រាជធានីភ្នំពេញ ៖ បុរសម្នាក់សង្ស័យស្រវឹងបានបើកបរម៉ូតូមួយគ្រឿងក្នុងល្បឿនលឿនទៅបុក ដើមលឿងរាជមួយដើមនៅតាមចិញ្ចើមផ្លូវ បណ្តាលអោយបែកលលាដ៍ក្បាលហូរឈាមសន្លប់ស្ដូកស្ដឹង ហើយត្រូវបានប្រជាពលរដ្ឋរាយការណ៍ទៅសមត្ថកិច្ចដើម្បីហៅរថយន្តសង្គ្រោះបន្ទាន់មកដឹកយកជនរងគ្រោះទៅសង្គ្រោះដែរ តែជាអកុសលជនរងគ្រោះបានស្លាប់មុនពេលពេលទៅដល់មន្ទីរពេទ្យ ។
ហេតុការណ៍នេះបានកើតឡើងកាលពីវេលាម៉ោង១និង៣០នាទីរំលងអាធ្រាត្រឈានចូលថ្ងៃទី ៣ ខែមករា ឆ្នាំ២០១៩ នៅនឹងផ្លូវលេខ២៩៤ កែងនឹងផ្លូវ២១ ស្ថិតក្នុងសង្កាត់ទន្លេបាសាក់ ខណ្ឌចំការមន។
ជនរងគ្រោះដែលបានស្លាប់ ឈ្មោះ លី ចានី ភេទប្រុស អាយុ៣៨ឆ្នាំ បច្ចុប្បន្នស្នាក់នៅក្នុងបុរីទួលសង្កែ សង្កាត់ទួលសង្កែ ខណ្ឌឫស្សីកែវ ជាអ្នកបើកបរម៉ូតូមួយគ្រឿងម៉ាកហុងដា ពណ៌ខ្មៅលាយស ពាក់ស្លាកលេខ ភ្នំពេញ ១GZ-០០៤៨ រងការខូចខាតមួយកំណាត់មុខ។
ប្រភពព័ត៌មានពីបុរសជាសន្តិសុខយាមនៅក្បែរកន្លែងកើតហេតុបានប្រាប់អោយដឹងថា មុនកើតហេតុ គាត់បានឃើញបុរសជាជនរងគ្រោះខាងលើបើកបរម៉ូតូមួយគ្រឿងធ្វើដំណើរតាមបណ្ដោយផ្លូវ២៩៤ ក្នុងទិសដៅពីកើតទៅលិចក្នុងល្បឿនលឿន លុះមកដល់កន្លែងកើតហេតុសង្ស័យតែបុរសរងគ្រោះស្រវឹង ទើបរេចង្កូតទៅបុកផ្ទប់នឹងដើមលឿងរាជ បណ្តាលអោយបែកលលាដ៍ក្បាលហូរឈាមសន្លប់ស្ដូកស្ដឹងនៅនឹងថ្នល់សល់តែដង្ហើមចង្រិត ។
ប្រភពដដែលបានបន្តទៀតថា ភ្លាមៗនោះពួកគាត់បានរាយការណ៍ទៅសមត្ថកិច្ចមូលដ្ឋាន និង ហៅរថយន្តសង្គ្រោះបន្ទាន់មកដឹកយកជនរងគ្រោះទៅសង្គ្រោះភ្លាមៗនៅមន្ទីរពេទ្យកាល់ម៉ែតដែរ តែដោយសាររបួសធ្ងន់ធ្ងរខ្លាំងពេកជនរងគ្រោះបានស្លាប់មុនពេលបញ្ជូនទៅសង្គ្រោះនៅមន្ទីរពេទ្យ ។
ក្រោយកើតហេតុ សពបុរសរងគ្រោះខាងលើ ត្រូវបានសាច់ញាតិមកទទួល និងដឹកយកទៅតម្កល់ធ្វើបុណ្យតាមប្រពៃណីនៅវត្តទួលសង្កែ ៕
ចែករំលែកព័តមាននេះ