រាជធានីភ្នំពេញ ៖ មន្ត្រីជាន់ខ្ពស់ក្រសួងពាណិជ្ជកម្មបានលើកឡើងថា បច្ចុប្បន្ននេះ ទីផ្សារនិងតម្លៃ ម្រេចកម្ពុជាគឺពឹងផ្អែកតែលើទីផ្សារប្រទេស២ប៉ុណ្ណោះ ពុំទាន់មានហាងឆេងនៅលើពិភពលោកឲ្យទូលំទូលាយនៅឡើយទេ ដូច្នេះហើយបានជាជួបការលំបាក ពិសេសនៅពេលមានការផ្គត់ផ្គង់លើសលប់ ឬបិទទីផ្សារជាដើម…
រាជធានីភ្នំពេញ ៖ មន្ត្រីជាន់ខ្ពស់ក្រសួងពាណិជ្ជកម្មបានលើកឡើងថា បច្ចុប្បន្ននេះ ទីផ្សារនិងតម្លៃ ម្រេចកម្ពុជាគឺពឹងផ្អែកតែលើទីផ្សារប្រទេស២ប៉ុណ្ណោះ ពុំទាន់មានហាងឆេងនៅលើពិភពលោកឲ្យទូលំទូលាយនៅឡើយទេ ដូច្នេះហើយបានជាជួបការលំបាក ពិសេសនៅពេលមានការផ្គត់ផ្គង់លើសលប់ ឬបិទទីផ្សារជាដើម ។
រដ្ឋលេខាធិការក្រសួងពាណិជ្ជកម្ម លោកម៉ៅ ថូរ៉ា មានប្រសាសន៍នៅសណ្ឋាគារឡឺ រ៉ូយ៉ាល់ កាលពីថ្ងៃទី៥ ធ្នូ កន្លងមកថា ផលិតផលម្រេចកម្ពុជាពុំទាន់មានហាងឆេងនៅលើទីផ្សារអន្តរជាតិនោះទេ ។ សព្វថ្ងៃនេះមានតែ២ប្រទេសប៉ុណ្ណោះគឺថៃ និងវៀតណាម ។ លោកថ្លែងថា ៖« ទីផ្សារម្រេចយើងដែលសំខាន់មានតែពីរទេ គឺថៃនិងវៀតណាម ។ បើប្រទេសទាំងនេះអត់ទិញទេ ម្រេចយើងនឹងចុះថោក ព្រោះថៃតែងតែបិទមិនឱ្យផលិតផលខ្មែរចូល តែនៅពេលកម្ពុជាតវ៉ា ទើបគេបើកឱ្យវិញ ។ ចំណែកវៀតណាមមិនបិទទីផ្សារទេ តែថ្ងៃណាដែលគេពេញកុងត្រា គេបញ្ចុះថ្លៃយើង ហើយពេលណាគេខ្វះ ទើបប្រមូលទិញពីយើង ។ ដូចនេះ យើងងាប់រស់នៅលើប្រទេសទាំង២នេះហើយ គេចង់ថាអីក៏បានដែរ »។
ដើម្បីដោះស្រាយបញ្ហានេះ បើតាមលោករដ្ឋលេខាធិការម៉ៅ ថូរ៉ា បានលើកឡើងថា កម្ពុជាត្រូវបោះមួយជំហានទៀត ដោយចូលជាសមាជិករបស់សមាគមម្រេចអន្តរជាតិ ហើយក្រសួងពាក់ព័ន្ធ និងសហព័ន្ធម្រេច ត្រូវធ្វើយ៉ាងម៉េចរិះរកវិធីដើម្បីអភិវឌ្ឍន៍ទីផ្សារផលិតផលនេះបន្ថែមទៀត ។
លោកឧកញ៉ា សុង សារ៉ន ដែលត្រូវបានជ្រើសរើសជាប្រធានសហព័ន្ធម្រេច និងគ្រឿងទេសកម្ពុជា បានលើកឡើងដែរថា មកដល់បច្ចុប្បន្ននេះ កម្ពុជាអាចផលិតម្រេចបានជិត២ម៉ឺនតោនក្នុង១ឆ្នាំ ហើយម្រេចកម្ពុជាមានគុណល្អរសជាតិឆ្ងាញ់ និងមានការគាំទ្រពីអ្នកបរិភាគ ។ប៉ុន្តែគួរឱ្យស្តាយ ការនាំចេញនៅមិនទាន់បានច្រើននៅឡើយ ហើយភាគច្រើនម្រេចកម្ពុជានាំចេញទៅតែប្រទេសវៀតណាម និងថៃប៉ុណ្ណោះ ។
