រាជធានីភ្នំពេញ ៖ តម្លៃប្រេងឥន្ធនៈនៅតាមស្ថានីយបានបន្ដធ្លាក់ចុះថែមទៀតនៅដើមឆ្នាំ២០១៩នេះ ។ យោងតាមសេចក្តីជូនដំណឹងរបស់ក្រសួងពាណិជ្ជកម្មបង្ហាញថា ថ្លៃលក់រាយប្រេងឥន្ធនៈសម្រាប់អនុវត្តចាប់ពីថ្ងៃទី១ ដល់១៥ខែមករា ឆ្នាំ២០១៩ បានចុះមកនៅត្រឹម៣.២០០រៀលក្នុង១លីត្រសម្រាប់សាំងធម្មតា និងប្រេងម៉ាស៊ូត ។
ការធ្លាក់ចុះនេះ បើតាមមន្ត្រីអ្នកនាំពាក្យក្រសួងពាណិជ្ជកម្មបានឲ្យដឹងថា ដោយសារតែតម្លៃប្រេងលើទីផ្សារពិភពលោកបន្តធ្លាក់ចុះ និងកត្តាមួយចំនួនទៀត។ ទន្ទឹមនឹងនេះ លោកក៏ចូលរួមអបអរផងដែរដែលប្រជាពលរដ្ឋទូទៅកំពុងទទួលបានប្រយោជន៍ពីការធ្លាក់ចុះនេះ ។
លោក ស៊ាង ថៃ មន្ត្រីអ្នកនាំពាក្យក្រសួងពាណិជ្ជកម្ម មានប្រសាសន៍ប្រាប់កោះសន្តិភាពកាលពីថ្ងៃទី២ មករា ២០១៩ ម្សិលមិញថា តម្លៃប្រេងសាំងធម្មតា និងប្រេងម៉ាស៊ូត បានបន្តធ្លាក់ពីជាង៤.០០០រៀលនៅអំឡុងខែតុលា ឆ្នាំ២០១៨ មកនៅត្រឹម៣.២០០រៀលក្នុង១លីត្រនៅដើមខែមករា ឆ្នាំ២០១៩នេះ ។
លោកបន្ដថា ការធ្លាក់ចុះនេះ ដោយសារតែតម្លៃប្រេងទីផ្សារពិភពលោកបន្ដធ្លាក់ចុះ និងការបែងចែកប្រេងទៅតាមតំបន់ ។ ឧទាហរណ៍ថា បើគេបែងចែកប្រេងទៅទីផ្សារអឺរ៉ុបច្រើន នោះប្រេងនៅអាស៊ីនឹងនៅតែថ្លៃ ។ យ៉ាងណាក៏ដោយ លោករីករាយដោយប្រជាពលរដ្ឋកម្ពុជាទទួលបានប្រយោជន៍រួមពីការធ្លាក់ចុះតម្លៃប្រេងឥន្ធនៈនាពេលនេះ ។
លោកលើកឡើងថា ៖« យើងដឹងហើយ ប្រេងឥន្ធនៈវាពាក់ព័ន្ធនឹងវិស័យទាំងអស់ វាមិនមែនប្រើប្រាស់សម្រាប់តែរថយន្ត ម៉ូតូ ឬគ្រឿងចក្រនោះទេ ដូច្នេះកាលណាប្រេងចុះថ្លៃ វានឹងធ្វើឱ្យផលិតកម្ម ឬការចំណាយលើសេវាផ្សេងៗ ធ្លាក់ចុះដែរ ហើយនេះវាបានផ្តល់ជាប្រយោជន៍ដល់ពលរដ្ឋទូទៅផ្អែកសេដ្ឋកិច្ច»។ លោកថា ៖« ខ្ញុំមានការរីករាយដោយមើលប្រជាពលរដ្ឋទទួលបានប្រយោជន៍ទូទៅ »។
ប្រធានសមាគមរួបរួមគ្នាអភិវឌ្ឍន៍កម្ពុជាលោក ឯ សុភាស់ បានបង្ហាញនូវក្ដីសប្បាយរីករាយ និងសាទរផងដែរចំពោះតម្លៃប្រេងឥន្ធនៈដែលកំពុងចុះថោកនេះ ព្រោះការធ្លាក់ថ្លៃនេះ វាចូលរួមផ្តល់ជាប្រយោជន៍ដល់ប្រជាពលរដ្ឋទូទៅ ពិសេសអ្នកប្រកបរបរសេដ្ឋកិច្ចក្រៅប្រព័ន្ធដូចជាក្រុមលោក ។
