ខេត្តមណ្ឌលគិរី ៖ ស្តូបមិត្តភាពកម្ពុជា-វៀតណាម ខេត្តមណ្ឌលគិរីត្រូវបានសម្ពោធដាក់ឲ្យប្រើប្រាស់ជាផ្លូវការក្រោមអធិបតីភាពឯកឧត្តម ញ៉ែម វ៉ាលី អនុប្រធានអចិន្ត្រៃយ៍ និងជាអគ្គលេខាធិការក្រុមប្រឹក្សាជាតិរណសិរ្សសាមគ្គីអភិវឌ្ឍន៍មាតិភូមិកម្ពុជាដែលប្រព្រឹត្តិទៅនៅស្តូបមិត្តភាពកម្ពុជា-វៀតណាម ស្ថិតនៅសង្កាត់សុខុដុម ក្រុងសែនមនោរម្យ នាព្រឹកថ្ងៃទី០១ ខែមករា ឆ្នាំ២០១៩ ។
ឯកឧត្តម ញ៉ែម វ៉ាលី អនុប្រធានអចិន្ត្រៃយ៍ និងជាអគ្គលេខាធិការក្រុមប្រឹក្សាជាតិរណសិរ្សសាមគ្គីអភិវឌ្ឍន៍មាតិភូមិកម្ពុជាបានមានប្រសាសន៍ថា ការកសាងស្តូបមិត្តភាពកម្ពុជាវៀតណាមនេះឡើងក្នុងគោលបំណងបង្រួបបង្រួមអ្នកស្នេហាជាតិគ្រប់ទិសទី ដើម្បីធ្វើការតស៊ូប្រយុទ្ធប្រឆាំង និងផ្តួលរលំរបបដ៏ខ្មៅងងឹតនៃរបបប្រល័យពូជសាសន៍ប៉ុលពត ហើយទទួលបានជោគជ័យជាប្រវត្តិសាស្ត្រ នៅថ្ងៃទី០៧ ខែមករា ឆ្នាំ១៩៧៩ និងជាការរលឹកដល់កងទ័ពស្ម័គ្រចិត្តវៀតណាមដែលបានពលីក្នុងរំដោះប្រទេស និងប្រជាជនកម្ពុជាឲ្យរួចផុតពីគ្រោះមហន្តរាយប្រល័យពូជសាន៍នេះផងដែរ ។
កម្ពុជាបានកសាងស្តូបមិត្តភាពកម្ពុជា-វៀតណាមបានចំនួន១៣រាជធានីខេត្តរួមមាន ភ្នំពេញ កំពត កំពង់ឆ្នាំង តាកែវ កំពង់ធំ បាត់ដំបង ព្រះវិហារ ព្រះសីហនុ ស្ទឹងត្រែង កែប កោះកុង រតនៈគិរី និងមណ្ឌលគិរី ។
ឯកឧត្តមស្វាយ សំអ៊ាង អភិបាលខេត្តមណ្ឌលគិរី បានឲ្យដឹងថា ស្តូបមិត្តភាពកម្ពុជា-វៀតណាម ខេត្តមណ្ឌលគិរី បានកសាងឡើងមានទំហំតួស្តូប១៦ម៉ែត្រគុណ១៦ម៉ែត្រ កម្ពស់១៦ម៉ែត្រ ទំហំសួន ៤៦ម៉ែត្រគុណ៨០ម៉ែត្រ ដែលបានដំណើរការសាងសង់ចាប់ពីថ្ងៃទី០៤ ខែមករា ឆ្នាំ២១០៨ រហូតដល់ថ្ងៃទី២០ ខែវិច្ឆិកា ឆ្នាំ២០១៨ ដែលជាដ៏ថ្លៃថ្លារបស់រណសិរ្យមាតុភូមិវៀតណាម បានផ្តល់ជូនខេត្តមណ្ឌលគិរី ។
ឯកឧត្តមអភិបាលខេត្តបញ្ជាក់ថា នេះបង្ហាញពីការរឹតចំណងសាមគ្គីភាព មិត្តភាព និងកិច្ចសហប្រតិបត្តិការរវាងប្រទេសទាំងពីរជាផ្លែផ្កាលើគ្រប់វិស័យ ទាំងវិស័យនយោបាយ សេដ្ឋកិច្ច សង្គមកិច្ច ទេសចរណ៍ វប្បធម៌ និងទំនាក់ទំនងពានិជ្ជកម្មបានយ៉ាងល្អ ធានាលើកកម្ពស់ និងកាត់បន្ថយភាពក្រីក្ររបស់ប្រជាជននៃប្រទេសទាំងពីរ ៕
ចែករំលែកព័តមាននេះ