូរស័ព្ទទៅទាក់ទងគ្នាជាបន្ដបន្ទាប់ ថែមទាំងបានគំរាមឲ្យពួកនាងផ្ញើលុយមកឲ្យខ្លួនជាហូរហែ បើមិនដូច្នោះទេនឹងបង្ហោះរូបអាក្រាតកាយ របស់ជនរងគ្រោះ ទៅក្នុងបណ្ដាញសង្គមហ្វេសប៊ុក ដើម្បីផ្សព្វផ្សាយឲ្យមហាជនបានឃើញជាសាធារណៈ ។ ជនសង្ស័យត្រូវបានសមត្ថកិច្ច រៀបចំកសាងសំណុំរឿងបញ្ជូនទៅកាន់សាលាដំបូងខេត្ត តាមនីតិវិធី ៕
ចែករំលែកព័តមាននេះ