ខេត្តព្រះសីហនុ ៖ យ៉ាងហោចណាស់ប្រុស-ស្រីប្រមាណជាង១០នាក់បានរងរបួសធ្ងន់ ស្រាល និងម្នាក់បានស្លាប់យ៉ាងអាណោចអាធ័មនៅនឹងកន្លែង បន្ទាប់ពីត្រូវបានរថយន្តដឹកខ្សាច់ចំណុះ៣តោនបុករះពេលបើកចុះចំណោត កាលពីវេលាម៉ោង១២ និង៣០នាទីថ្ងៃត្រង់ថ្ងៃទី២ មករា នៅចំណុចផ្លូវចំណោតកាត់វត្តលើស្ថិតក្នុងសង្កាត់លេខ២…
ខេត្តព្រះសីហនុ ៖ យ៉ាងហោចណាស់ប្រុស-ស្រីប្រមាណជាង១០នាក់បានរងរបួសធ្ងន់ ស្រាល និងម្នាក់បានស្លាប់យ៉ាងអាណោចអាធ័មនៅនឹងកន្លែង បន្ទាប់ពីត្រូវបានរថយន្តដឹកខ្សាច់ចំណុះ៣តោនបុករះពេលបើកចុះចំណោត កាលពីវេលាម៉ោង១២ និង៣០នាទីថ្ងៃត្រង់ថ្ងៃទី២ មករា នៅចំណុចផ្លូវចំណោតកាត់វត្តលើស្ថិតក្នុងសង្កាត់លេខ២ ក្រុងព្រះសីហនុ ។
យោងតាមប្រភពពីលោកឧត្តមសេនីយ៍ អុី សុខា ស្នងការរងទទួលសណ្តាប់ធ្នាប់នៃស្នងការដ្ឋាននគរបាលខេត្តបានឱ្យដឹងថា នៅវេលាម៉ោង១២ និង៣០នាទីថ្ងៃត្រង់ថ្ងៃទី២ មករា ឆ្នាំ២០១៩ នៅចំណុចចំណោតផ្លូវកាត់វត្តលើ ស្ថិតក្នុងសង្កាត់លេខ២ ក្រុងព្រះសីហនុ មានគ្រោះថ្នាក់ចរាចរណ៍ដ៏រន្ធត់មួយ ដែលបង្កឡើងដោយរថយន្តដឹកខ្សាច់មួយគ្រឿង បានបុករះទៅលើរថយន្តម៉ូតូនិងរថយន្តច្នៃមួយគ្រឿង បណ្តាលឱ្យមនុស្សជាង១០នាក់ បានរងរបួសធ្ងន់ ស្រាល និងម្នាក់ស្លាប់នៅនឹងកន្លែង ។ នេះបើយោងតាមតួលេខបឋមនៅកន្លែងកើតហេតុ ប៉ុន្តែភ្លាមនោះ ត្រូវបានរថយន្តឯកជន និងមន្ទីរពេទ្យបង្អែកចំការចេក ចំនួន៣គ្រឿង បានមកដឹកយកទៅសង្គ្រោះបន្ទាន់ភ្លាមៗផងដែរ ។
លោកឧត្តមសេនីយ៍ អុី សុខា ស្នងការរងបានបន្តថា ចំពោះអត្តសញ្ញាណអ្នកស្លាប់ និងអ្នករងរបួស គិតមកដល់ត្រឹមម៉ោង១ និង១០នាទីថ្ងៃដដែល គេនៅពុំទាន់ស្គាល់អស់នៅឡើយទេ ព្រោះជនរងគ្រោះត្រូវបានដឹកចេញទៅសង្គ្រោះនៅមន្ទីពេទ្យផ្សេងគ្នាចំនួន៣ ។
ដោយឡែក ចំពោះមូលហេតុដែលបណ្តាលឱ្យមានគ្រោះថ្នាក់ចរាចរណ៍នេះ គឺដោយសារតែរថយន្តដឹកខ្សាច់ចំណុះ៣តោន ពណ៌គ្រាប់អំពិល ពាក់ស្លាកលេខ KPS 0576 បើកបរដោយបុរសម្នាក់ បើកចុះចំណោតផ្លូវបេតុងដែលហាមឃាត់ ក៏បានបុករះរថយន្តច្នៃមួយគ្រឿង ពណ៌ប្រផេះ ពាក់ស្លាកលេខភ្នំពេញ 2C-8434 ក្នុងទិសដៅបញ្ច្រាសគ្នា ដែលផ្ទុកមនុស្សជាច្រើននាក់ រួចបន្តទៅបុកកម្មករសំណង់ជនជាតិចិនដែលនៅក្បែរនោះ និងបន្តទៅបុកម៉ូតូមួយគ្រឿងទៀត ម៉ាកហុងដា ធុនសេ១២៥ ពណ៌ខ្មៅ ពាក់ស្លាកលេខព្រះសីហនុ 1D 1703 ជិះគ្នាចំនួន២នាក់ (បញ្ច្រាសទិស) បណ្តាលឱ្យបាត់បង់ជិវិតអ្នកបើកម៉ូតូម្នាក់នៅនឹងកន្លែង ។
លោកឧត្តមសេនីយ៍ អុី សុខា ស្នងការរង ក៏បានបញ្ជាក់ផងដែរថា ចំណុចផ្លូវបេតុងនេះ សមត្ថកិច្ចជំនាញបានសហការជាមួយមន្ទីរសាធារណការ និងដឹកជញ្ជូនខេត្ត ដាក់រនាំងហាមឃាត់រថយន្តមានកម្ពស់លើសពី២,៥០ម៉ែត្រចុះបើកបរលើផ្លូវនេះ ។ ដោយសារតែរថយន្តដឹកខ្សាច់នេះ បានកាច់ចង្កូតបើកវាងរនាំងហាម ឃាត់ហើយចុះតាមផ្លូវនេះ ដែលជាផ្លូវចំណោតខ្លាំង ទើបបណ្តាលឱ្យមានគ្រោះថ្នាក់តែម្តង ។
លោកថ្លែងថា ដើម្បីបញ្ចៀសនូវហេតុការណ៍អាក្រក់បែបនេះទៀត ក្នុងនាមលោកជាមន្ត្រីជំនាញ សូមអំពាវ នាវហើយអំពាវនាវទៀត ដល់ម្ចាស់ក្រុមហ៊ុនដឹកទំនិញទាំងអស់ ក៏ដូចជាបងប្អូនប្រជាពលរដ្ឋទាំងអស់ សូមមេត្តារួមគ្នាគោរពច្បាប់ មិនថានៅចំណុចកើតហេតុនេះទេ គឺឱ្យតែនៅលើដងផ្លូវ ត្រូវចេះយោគយល់គ្នា អធ្យាស្រ័យគ្នា ប្រកាន់ច្បាប់ជាគោល ទើបគេចផុតពីគ្រោះថ្នាក់ជាយថាហេតុ ។ តាមប្រភពព័ត៌មានថា អ្នកបើករថយន្តដឹកខ្សាច់ក្រោយកើតហេតុបុករះ ក៏បានដាក់សាប៊ូគូទរត់គេចខ្លួនបាត់ ៕
ចែករំលែកព័តមាននេះ