លោកបានឲ្យដឹងនៅថ្ងៃដដែលនេះថា ៖« វាជាឱកាសសម្រាប់ពលរដ្ឋ ពិសេសអ្នកប្រកបសេដ្ឋកិច្ចក្រៅប្រព័ន្ធដូចជាពួកយើងនេះ និងបានកាត់បន្ថយការចំណាយផ្សេងមួយចំនួន ដោយប្តូរមកវិញនូវការកើនឡើងនៃប្រាក់ចំណូល ហើយបើយើងអាចរក្សាបានតម្លៃប្រេងនៅលើទីផ្សារ៣.២០០រៀលក្នុង១លីត្រនេះមានរយៈពេលយូរអង្វែង យើងកាន់តែទទួលបានប្រយោជន៍ថែមទៀត »។
លោកបញ្ជាក់ថា ៖« ក្នុង១ថ្ងៃ អ្នកប្រកបរបររត់កង់បីដែលជាសមាជិករបស់សមាគមចំនួន២ម៉ឺននាក់ ត្រូវការប្រេងសាំងប្រមាណ៤ម៉ឺនលីត្រ ដោយក្នុង១គ្រឿងជាមធ្យមត្រូវការប្រេងសាំង២លីត្រសម្រាប់រកទទួលទានប្រចាំ ថ្ងៃ »។
បើតាមបញ្ជាក់ពីលោក ស៊ាង ថៃ តម្លៃប្រេងឥន្ធនៈនៅគ្រាបន្ទាប់ អាចនឹងបន្តធ្លាក់ចុះ ឬនៅទ្រឹងត្រឹម៣.២០០រៀលក្នុង១លីត្រ ។ ទោះបីយ៉ាងណា លោកថា ៖« យើងមិនទាន់ច្បាស់នៅឡើយទេ ទាល់តែ៥ឬ៦ថ្ងៃក្រោយ ទើបអាចមើលឃើញពីចរន្តនៃការប្រែប្រួល »។
ដោយឡែក តម្លៃប្រេងនៅទីផ្សារអន្តរជាតិវិញ គិតត្រឹមម៉ោង៥និង៤០នាទី ថ្ងៃទី២ មករា ម្សិលមិញ ប្រេងឆៅរបស់អង់គ្លេស(Brent)ធ្លាក់មកនៅត្រឹម៥៣,១៦ដុល្លារក្នុង១ធុង និងប្រេងសហរដ្ឋអាមេរិក (WTI) ធ្លាក់មកនៅត្រឹម៤៤,៨៧ដុល្លារក្នុង១ធុង ។
យោងតាមនាយកផ្នែកប្រេង និងឧស្ម័នប្រចាំអាស៊ីប៉ាស៊ីហ្វិកនៅ JP Morgan បានប្រាប់ដល់ភ្នាក់ងារសារព័ត៌មាន CNBC កាលពីថ្ងៃពុធ ថា ប្រសិនបើOPECមិនកាត់បន្ថយប្រេងប្រមាណ១,២លានធុងក្នុង១ថ្ងៃទេនោះ តម្លៃប្រេងអាចនឹងធ្លាក់ចុះទៀតឆ្នាំ២០១៩នេះ ។
លោក Scott Darling នាយកផ្នែកប្រេង និងឧស្ម័នរូបនេះបានបន្ដថា ៖« កត្តាដែលបន្តរក្សាតម្លៃប្រេងឲ្យនៅទាបក្នុងឆ្នាំ២០១៩ រួមមានការអន់ថយនៃតម្រូវការប្រេងឆៅ និងភាពមិនប្រាកដប្រជាលើការប្តេជ្ញារបស់សមាជិក OPEC ក្នុងការកាត់បន្ថយប្រេងប្រមាណ១,២លានធុងក្នុង១ថ្ងៃ »៕
ចែករំលែកព័តមាននេះ