ខេត្តបន្ទាយមានជ័យ ៖ ក្រុមហ៊ុនប្រមូលសម្រាមថ្មីស៊ិនទ្រីបានមកដល់ក្រុងប៉ោយប៉ែតហើយ ដើម្បីចូលរួមជាមួយអាជ្ញាធរក្នុងការសម្អាតអនាម័យ ដើម្បីបរិស្ថានសង្គមល្អក្នុងក្រុងមួយនេះប៉ុន្តែប្រធានក្រុមហ៊ុនប្រមូលសម្រាមចាស់ (ឃ្យុងធាវី) បដិសេធមិនឆ្លើយតបសំណួរអ្នកយកព័ត៌មានធ្វើឲ្យមានមន្ទិល ព្រោះការិយាល័យមិនទាន់រុះរើ ម្យ៉ាងថ្មីៗក៏ធ្លាប់ឃើញក្រុមហ៊ុននេះបង្ហោះហ្វេសប៊ុកឆ្លើយតបជាមួយអាជ្ញាធរក្រុងហាក់ប្រទាញប្រទង់ទំនងវាយប្រហារគ្នាទៀតផង ។
ដោយនៅព្រឹកថ្ងៃទី២ មករានេះ អាជ្ញាធរក្រុងប៉ោយប៉ែតដឹកនាំដោយលោកសាន ស៊ានហូ អភិបាលនៃគណៈអភិបាលក្រុងបានធ្វើពិធីមួយក្នុងបរិវេណវត្តបាលិលេយ្យ ដើម្បីបង្ហាញវត្តមានក្រុមហ៊ុនថ្មី«ស៊ិនទ្រី» ដែលមានរថយន្តដឹកសំរាម និងបូមធូលីជិត២០គ្រឿងចូលរួមដោយអាជ្ញាធរសង្កាត់កងកម្លាំងក្នុងក្រុង និងប្រជាការពារភូមិជាច្រើននាក់ ។
ក្រោយបង្ហាញវត្តមានក្រុមហ៊ុនថ្មីនេះ អាជ្ញាធរបើកប្រតិបត្តិការប្រមូល និងរើសសំរាមតាមដងផ្លូវជាតិលេខ៥ ចាប់ពីចំណុចរង្វង់មូលច្រកទ្វារអន្តរជាតិប៉ោយប៉ែតឆ្ពោះទៅដល់សង្កាត់ផ្សារកណ្តាល ។
តំណាងក្រុមហ៊ុនស៊ិនទ្រីម្នាក់ប្រាប់ថា ក្រុមហ៊ុនខ្លួនមានរថយន្តប្រមូលសំរាម១៥គ្រឿង ក្នុងនោះមានរថយន្តបូមធូលី១គ្រឿង សរុប១៦គ្រឿង ហើយថា បានទទួលយកកម្មករ និងអ្នកបើកបររថយន្តពីក្រុមហ៊ុនបោសសម្អាតក្រុងចាស់ (ឃ្យុងធាវី) ចំនួន១៦នាក់ ។ តំណាងក្រុមហ៊ុនខាងលើអះអាងថា បើការប្រមូលសំរាមមិនទាន់តម្រូវការខាងក្រុមហ៊ុន និងបន្ថែមរថយន្តនិងកម្មករទៀត ធ្វើយ៉ាងណាឲ្យដំណើរការលូន ។
ចំពោះគំនរសម្រាមតាមទីតាំងដីទំនេរផ្សេងៗដែលអ្នកស្រុកយកទៅបោះចោលខ្វះកាវេចខ្ចប់ពោលពីមុនគ្មានអ្នកប្រមូលបានត្រឹមតែចុះដុតកម្ទេចចោលម្តងម្កាលតំណាងក្រុមហ៊ុនមួយនេះអះអាងថា និងសហការណ៍ជាមួយអាជ្ញាធរប្រមូលឲ្យអស់មិនដុតកម្ទេចចោលទេ ព្រោះផ្សែង ប៉ះពាល់ដល់បរិស្ថានសង្គមដែរ ។
ករណីដាក់ក្រុមហ៊ុនថ្មីនេះ ប្រធានក្រុមហ៊ុនចាស់ (ឃ្យុងធាវី) ធ្វើការបដិសេធមិនឆ្លើយតបពិស្ដារនៅសំណួរទេ ដោយគ្រាន់តែនិយាយយ៉ាងខ្លីថា«មិនទាន់ច្បាស់ត្រូវឆ្លើយតបទេ ព្រោះកំពុងជួបជាមួយអាជ្ញាធរក្រុងនៅឡើយ ហើយថា បានលទ្ធផលយ៉ាងណា និងប្រាប់នៅពេលក្រោយ» ៕
ចែករំលែកព័តមាននេះ