ខេត្តកណ្ដាល ៖ យុវជនជំទង់ម្នាក់បានបាត់ខ្លួនក្នុងចំណោមគ្នា៤នាក់ ដោយសារបាក់ច្រាំងទន្លេ ក្នុងជម្រៅចូលទឹកប្រហែល៧ម៉ែត្រ និងបណ្តោយច្រាំងប្រវែងប្រហែល២០ម៉ែត្រកាលពីវេលាម៉ោង១០ព្រឹក ថ្ងៃទី៣១ ធ្នូ នៅចំណុចមាត់ទន្លេមេគង្គ ភូមិវត្តថ្មី ឃុំព្រែកដំបង ស្រុកមុខកំពូល ។
ជនរងគ្រោះដែលបានបាត់ខ្លួន និងសន្មត់ថាលង់ស្លាប់ទៅហើយនោះ ១.ឈ្មោះ ឃាន់ ម៉េងហេង ភេទប្រុស អាយុ១៤ឆ្នាំ សិស្សថ្នាក់ទី ៧ នៅអនុវិទ្យាល័យព្រែកដំបង ។២.ឈ្មោះ ខា ចំរើន ភេទប្រុស អាយុ១៧ ឆ្នាំ ជាកសិករ បានហែលរួចខ្លួន ។៣.ឈ្មោះ សុចាន់ បូរី ភេទប្រុស អាយុប្រហែល១៥ ឆ្នាំ ជាសិស្ស បានហែលរួចខ្លួន និង៤.ឈ្មោះ វង្ស សុជាតិ ភេទប្រុស អាយុប្រហែល១៦ ឆ្នាំ ជាសិស្ស បានហែលរួចខ្លួន)ដែរ ។
ពួកគេទាំងអស់គ្នា មានទីលំនៅភូមិវត្តថ្មី ឃុំព្រែកដំបង ស្រុកមុខកំពូល ខេត្តកណ្តាល ។
សេចក្តីរាយការណ៍បន្តថា កន្លងមកពួកគេព្រមទាំងមិត្តភក្តិ តែងតែជិះកង់ទៅលេងនៅកន្លែងកើតហេតុខាងលើនេះជាញឹកញាប់ ពេលពួកគេចេញពីរៀន ។ លុះវេលាម៉ោងជាង៩ព្រឹក ថ្ងៃទី៣១ ធ្នូ ជនរងគ្រោះ៣នាក់ បាននាំគ្នាជិះកង់មកលេងកន្លែងកើតហេតុ ។ ចំណែកឈ្មោះ ខា ចំរើន នៅកាច់ពោតជាប់ច្រាំងទន្លេនោះស្រាប់ ហើយក៏បាននាំគ្នាចុះពីលើច្រាំងទៅឈរលេងជាប់មាត់ទឹក និងបាននាំគ្នាយកជើងទន្ទ្រាំដីលេង ដែលក្នុងនោះមានឈ្មោះ ឃាន់ ម៉េងហេង និងឈ្មោះ សុចាន់ បូរី ។ រីឯឈ្មោះ ខា ចំរើន និងឈ្មោះ វង្ស សុជាតិ ឈរនៅខាងក្រោយ ។ ស្រាប់តែពេលនោះដីបានស្រុតបាក់ចូលទៅក្នុងទន្លេ បណ្តាលឲ្យពួកគេទាំង៤នាក់ ធ្លាក់ចូលក្នុងទឹកបាត់ទាំងអស់គ្នា ។
តាមប្រភពថា ពេលនោះ ឈ្មោះ ខា ចំរើន ឈ្មោះ វង្ស សុជាតិ និងឈ្មោះ សុចាន់ បូរី បានស្រវេស្រវាហែលឡើងមកលើគោករួចផុតពីគ្រោះដល់ជីវិត ។ ចំណែកឈ្មោះ ឃាន់ ម៉េងហេង បានបាត់ខ្លួនតែម្តង ។ រហូតដល់ម៉ោង១៤និង៤០ នាទី ជនរងគ្រោះឈ្មោះ ឃាន់ ម៉េងហេង មិនទាន់រកឃើញនៅឡើយទេដែលសន្មត់ថា គ្មានជីវិតរស់នៅទេ ។ ករណីនេះ ក្រុមគ្រួសារជនរងគ្រោះបានសហការជាមួយអាជ្ញាធរមូលដ្ឋាន និងសមត្ថកិច្ចប៉ុស្តិកំពង់ជួលអ្នកជំនាញមុជទឹកស្វែងរកសាកសពនៅឡើយ ៕
ចែករំលែកព័តមាននេះ