ខេត្តតាកែវ ៖ រថយន្តឡិចស៊ីសទំនើបមួយគ្រឿងបើកបុកវិមានឯករាជ្យទាំងកំរោលក្រឡាប់បះជើងបណ្ដាលអោយម្ចាស់រងរបួសយ៉ាងដំណំ ដែលហេតុការណ៍គ្រោះថ្នាក់ចរាចរណ៍បើករថយន្តបុកខឿនវិមានឯករាជ្យខេត្តតាកែវដោយខ្លួនឯងនេះបានកើតឡើងនៅវេលាម៉ោង០១និង០០នាទីយប់រំលងអធ្រាត្រឈានចូល ថ្ងៃទី០៣ ខែមករា ឆ្នាំ២០១៩ ស្ថិតនៅលើកំណាត់ផ្លូវជាតិលេខ២ ចន្លោះគីឡូម៉ែត្រលេខ៧៧-៧៨ ស្ថិតនៅភូមិ០៣ សង្កាត់រកាក្នុង ក្រុងដូនកែវ ខេត្តតាកែវ ។
ប៉ូលិសក្រុងដូនកែវបានអោយដឹងថា រថយន្តបង្កហេតុម៉ាកឡិចស៊ីស RX-330 គ្មានផ្លាកលេខដែលបើកបរដោយឈ្មោះ ហេង សៅបុរី ភេទប្រុស អាយុ៤១ឆ្នាំ មុខរបរអ្នកលក់ដូរ រងរបួសធ្ងន់ និងអ្នករួមដំណើរម្នាក់ឈ្មោះ ស៊ឹម សុឃុន ភេទស្រី អាយុ៣១ឆ្នាំ មុខរបរអ្នកលក់ដូរ រងរបួសស្រាល ដែលទាំងពីរនាក់រស់នៅភូមិស្នោរ សង្កាត់រកាក្នុង ក្រុងដូនកែវ ខេត្តតាកែវ ។
មុនពេលកើតហេតុគេឃើញរថយន្តទំនើបខាងលើបានបើកក្នុងល្បឿនយ៉ាងលឿនតាមផ្លូវជាច្រើននៅក្នុងក្រុង លុះមកដល់វិមានឯករាជ្យកណ្ដាលក្រុងដូនកែវក៏បុកខឿនវិមានឯករាជ្យក្រឡាប់ផ្ញាជើងតែម្ដង ។
សមត្ថកិច្ចបានបន្ថែមថា គ្រោះថ្នាក់ចរាចរណ៏គឺបណ្ដាលមកពីអ្នកបើកបរក្នុងភាពស្រវឹង ហើយក្រោយកើតហេតុសមត្ថកិច្ចជំនាញក្រុងដូនកែវបានចុះធ្វើកំណត់ហេតុ និងយករថយន្តបង្កទៅរក្សាទុកនៅអធិការដ្ឋាននគរបាលក្រុងដូនកែវដើម្បីរង់ចាំដោះស្រាយនៅពេលក្រោយ ៕
ចែករំលែកព័តមាននេះ