ខេត្តសៀមរាប ៖ សមត្ថកិច្ចចម្រុះនៃស្នការនគរបាលខេត្តដឹកនាំកម្លាំងដោយលោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផ្នែកកណ្តាលព្រហ្មទណ្ឌនៃស្នងការនគរបាលខេត្ត បានចុះបង្ក្រាបករណីឆក់កាបូបរបស់ភ្ញៀវស្ត្រីជនជាតិបារាំងម្នាក់នៅម្តុំផ្សារដីហុយ ហើយប្រមាញ់ចាប់បានជនសង្ស័យទាំង២នាក់នៅម្តុំមុខស្ថានីយ៍ប្រេងឥន្ទនៈតូតាល់ ក្នុងក្រុងសៀមរាប ។…
ខេត្តសៀមរាប ៖ សមត្ថកិច្ចចម្រុះនៃស្នការនគរបាលខេត្តដឹកនាំកម្លាំងដោយលោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផ្នែកកណ្តាលព្រហ្មទណ្ឌនៃស្នងការនគរបាលខេត្ត បានចុះបង្ក្រាបករណីឆក់កាបូបរបស់ភ្ញៀវស្ត្រីជនជាតិបារាំងម្នាក់នៅម្តុំផ្សារដីហុយ ហើយប្រមាញ់ចាប់បានជនសង្ស័យទាំង២នាក់នៅម្តុំមុខស្ថានីយ៍ប្រេងឥន្ទនៈតូតាល់ ក្នុងក្រុងសៀមរាប ។ ហេតុការឃាត់ក្រុមឆក់ភ្ញៀវនេះកើតឡើងនៅយប់ ថ្ងៃទី២ ខែមករា ឆ្នាំ២០១៩ ស្ថិតនៅចំណុចម្តុំ មុខស្ថានីយ៍ប្រេងឥន្ទនៈ តូតាល់ ក្នុងភូមិចុងកៅស៊ូ សង្កាត់ស្លក្រាម ក្រុងសៀមរាប ។
លោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផែនកណ្តាលនគរបាលយុត្តិធម៌នៃស្នងការនគរបាលខេត្តសៀមរាបបានប្រាប់ថា ជនសង្ស័យដែលសមត្ថកិច្ចយើងឃាត់ខ្លួនបានទាំង២នាក់នោះមានទី១-ឈ្មោះ យ៉េប អារ៉ូហ្វីន ភេទប្រុស អាយុ១៩ឆ្នាំ មានទីលំនៅភូមិទស្សិណត្បូង សង្កាត់គោកចក ក្រុង-ខេត្តសៀមរាប និងទី២-ឈ្មោះ សាវិន វណ្ណារ៉ាត់ ភេទប្រុស អាយុ១៨ឆ្នាំ មានទីលំនៅភូមិមណ្ឌល៣ សង្កាត់ស្លក្រាម ក្រុង-ខេត្តសៀមរាប ពីបទលួចមានស្ថានទម្ងន់ទោស(ឆក់ភ្ញៀវទេសចរណ៍) ។
លោកបានបញ្ជាក់ថា កាលពីវេលាម៉ោង០៨និង០០នាទីយប់ ថ្ងៃទី០២ ខែមករា ឆ្នាំ២០១៩ ភ្ញៀវទេសចរណ៍ជនជាតិបារាំឈ្មោះ MULRiEL SERRADELL ភេទស្រី អាយុ៦២ឆ្នាំ កំពុងដើរលេងនៅម្តុំផ្សារដីហុយ ស្ថិតនៅក្នុងភូមិវត្តដំណាក់ សង្កាត់សាលាកំរើក ក្រុង-ខេត្តសៀមរាប ពេលជាមួយគ្នានោះមានជនសង្ស័យ២នាក់ខាងលើជិះម៉ូតូ Scoopy ពណ៌សបិតស្គុតព៌ណទឹកមាស ស៊េរីឆ្នាំ២០១៨ បានធ្វើសកម្មភាពឆក់កាបូបស្ត្រីជនជាតិបារាំងខាងលើបានកាបូបស្ពាយពណ៌ប្រផេះមួយនៅក្នុងនោះមានទូរស័ព្ទដៃម៉ាកសាំស៊ុងមួយគ្រឿង លិខិឆ្លងដែនមួយ វីសាកាតមួយ លុយអឺរ៉ូ៣០៥អឺរ៉ូ លុយកូរ៉េ១១០០០វ៉ុន លុយដុល្លារ៤០ដុល្លារ និងសម្ភារមួយចំនួន ។
ពេលធ្វើសកម្មភាពរួចហើយជិះគេចទៅទិសខាងជើងភ្លាមៗនោះកម្លាំងល្បាតពួនស្ទាក់ និងកម្លាំងឈរជើងលើដងផ្លូវមានកម្លាំងការិយាល័យព្រហ្មទណ្ឌកម្រិតស្រាលកម្លាំងការិយាល័យចរាចរផ្លូវគោកកម្លាំងការិយាល័យការពារ និងអន្តរាគមបានប្រដេញស្ទាក់ចាប់បានជនសង្ស័យទាំងពីរនាក់ខាងលើ និងដកហូតវត្ថុតាងដែលឆក់បានប្រគល់អោយជនរងគ្រោះវិញ ។
ក្រោយកម្លាំងចម្រុះបានឃាត់ខ្លួនបានជនទាំង២បានសារភាពថា ពួកគេពិតជាបានឆក់ទ្រព្យសម្បត្តិរបស់ស្ត្រីជនជាតិបារាំងពិតប្រាកដមែន ហើយជនសង្ស័យទាំង២នាក់ត្រូវបានកម្លាំងជំនាញយកមកធ្វើតេស្តឃើញមានសារធាតុញៀនផងដែរ ។
បច្ចុប្បន្នជនសង្ស័យទាំង២នាក់ត្រូវបានកម្លាំងជំនាញរៀបចំកសាងសំណុំរឿងបញ្ជូនខ្លួនទៅតុលាការខេត្តដើម្បីចាត់ការទៅតាមនីតិវីច្បាប់ ។ ចំណែកទ្រព្យសម្បត្តិដែលជនសង្ស័យទាំង២នាក់ឆក់បានត្រូវបានប្រគល់ជូនម្ចាស់វិញ ៕
ចែករំលែកព័តមាននេះ