រាជធានីភ្នំពេញ ៖ មន្ទីរពេទ្យជោរៃភ្នំពេញមានទីតាំងស្ថិតនៅក្នុងសង្កាត់និរោធ ខណ្ឌមានជ័យ ដែលបើកការដ្ឋានស្ថាបនា កាលពីថ្ងៃទី១៥ ឧសភា ឆ្នាំ២០១០ ក្រោមអធិបតីភាពដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នោះ ពេលនេះស្ថាបនាបាន៩០ភាគរយហើយ នៅសល់តែការតុបតែង និងបោសសម្អាតដែលគ្រោងសម្ពោធបើកឱ្យដំណើរការជំហានដំបូងចំនួន២០០គ្រែនៅអំឡុងខែកញ្ញា ឆ្នាំ២០១៣ ខាងមុខនេះ ។
នៅព្រឹកថ្ងៃទី១៤ កក្កដា ឆ្នាំ២០១៣ គណៈប្រតិភូទីក្រុងហូជីមិញដឹកនាំដោយលោកឡេ ថាញ់ហាយ សមាជិកការិយាល័យនយោបាយមជ្ឈិមបក្សកុម្មុយនីស្តវៀតណាម និងជាលេខាបក្សទីក្រុងហូជីមិញ អមដំណើរដោយលោកកែប ជុតិមា ប្រធានគណបក្សប្រជាជនរាជធានីភ្នំពេញ និងមន្ត្រីពាក់ព័ន្ធជាច្រើនរូបទៀត បានអញ្ជើញទៅពិនិត្យមើលសំណង់មន្ទីរពេទ្យជោរៃដែលកំពុងដំណើរការសាងសង់យ៉ាងមមាញឹក ។
បុគ្គលិកផ្នែកសំណង់អគារមន្ទីរពេទ្យខាងលើបានឱ្យដឹងថា ពេលនេះការស្ថាបនាអគារមន្ទីរពេទ្យជោរៃភ្នំពេញសម្រេចបានប្រមាណ៩០ភាគរយហើយ ដែលគ្រោងបញ្ចប់ឱ្យរួចរាល់នៅអំឡុងខែសីហា ឆ្នាំ២០១៣ និងបើកដំណើរការនៅខែកញ្ញាខាងមុខ ដោយមានក្រុមវេជ្ជបណ្ឌិតទាំងខ្មែរ និងវៀតណាមចំនួន១៨២នាក់ត្រូវចូលបម្រើការងារក្នុងមន្ទីរពេទ្យនេះ ។
ក្រុមគ្រូពេទ្យទាំងនោះបានទៅសិក្សាឯកទេសផ្នែកវេជ្ជសាស្ត្រនៅសាកលវិទ្យាល័យវេជ្ជសាស្ត្រទីក្រុងហាណូយ សាធារណរដ្ឋសង្គមនិយមវៀតណាមរយៈពេល៣ឆ្នាំ និងសិក្សាបន្តនៅទីក្រុងហូជីមិញរយៈពេល១ឆ្នាំទៀត ។ ចំណែកឯបុគ្គលិកមន្ទីរពេទ្យបានឱ្យដឹងថា ការស្ថាបនាជំហានដំបូងនេះមានបីអគារកម្ពស់៥ជាន់ និងមានគ្រែចំនួន២០០ ទទួលការព្យាបាលជំងឺលើឯកទេសចំនួន៣៤គឺគ្រប់ផ្នែកនៃរាងកាយរបស់មនុស្សតែម្តង ដោយទទួលព្យាបាលជំងឺទូទៅដូចនៅមន្ទីរពេទ្យជោរៃឯប្រទេសវៀតណាមដែរ ។ ដំណាក់កាលទី២នឹងដំណើរការចំនួន៣០០គ្រែបន្ថែមទៀតឱ្យគ្រប់៥០០គ្រែ ។
មន្ទីរពេទ្យជោរៃភ្នំពេញនេះមានលក្ខណៈទំនើប ដំបូលអគារអាចចុះឧទ្ធម្ភាគចក្របាន ជណ្តើរយន្តមានពីរប្រភេទ មួយសម្រាប់អ្នកជំងឺ ឬអ្នកទៅថែទាំអ្នកជំងឹ និងបុគ្គលិកធម្មតា និងមួយទៀតសម្រាប់អ្នកជំងឺធ្ងន់ ឬប្រកាច់ប្រកិនដោយមិនអាចឱ្យជំងឺរើបម្រះបាន ។ បុគ្គលិករូបនេះបានបញ្ជាក់ថា បច្ចុប្បន្នមន្ទីរពេទ្យបានបណ្តុះបណ្តាលវេជ្ជបណ្ឌិតបន្ថែមនៅប្រទេសវៀតណាម និងគិលានុបដ្ឋាយិកាសរុប១៨២នាក់ ក្នុងនោះមានខ្មែរ១០០នាក់ ។
អ្វីដែលជាការកត់សម្គាល់ទៀតនោះ គឺមន្ទីរពេទ្យជោរៃនេះមានការពិនិត្យព្យាបាល និងកែសម្ផស្សគ្រប់ប្រភេទផងដែរ ព្រមទាំងមានការស្ថាបនាអគារសម្រាប់ស្នាក់នៅរបស់អ្នកជំងឺ ឬអ្នកថែទាំអ្នកជំងឺ (ប្រហាក់ប្រហែលសណ្ឋាគារ)នៅពេលឆាប់ៗខាងមុខទៀតផង ។ នៅក្នុងឱកាសនោះ លោកឡេ ថាញ់ហាយ មានប្រសាសន៍ថា មន្ទីរពេទ្យជោរៃភ្នំពេញ គឺជាសក្ខីភាពនៃលទ្ធផលកិច្ចសហប្រតិបត្តិការរវាងទីក្រុងហូជីមិញនិងរាជធានីភ្នំពេញ ក្នុងនាមជាទីក្រុងសម្ព័ន្ធភាពនឹងគ្នា ។
យើងបានរួមគ្នាដោះស្រាយរាល់ការលំបាកនានា ដើម្បីឱ្យដំណើរការសាងសង់មន្ទីរពេទ្យជោរៃភ្នំពេញនេះបានចេញជារូបរាងដោយគ្រោងចំណាយថវិកា៤៧លានដុល្លារសហរដ្ឋអាមេរិក ។ លោកឡេ ថាញ់ហាយ បានបញ្ជាក់ថា មន្ទីរពេទ្យជោរៃជាមន្ទីរពេទ្យមានឈ្មោះបោះសំឡេងយូរមកហើយ ដូច្នេះមន្ទីរពេទ្យជោរៃថ្មីនេះត្រូវតែល្អប្រកបដោយគុណភាពក្នុងការព្យាបាលជំងឺជូនប្រជាពលរដ្ឋកម្ពុជា ៕
ចែករំលែកព័តមាននេះ