លោកអឹុម ជីវ៉ា បានសម្រេចចិត្តសាងផ្នួសហើយ
- ភ្នំពេញ
រាជធានីភ្នំពេញ ៖ តារាសម្តែង និងពិធីករលោកអឹុិម ជីវ៉ា បានសម្រេចសាងផ្នួសហើយ។ លោកបួសកាលពីថ្ងៃទី៣ ខែមករា ឆ្នាំ២០១៩នៅវត្តនាគវ័ន្ត រាជធានីភ្នំពេញ…
រាជធានីភ្នំពេញ ៖ តារាសម្តែង និងពិធីករលោកអឹុិម ជីវ៉ា បានសម្រេចសាងផ្នួសហើយ។ លោកបួសកាលពីថ្ងៃទី៣ ខែមករា ឆ្នាំ២០១៩នៅវត្តនាគវ័ន្ត រាជធានីភ្នំពេញ ដោយប្រារព្ធពិធីទៅតាមបែបប្រពៃណីព្រះពុទ្ធសាសនាមានការដង្ហែនាគទៅបំបួសជាដើម ។
គោលបំណងដែលលោកសម្រេចចិត្តបួសនេះ លោកអឹុម ជីវ៉ា ថាគឺដើម្បីបំពេញតួនាទីជាកូនខ្មែរតាមទំនៀមទម្លាប់ព្រះពុទ្ធសាសនា និងដោយសារតែលោកធ្លាប់ជាកូនសិស្សលោករស់នៅដោយសារបាយបាត្រ រៀនសូត្រនៅវត្តនាគវ័ន្តតាំងពីតូច ។ ម្យ៉ាងទៀតដើម្បីសងគុណឪពុកម្តាយ និងអ្នកមានគុណ មនុស្ស ល្អៗដែលតែងតែជួយលោកទាំងប្រាក់កាស កម្លាំងចិត្ត និងជួយគ្រប់ប៉ែបយ៉ាងពេលលោកកំពុងលំបាកវេទនា ។
បើតាមលោកអឹុម ជីវ៉ា «ការបួសរបស់ខ្ញុំនាពេលនេះដែរ គឺដើម្បីលាមាត់លាពាក្យទាំងឡាយដែលខ្ញុំធ្លាប់និយាយទាំងអស់ និងសូមខមាលទោសចំពោះមនុស្សដែលខ្ញុំធ្លាប់ធ្វើខុសដោយប្រការណាមិនដឹងខ្លួន និងអភ័យទោសឲ្យចំពោះមនុស្សដែលធ្លាប់ធ្វើខុសលើខ្ញុំផងដែរ ។ ការបួសរបស់នេះទៀតសោត ក៏ជាការបួងសួងឲ្យប្រជាជនខ្មែរចេះស្រលាញ់និងសាមគ្គីគ្នាកាន់តែខ្លាំងឡើង និងសូមឲ្យប្រទេសយើងមានសុខសន្តិភាព ស្ថិរភាព មានការរីកចម្រើនរហូតក្រោមការដឹកនាំដ៏ត្រឹមត្រូវ និងឈ្លាសវៃប្រកបដោយគតិបណ្ឌិតរបស់ប្រមុខរាជរដ្ឋាភិបាលកម្ពុជាសម្តេចតេជោហ៊ុន សែន »។
ការបួសរបស់លោកអឹុម ជីវ៉ា នាពេលនេះមិនបានកំណត់ពេលវេលានឹងសឹកពេលណានោះឡើយ ។ ជាការកត់សម្គាល់ការសម្រេចចិត្តបួសរបស់តារាសម្តែងលោកអឹុម ជីវ៉ា នាពេលនេះគឺជាលើកទី២ហើយ ដោយលើកទី២កាលពីអំឡុងឆ្នាំ២០១២ ។
កន្លងមកក៏មានតារាមួយចំនួនទៀតបានបួសដែរ ដូចជាតារាចម្រៀងលោកឆោម ប៊ុនយ៉ុង ជាដើម ។ លោកឆោម ប៊ុនយ៉ុង បួសយូរជាងគេ រហូតមកដល់ពេលនេះនៅមិនទាន់សឹកនៅឡើយ ។ មហាជននិយាយថាការបួសសងគុណឳពុកម្តាយជាប្រការល្អមួយ មិនថាតារា ឬយុវជនទូទៅទេ ៕
ចែករំលែកព័តមាននេះ