ខេត្តកំពង់ចាម ៖ តាមសេចក្តីរាយការណ៍បឋមបានឲ្យដឹងថា ប្រជាពលរដ្ឋប្រមាណ២០០គ្រួសារបានគ្នាធ្វើដំណើរតាមរថយន្ត៣គ្រឿងមកពីភូមិ អ៊ក ទៀង ឃុំសាំងក្រាំង ស្រុកបាធាយណ៍ បាននាំគ្នាមកកាន់សាលាដំបូងខេត្ត ដើម្បីទាមទារកុំឲ្យជនខិតខួចលក់ដីមេទឹក សម្រាប់ធ្វើស្រែប្រាំង ដែលមានទំហំ២៦ហិកតា សុំឲ្យតុលាការជួយរកយុត្តិធម៌ ។
សេចក្តីរាយការណ៍បានបន្តថា លោកយន់ សារឹម អាយុ៦៨ឆ្នាំ តំណាងឲ្យប្រជាពលរដ្ឋបានមានប្រសាសន៍នៅថ្ងៃទី០៣ ខែមករានេះថា មេទឹកខាងលើត្រូវបានមនុស្សចំនួន៣នាក់ បានលួចលក់ដោយស្ងាត់ៗហើយយកលុយមកចែកជួនប្រជាពលរដ្ឋ ដោយក្នុងម្នាក់ៗទទួលបានចំនួន៤០០ដុល្លារ ទើបបង្កឲ្យមានការភ្ញាក់ផ្អើល រួចក៏នាំគ្នាមកដាក់ពាក្យបណ្តឹងនៅអធិកាដ្ឋាននគរបាលស្រុកបារាយណ៍ដើម្បីជួយអន្តរាគមន៍ដោះស្រាយ ។
តំណាងពលរដ្ឋដដែលបានបន្តថា ដោយសារតែការមិនមានការយកចិត្តទុកដាក់គាត់ក៏លើកគ្នាមកកាន់សាលាដំបូងខេត្ត ហើយនៅរសៀលថ្ងៃទី០៣ ខែនេះដើម្បីដាក់មេដៃបន្ថែម ឲ្យប្រធានសាលាដំបូងខេត្តជួយរកយុត្តិធម៌ ។
សូមបញ្ជាក់ថា មេទឹកនោះបានផ្តល់អត្ថប្រយោជន៍ជាច្រើនដល់ប្រជាពលរដ្ឋ៤៥០គ្រួសារ សម្រាប់ស្រោចស្រពដំណាំស្រូវប្រាំង ។
តំណាងប្រជាពលរដ្ឋបានសំណូមពរចុងក្រោយ សូមឲ្យតុលាការជួយរក្សាមេទឹក នៅដដែលមិនឲ្យធ្លាក់ក្នុងដៃឈ្មួញណាម្នាក់ឡើយ ។ ប្រសិនបើមិនមានមេទឹកនេះ ពលរដ្ឋច្បាស់ជាពិបាកមិនខានឡើយ ៕
ចែករំលែកព័តមាននេះ