ខេត្តបាត់ដំបង ៖ ប្រភពពីសមត្ថកិច្ចបានឲ្យដឹងថា ប្រជាការពារម្នាក់បានប្រើប្រាស់កាំភ្លើងបាញ់សម្លាប់ខ្លួនឯង កាលពីវេលាម៉ោង៤ទៀបភ្លឺថ្ងៃទី០៣ មករា នេះ ស្ថិតនៅក្នុងរោងយាមមួយកន្លែង ក្នុងភូមិរាមសេនា ឃុំល្វា…
ខេត្តបាត់ដំបង ៖ ប្រភពពីសមត្ថកិច្ចបានឲ្យដឹងថា ប្រជាការពារម្នាក់បានប្រើប្រាស់កាំភ្លើងបាញ់សម្លាប់ខ្លួនឯង កាលពីវេលាម៉ោង៤ទៀបភ្លឺថ្ងៃទី០៣ មករា នេះ ស្ថិតនៅក្នុងរោងយាមមួយកន្លែង ក្នុងភូមិរាមសេនា ឃុំល្វា ស្រុកបវេល ដែលគេសង្ស័យមានជម្លោះក្នុងក្រុមគ្រួសារ ។
មន្ត្រីដដែលបានឲ្យដឹងទៀតថា ជនរងគ្រោះឈ្មោះ ញ៉ែម សារឿន ភេទប្រុស អាយុ៥៣ឆ្នាំ ជាប្រជាការពារប្រចាំភូមិ-ឃុំខាងលើ ។ បុរសនេះបានប្រើប្រាស់កាំភ្លើងម៉ាកM16 បាញ់សម្លាប់ខ្លួនឯង១គ្រាប់ ត្រូវចំត្រង់ក្រោមចង្ការ បណ្ដាលស្លាប់នៅនឹងក្នុងរោងយាម បង្កឲ្យមានការភ្ញាក់ផ្អើលទាំងព្រលឹមអុលតែម្ដង។
ជុំវិញការបាញ់សម្លាប់ខ្លួនរបស់ប្រជាការពាររូបនេះ បើតាមការសាកសួរជាបឋមរបស់សមត្ថកិច្ចទៅលើក្រុមគ្រួសារបានឲ្យដឹងថា ទំនងផ្ដើមចេញពីជម្លោះក្នុងក្រុមគ្រួសារ។ ប្រភពបាននិយាយទៀតថា គេតែងឃើញគ្រួសារប្រជាការពារនេះផ្ទុះជម្លោះជាមួយគ្នារវាងប្ដីប្រពន្ធមិនសូវខកខានឡើយ ហើយនៅពេលកើតហេតុ នាយប់នោះគ្រួសារនេះក៏មានជម្លោះនឹងគ្នា តែគេមិនទាន់ដឹងថា ផ្ដើមចេញពីរឿងអ្វីឡើយ ។ លុះនៅវេលាទៀបភ្លឺ ស្រាប់តែបុរសជាប្ដីបាញ់សម្លាប់ខ្លួនឯងតែម្ដង។
ទាក់ទិននឹងការធ្វើអត្តឃាតនេះ សមត្ថកិច្ចមិនបាននិយាយអំពីប្រវត្តិកាំភ្លើងនេះថា តើប្រជាការពាររូបនេះបានមកពីណានោះទេ ព្រោះបើតាមមន្ត្រីជំនាញបាននិយាយថា កម្លាំងប្រជាការពារភូមិ មិនមានសិទ្ធិប្រើប្រាស់កាំភ្លើងនោះទេ ។ យ៉ាងណា សមត្ថកិច្ចកំពុងធ្វើការស្រាវជ្រាវលើករណីនេះហើយ ។
ចែករំលែកព័តមាននេះ