ខេត្តមណ្ឌលគិរី ៖ បន្ទាប់ពីការរកឃើញទឹកជ្រោះថ្មីចំនួន១២ទីតាំងក្នុងដែនជម្រកការពារសត្វព្រៃណាមលៀរកន្លងទៅនេះ អភិបាលខេត្តមណ្ឌលគិរីបានជំរុញលើកទឹកចិត្តដល់បណ្តាអ្នកវិនិយោគលើវិស័យទេសចរណ៍ ចូលរួមសហការជាមួយអាជ្ញាធរមូលដ្ឋានដើម្បីកែប្រែតំបន់អេកូទេសចរណ៍ទាំងនោះ សម្រាប់ទាក់ទាញភ្ញៀវទេសចរជាតិ និងអន្តរជាតិទៅលេងកម្សាន្ត ។
ជួបជាមួយកោះសន្តិភាពកាលពីពេល ថ្មីៗកន្លងមកអភិបាលខេត្តលោកស្វាយ សំអ៊ាង ឲ្យដឹងថា«ពាក់ព័ន្ធនឹងសក្តានុពល ក៏ដូចជាតំបន់រមណីយដ្ឋានទេសចរណ៍ខេត្តមណ្ឌលគិរីរបស់យើងឃើញថា សម្បូរ…មានទឹកជ្រោះ មានតំបន់ទេសភាព វាជាកន្លែងមួយដែលកន្លងមកខ្ញុំតែងណែនាំទៅដល់មន្ទីរទេសចរណ៍ក៏ដូចជាអាជ្ញាធរដែលនៅមូលដ្ឋានឲ្យខិតខំការងារស្រាវជ្រាវរកមើលតំបន់ ទីតាំងរមណីយដ្ឋានានា ដើម្បីប្រមូលផ្តុំកត់ត្រា កំណត់ជាកន្លែងតំបន់រមណីយដ្ឋាន កន្លងមកខ្ញុំក៏បានជំរុញឲ្យអ្នកពាក់ព័ន្ធពង្រឹងដើម្បីទាក់ទាញអ្នកទេសចរណ៍» ។
លោកអភិបាលខេត្តបន្តថា«បន្ទាប់ពីយើងស្រាវជ្រាវឃើញនូវសក្កានុពលនេះហើយ ខ្ញុំក៏បានខិតខំឲ្យអាជ្ញាធរ និងជំនាញពាក់ព័ន្ធរិះរកមធ្យោបាយ ទី១-បញ្ហាផ្លូវ ទី២-ការរៀបចំកែទីតាំងជាក់ស្តែងឲ្យមានសោភ័ណភាព និងសេវាកម្មានានា…តាមរយៈការខិតខំច្នៃប្រឌិតនេះ មន្ទីរជំនាញត្រូវសហការគ្នាជាមួយអាជ្ញាធរមូលដ្ឋាន…ហើយកន្លែងខ្លះខេត្តក៏ចង់ឲ្យសហគមន៍មូលដ្ឋានគាត់សហការគ្នាដើម្បីរៀបចំតំបន់ហ្នឹង ជាកន្លែងមានផ្លូវចូល កន្លែងអង្គុយលេងឲ្យបានស្អាតក៏ជាការរួមចំណែកមួយ សម្រាប់ការពង្រីកតំបន់រមណីយដ្ឋានទេសចរណ៍របស់យើងថែមទៀត…» ។
លោកអភិបាលខេត្តឲ្យដឹងថាអាជ្ញាធរខេត្តក៏ដូចជាអាជ្ញាធរស្រុក នៅមិនទាន់មានលទ្ឋភាពគ្រប់គ្រាន់ក្នុងការអភិវឌ្ឍន៍ វិនិយោគតំបន់ទាំងនោះប្រែក្លាយទៅជាកន្លែងទេសចរណ៍ពេញសក្កានុពលបានទេ មានតែតាមរយៈការចូលរួមចំណែកពីគ្រប់ភាគីពាក់ព័ន្ធ…។ ខេត្តក៏ទុកឱកាសសម្រាប់ក្រុមហ៊ុនវិនិយោគណាដែលចាប់អារម្មណ៍អាចចរចា ពិភាក្សាជាមួយអាជ្ញាធរខេត្ត ជំនាញពាក់ព័ន្ធ ដើម្បីស្នើសុំទីតាំងធ្វើវិនិយោគតាមគោលការណ៍ច្បាប់ ។
បើតាមការឲ្យដឹងពីលោកវុធ សារុំ នាយកដែនជម្រកសត្វព្រៃណាមលៀរថាមន្ត្រីឧទ្យានុរក្សបានសហការមួយអង្គការCEDT និងសហគមន៍ចំនួន២រុករកតំបន់ទឹកធ្លាក់ តំបន់ដាំឫស្សី និងតំបន់អភិរក្សសត្វឃ្មុំ នៅដីសហគមន៍ពូត្រែងនិងពូឡេះ កាលពីដើមខែវិច្ឆិកា ឆ្នាំ២០១៨ ។ ជាលទ្ធផលបានរកឃើញទឹកធ្លាក់ចំនួន១២កន្លែង តែមិនទាន់កំណត់ឈ្មោះទេ ។
