ខេត្តប៉ៃលិន ៖ ដោយបន្តការពារ និងថែរក្សាសន្តិសុខសណ្តាប់សង្គម ទើបអាជ្ញាធរខេត្តប៉ៃលិន បានដឹកនាំកម្លាំងសមត្ថកិច្ចចុះត្រួតពិនិត្យ ឆែកឆេរអាវុធជាតិផ្ទុះ និងគ្រឿងញៀន ដែលធ្វើការឃាត់ខ្លួនជនង្ស័យជាច្រើននាក់ ។ ការចុះឆែកឆេរនេះ រកឃើញ អ្នកប្រើប្រាស់គ្រឿងញៀន ដែលបង្កផលប៉ះពាល់ដល់សុខភាព និងធ្វើឱ្យអស្ថេរភាពក្នុងសង្គមផងដែរ ។
ហេតុការណ៍នេះ បានធ្វើឡើងកាលពីវេលាម៉ោង៨ និង៣០នាទីយប់ថ្ងៃទី២ ខែមករា ឆ្នាំ២០១៩ ស្ថិតនៅចំណុចផ្លូវជាតិលេខ៥៧ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ប្រភពព័ត៍មានបានឱ្យដឹងថា លោក ផាន់ ចាន់ធុល អភិបាលខេត្ដប៉ៃលិន បានបញ្ជាកម្លាំងសមត្ថកិច្ចចម្រុះ ដើម្បីចុះត្រួតពិនិត្យមើលអាវុធជាតិផ្ទុះ និងសារធាតុញៀន លើអ្នកធ្វើដំណើរតាមម៉ូតូនិងរថយន្ត ដែលដឹកនាំដោយលោក ចេង ញ៉ាន់ អភិបាលរងខេត្ត និងលោកឧត្ដមសេនីយ៍ត្រី ស៊ិន សុភាលក្ម្សី ស្នងការរងទទួលផែនអគ្គីភ័យ និងអាវុធជាតិផ្ទុះ រួមជាមួយលោកវរសេនីយ៍ឯក ស៊ុំ សុផល ស្នងការរងទទួលផែនសណ្ដាប់ធ្នាប់ ។
ប្រភពបន្តទៀតថា ក្នុងកិច្ចសហប្រតិបត្តិការនេះកម្លាំងជំនាញបានត្រួតពិនិត្យទៅលើរថយន្តចំនួន៩៥គ្រឿង ម៉ូតូចំនួន១៧៥គ្រឿង និងបានដកហូតចំនួន៤គ្រឿង ។
ប្រភពបញ្ជាក់ថា ក្នុងនោះកម្លាំងជំនាញការិយាល័យប្រឆាំងបទល្មើសគ្រឿងញៀនបានធ្វើការត្រួតពិនិត្យសារធាតុញៀនលើអ្នកធ្វើដំណើរបានចំនួន ៦០នាក់ និងឃាត់ខ្លួនជនសង្ស័យបានចំនួន១៣នាក់ ដែលពិនិត្យឃើញមានសារធាតុញៀននៅក្នុងទឹកនោម ។
ពាក់ព័ន្ធនឹងបញ្ហានេះ បច្ចុប្បន្នជនសង្ស័យទាំងអស់រួមជាមួយនឹងវត្ថុតាងត្រូវបញ្ជូនទៅស្នងការដ្ឋាននគរ
បាលខេត្តប៉ៃលិន ដើម្បីធ្វើការអប់រំណែនាំ ធ្វើកិច្ចសន្យា និងឲ្យអាណាព្យាបាលមកធានាយកទៅអប់រំបន្តទៀត ៕
ចែករំលែកព័តមាននេះ