ខេត្តកំពង់ធំ ៖ បុរសម្នាក់បានចងកសម្លាប់ខ្លួន បង្កឲ្យមានការភ្ញាក់ផ្អើលកើតឡើងកាលពីវេលាម៉ោង៥និង១០នាទីល្ងាចថ្ងៃទី២ ខែមករា ឆ្នាំ២០១៩ នៅភូមិខ្សាច់ជីរស់ ឃុំកំពង់គោ ស្រុកកំពង់ស្វាយ ខេត្តកំពង់ធំ។…
ខេត្តកំពង់ធំ ៖ បុរសម្នាក់បានចងកសម្លាប់ខ្លួន បង្កឲ្យមានការភ្ញាក់ផ្អើលកើតឡើងកាលពីវេលាម៉ោង៥និង១០នាទីល្ងាចថ្ងៃទី២ ខែមករា ឆ្នាំ២០១៩ នៅភូមិខ្សាច់ជីរស់ ឃុំកំពង់គោ ស្រុកកំពង់ស្វាយ ខេត្តកំពង់ធំ។
លោកវរសេនីយ៍ឯក ខេន ឈុនគ័រ អធិការនគរបាលស្រុកកំពង់ស្វាយបានឲ្យដឹងថា ជនរងគ្រោះដែលស្លាប់ឈ្មោះ ធី ចាន់ណេង ភេទប្រុស អាយុ២២ឆ្នាំ មានមុខរបរជាកសិករ រស់ក្នុងនៅភូមិ ឃុំកើតហេតុខាងលើ ។
លោកអធិការបន្តថា បើយោងតាមការបំភ្លឺរបស់ប្រពន្ធជនរងគ្រោះឈ្មោះ ឌឿន ស្រីនាម អាយុ ២៣ឆ្នាំ បាននិយាយថា កាលពី២ទៅ៣ថ្ងៃមុនពេលកើតហេតុនោះ ប្តីរបស់គាត់មានសភាពខុសពីធម្មតា ដោយមុខខ្មៅៗហើយចេះតែដើរផឹកស្រា ។
ប្រភពដដែលបានបន្តថា ជាក់ស្តែងកាលពីវេលាម៉ោង៣និង២០នាទីរសៀលថ្ងៃទី២ មករា ២០១៩ ប្តីបានសុំលុយគាត់ចំនួន១០ម៉ឺនរៀល គាត់ក៏ឲ្យលុយទៅប្តី ហើយប្តីរបស់គាត់និយាយថា «លាសិនហើយ» ឮដូច្នេះ គាត់នឹកស្មានថា ប្តីសុំលុយយកទៅផឹកស៊ីនោះទេ មិននឹកស្មានថា ប្តីយកលុយទៅផឹកស្រារួចធ្វើអត្តឃាតដោយចងកសម្លាប់ខ្លួនបែបនេះឡើយ ។
លុះដល់ល្ងាចមិនឃើញប្តីមកផ្ទះវិញ ក៏នាំគ្នាចេញទៅតាមរកដល់ត្រង់ចំណុចបឹងបត់ដៃតំបន់ឡស្រងៀម ក្នុងភូមិខ្សាច់ជីរស់ ឃុំកំពង់គោ ស្រុកកំពង់ស្វាយ ក៏ប្រទះឃើញជនរងគ្រោះចងកនឹងដើមត្នោតស្លាប់បាត់ទៅហើយ ។
ក្រោយទទួលព័ត៌មានខាងលើនេះភ្លាម កំលាំងជំនាញស្រុកនិងប៉ុស្តិ៍ ព្រមទាំងអាជ្ញាធរមូលដ្ឋាន និងគ្រូពេទ្យបានចូលរួមពិនិត្យសពដែលបងប្អូនបានយកមកដល់ផ្ទះ មិនឃើញមានស្លាកស្នាមអ្វីដែលពាក់ព័ន្ធនឹងអំពើឃាតកម្មឡើយ ទើបសន្និដ្ឋានថា ជនរងគ្រោះពិតជាស្លាប់ដោយចងកធ្វើអត្តឃាតខ្លួនឯងប្រាកដមែន ។ បច្ចុប្បន្ន សពត្រូវបានប្រគល់ឱ្យក្រុមគ្រួសារធ្វើបុណ្យតាមប្រពៃណី ៕
ចែករំលែកព័តមាននេះ