លោកឧកញ៉ាមានប្រសាសន៍នាឱកាសនោះថា ៖« យើងនឹងដោះស្រាយបញ្ហាសំខាន់ៗដែលកើនឡើងនៅពេលនេះ និងមានវិធានការបន្ថែមទៀតដើម្បីអភិវឌ្ឍន៍វិស័យនេះឲ្យប្រសើរឡើង»។
បន្ថែមលើនេះ លោកឧកញ៉ា ក៏សូមអំពាវនាវដល់រាជរដ្ឋាភិបាលពិចារណាលើគោលនយោបាយថ្នាក់ជាតិ ដើម្បីសម្រួលក្នុងការនាំចេញទៅកាន់ទីផ្សារអន្តរជាតិ ដោយមិនពឹងផ្អែកតែទៅលើទីផ្សារប្រទេសថៃ និងវៀតណាម ។ក្រសួងពាណិជ្ជកម្មបានដាក់បញ្ចូលផលិតផលម្រេចទៅក្នុងយុទ្ធសាស្ត្រសមាហរណកម្មពាណិជ្ជកម្ម ដើម្បីអភិវឌ្ឍន៍សង្វាក់តម្លៃ និងធ្វើពិធិធកម្មការនាំចេញ ។ បច្ចុប្បន្ននេះ ផលិតផលកសិកកម្មមួយនេះបាននិងកំពុងដាំដុះនៅក្នុងខេត្តចំនួន១៩ លើផ្ទៃដីប្រមាណជាង៦ពាន់ហិកតា ដែលបានផ្ដល់ទិន្នផលជាង២ម៉ឺនតោនក្នុង ១ឆ្នាំ ។
ប្រធានវិទ្យាស្ថានស្រាវជ្រាវ និងអភិវឌ្ឍន៍ជនបទកម្ពុជា (CIRD) លោក ប្រាក់ សេរីវឌ្ឍ បានឱ្យដឹងថា ម្រេចជាវិស័យសំខាន់ និងជាផលិតផលនាំចេញទៅបរទេស ដែលក្រសួងពាណិជ្ជកម្មបាននិងកំពុងយកចិត្តទុកដាក់ឱ្យមានគោលនយោបាយម្រេចថ្នាក់ជាតិ ។
លោកលើកឡើងថា កាលពីដើមទសវត្សរ៍ឆ្នាំ២០១០ ទីផ្សារម្រេចពិភពលោក មានតម្លៃខ្ពស់ ធ្វើឲ្យកសិករបានប្តូរពីការដាំដុះដំណាំផ្សេងៗងាកមកដាំដំណាំម្រេច ដែលធ្វើការផ្គត់ផ្គង់កើនឡើងខ្ពស់ហួសពីតម្រូវការ ជាហេតុធ្វើឱ្យតម្លៃម្រេចធ្លាក់ចុះ និងបានធ្វើឱ្យកសិករមួយចំនួនជួបការលំបាក ខណៈពួកគាត់ដាក់ទុនពង្រីកការដាំដុះច្រើន ។ ក្នុងនោះដែរ នៅកម្ពុជាក្នុងឆ្នាំ២០១៧ និង២០១៨ អាចផលិតម្រេចបានប្រមាណ២ម៉ឺនតោន ដែលជាង៩៥%គឺសម្រាប់នាំចេញ តែដោយសារទីផ្សារមិនទូលំទូលាយ ធ្វើឲ្យផលិតផលមួយនេះបន្ដជួបការលំបាក និងខ្វះទីផ្សារសម្រាប់ផ្គត់ផ្គង់ ។ លោកថា ៖« បើសិនជាយើងអាចនាំចេញម្រេច២ម៉ឺនតោនទៅទីផ្សារអន្តរជាតិ គឺវាស្មើនឹងតម្លៃនាំចេញស្រូវអង្ករប្រមាណជា២០ទៅ៣០ម៉ឺនតោនឯណោះ »៕
ចែករំលែកព័តមាននេះ