លោកវុធ សារុំ បញ្ជាក់ថា«ទឹកជ្រោះដែលធ្លាក់ទឹកស្អាតមានចំនួន២កន្លែង គឺទឹកជ្រោះរនៀល និងទឹជ្រោះកប៉ាល់ ដែលមានលេខនិយាមកា៧៥៩២៣៨-១៣៧២១៨៨ និង៧៥៨៩៤១-១៣៧៣៤៩០ ស្ថិតនៅភូមិពូឡេះ ឃុំដាក់ដាំ ស្រុកអូររាំង ខេត្តមណ្ឌលគិរី» ។
ចំនួនទឹកជ្រោះនៅក្នុងខេត្តមណ្ឌលគិរីមានចំនួនសរុបប៉ុន្មាន លោកងិន សុវិមាន ប្រធានមន្ទីរទេសចរណ៍ខេត្តមិនបានឆ្លើយតបជាមួយអ្នកយកព័ត៌មានកោះសន្តិភាពទេ…ប្រហែលលោកមិនបានជ្រាបពីចំនួនពិតប្រាកដនៃវត្តមានទឹកជ្រោះក្នុងដែនដីគ្រប់គ្រងរបស់ខ្លួនឡើយ ។
យោងទៅលើព័ត៌មានដែលកោះសន្តិភាពទទួលបានក្នុងខេត្តមណ្ឌលគិរី មានទឹកជ្រោះដូចជា ទឹកជ្រោះប៊ូស្រា ទឹកជ្រោះដំណាក់ស្តេច ទឹកជ្រោះរមនា១ ទឹកជ្រោះរមនា២ ទឹកជ្រោះជ្រៃធំ ទឹកជ្រោះជ្រៃយស ទឹកជ្រោះលែងអងឡែងឃិន ទឹកជ្រោះក្បាលព្រះ …។
លោកកែវ សុភគ៌ ប្រធានមន្ទីរបរិស្ថានខេត្តមណ្ឌលគិរីឲ្យដឹងថា«វិសាលភាពធនធានធម្មជាតិលើទឹកដីខេត្តមណ្ឌលគិរីមានទំហំធំធេងលាតសន្ឋឹកពេញផ្ទៃខេត្តដល់ទៅចំនួន៩៤៣.៦៩៥ហិកតា ដោយក្នុងនោះខេត្តមានដែនជម្រកការពារសត្វព្រៃចំនួន៥ គ្រប់គ្រងដោយមន្ទីរបរិស្ថាន មានដូចជា ដែនជម្រកសត្វព្រៃកែវសីមាមានផ្ទៃដីទំហំ ២៩២ .៦៩០ហិកតា ។ ដែនជម្រកសត្វព្រៃភ្នំព្រេចទំហំផ្ទៃដី ២២២.៥០០ ហិកតា ដែនជម្រកសត្វព្រៃលំផាត់ទំហំផ្ទៃដី ៤៨ ៣៧៤ ហិកតា ដែនជម្រកសត្វព្រៃស្រែពកផ្ទៃដីទំហំ៣៥៨.១៩៨ ហិកតា ដែនជម្រកសត្វព្រៃភ្នំណាមលៀរ មានផ្ទៃដី ២១.៩៣៣ហិកតា ។
កាលពីថ្ងៃទី២ ខែធ្នូ ឆ្នាំ២០១៨ ក្រសួងបរិស្ថានបានចាត់មន្ត្រីជំនាញរបស់ខ្លួនចុះបំពេញពិនិត្យសិក្សាទីតាំងជាក់ស្តែងជាមួយអាជ្ញាធរខេត្តមណ្ឌលគិរី លើករណីស្នើសុំវិនិយោគអភិវឌ្ឍទេសចរណ៍ធម្មជាតិ ទំហំផ្ទៃដីមិនលើសពី១០ហិចតា ស្ថិតនៅចំណុចទឹកធ្លាក់ក្បាលព្រះ ភូមិពូត្រុំ សង្កាត់មនោរម្យ ខេត្តមណ្ឌលគិរី ក្នុងដែនជម្រកសត្វព្រៃកែវសីមា ។
គម្រោងដែលក្រសួងបរិស្ថានកំពុងពិនិត្យវាយតម្លៃនោះមានចំនួន៤គម្រោងវិនិយោគលើផ្ទៃដីសរុប៤០ហិកតា ។ ប្រសិនគម្រោងនេះទទួលបានជោគជ័យគេរំពឹងថា ប្រជាពលរដ្ឋក្នុងតំបន់នោះនឹងទទួលបានអត្ថប្រយោជន៍ច្រើនពីការអភិវឌ្ឍជាក់ស្តែង ព្រោះទឹកធ្លាក់ក្បាលព្រះ មានទេសភាពស្អាតមិនចាញ់ទឹកជ្រោះប៊ូស្រាទេ ប្រាកដជាទាក់ទាញអ្នកទេសចរបានច្រើននាពេលអនាគត ៕
ចែករំលែកព័តមាននេះ