ខេត្តកំពង់ស្ពឺ ៖ ពេលឃើញបុរសម្នាក់កំពុងអង្គុយហូបបាយក្នុងរោងការ ស្រាប់តែជនសង្ស័យម្នាក់ និងបក្ខពួកម្នាក់ទៀតបានយកឆ្នាំង និងដំបងឫស្សីទៅវាយ បណ្តាលឱ្យជនរងគ្រោះរងរបួសហូរឈាមជោកខ្លួន ហើយត្រូវបានគេបញ្ជូនទៅសង្គ្រោះភ្លាមៗផងដែរ។ ករណីខាងលើនេះបានបង្កឱ្យមានការភ្ញាក់ផ្អើលកើតឡើងកាលពីវេលាម៉ោង១១និង៣០នាទីយប់ថ្ងៃទី១ ខែមករា…
ខេត្តកំពង់ស្ពឺ ៖ ពេលឃើញបុរសម្នាក់កំពុងអង្គុយហូបបាយក្នុងរោងការ ស្រាប់តែជនសង្ស័យម្នាក់ និងបក្ខពួកម្នាក់ទៀតបានយកឆ្នាំង និងដំបងឫស្សីទៅវាយ បណ្តាលឱ្យជនរងគ្រោះរងរបួសហូរឈាមជោកខ្លួន ហើយត្រូវបានគេបញ្ជូនទៅសង្គ្រោះភ្លាមៗផងដែរ។
ករណីខាងលើនេះបានបង្កឱ្យមានការភ្ញាក់ផ្អើលកើតឡើងកាលពីវេលាម៉ោង១១និង៣០នាទីយប់ថ្ងៃទី១ ខែមករា ឆ្នាំ២០១៩ នៅភូមិរលាំងសង្កែ សង្កាត់សុពរ័ទេព ក្រុងច្បារមន ខេត្តកំពង់ស្ពឺ។
ជនរងគ្រោះឈ្មោះ ម៉ប់ រ៉ាន់ដា ហៅថ្លែន ភេទប្រុស អាយុ២៥ឆ្នាំ មានទីលំនៅភូមិរលាំងសង្កែ សង្កាត់សុពរ័ទេព ក្រុងច្បារមន ខេត្តកំពង់ស្ពឺ បានរងរបួសក្បាលដេរ៥ថ្នេរ។ ចំណែកជនសង្ស័យឈ្មោះសេក សាម៉ាឌី អាយុ២៥ឆ្នាំ រស់នៅភូមិឃុំខាងលើ និងបក្ខពួកម្នាក់ទៀតឈ្មោះ ពេជ្រ សុភាព ហៅ ឌុយ ភេទប្រុស អាយុ២២ឆ្នាំ រស់នៅភូមិឃុំជាមួយគ្នា។
សមត្ថកិច្ចបានអោយដឹងថា មុនពេលកើតហេតុ នៅក្នុងភូមិមានកម្មវិធីចូលរោងការកូនរបស់ឈ្មោះ ឆាង នី នៅភូមិឃុំជាមួយគ្នា ហើយជនរងគ្រោះបានទៅចូលរួមក្នុងកម្មវិធីនោះដែរ ពេលជនរងគ្រោះកំពុងអង្គុយហូបបាយក៏លេចមុខជនសង្ស័យម្នាក់បានយកឆ្នាំងដាំបាយមកវាយលើជនរងគ្រោះ ពេលវាយហើយជនសង្ស័យបានរត់ចេញក្រៅរោងការ ពេលនោះជនរងគ្រោះក៏រត់តាមទាំងឈាមស្រោចខ្លួន ដើម្បីសួរនាំរកហេតុផល ពេលកំពុងនិយាយគ្នា ស្រាប់តែមានបក្ខពួកជនសង្ស័យម្នាក់ទៀតបានយកដំបងឫស្សីមកវាយជនរងគ្រោះត្រូវក្បាលចំខាងឆ្វេង បណ្ដាលឲ្យបែករងរបួសធ្ងន់តែម្តង។
ក្រោយកើតហេតុ ជនរងគ្រោះត្រូវបានគេបញ្ជូនទៅសង្គ្រោះភ្លាមៗដែរ ហើយត្រូវគ្រូពេទ្យដេររបួសចំនួន៥ថ្នេរ ។ ចំណែកក្រុមជនសង្ស័យក៏រត់គេចខ្លួនបាត់អស់ទាំងយប់។
មន្ត្រីនគរបាលជំនាញព្រហ្មទណ្ឌក្រុងច្បារមនបានបញ្ជាក់ថា លុះនៅព្រឹកឡើងថ្ងៃទី២ មករា ២០១៩ ទើបជនរងគ្រោះបានមកដាក់ពាក្យបណ្ដឹងនៅប៉ុស្ដិ៍នគរបាលរដ្ឋបាល ហើយកម្លាំងនគរបាលជំនាញចុះស្រាវ
ជ្រាវ និងឃាត់ខ្លួនជនសង្ស័យរួមទាំងបក្ខពួកម្នាក់ បញ្ជូនមកជំនាញព្រហ្មទណ្ឌអធិការដ្ឋាននគរបាលក្រុងច្បារមន ដើម្បីធ្វើការសាកសួរ និងកសាងសំណុំរឿង។
នៅចំពោះមុខសមត្ថកិច្ច ជនសង្ស័យបានឆ្លើយសារភាពថា មូលហេតុដែលខ្លួនវាយទៅលើជនរងគ្រោះ ព្រោះតែចង់ស្រាយគំនុំចាស់ដែលមានពីមុនមក រីឯភាគីជនរងគ្រោះវិញបានបដិសេធថា គាត់មិនធ្លាប់មានទំនាស់ជាមួយក្រុមជនសង្ស័យឡើយ ធ្វើអោយជនសង្ស័យទាំង២នាក់នោះស្រក់ទឹកភ្នែកព្រោះតែទង្វើរបស់ខ្លួន។
បន្ទាប់ពីស្តាប់ការបំភ្លឺរបស់ជនរងគ្រោះ និងចម្លើយសារភាពរបស់ជនសង្ស័យទាំង២នាក់រួចមក សមត្ថកិច្ចបានកសាងសំណុំរឿងបញ្ជូនជនសង្ស័យទាំង២នាក់ទៅកាន់ការិយាល័យព្រហ្មទណ្ឌដើម្បីចាត់ការបន្តតាមនីតិវិធី៕
ចែករំលែកព័តមាននេះ