ខេត្តកណ្តាល ៖ ជនសង្ស័យម្នាក់ត្រូវនគរបាលក្រុងតាខ្មៅចាប់ឃាត់ខ្លួន បន្ទាប់ពីធ្វើសកម្មភាពលួចយករ៉ឺម៉កម៉ូតូកង់បី ដែលម្ចាស់ចតទុកដាក់សម្ភារៈ ដែលហេតុការណ៍នេះបានកើតឡើងកាលពីវេលាម៉ោង៧យប់ថ្ងៃទី១ មករា ២០១៩ ចំណុចភូមិដើមមៀន សង្កាត់ដើមមៀន ក្រុងតាខ្មៅ ខេត្តកណ្តាល។
ម្ចាស់រ៉ឺម៉កម៉ូតូកង់បីឈ្មោះហាស់ ចំរើន ភេទប្រុស អាយុ៣៨ឆ្នាំ មុខរបរជាងម៉ាស៊ីនត្រជាក់ ទីលំនៅភូមិកោះក្របី សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ ។
ចំណែកជនសង្ស័យឈ្មោះរាជ ឡេងរ៉ាយូ ភេទប្រុស អាយុ៣៨ឆ្នាំ មុខរបរមិនពិតប្រាកដ មានទីលំនៅភូមិព្រែកតានូ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ។
លោកវរសេនីយ៍ ស កែវពិសិដ្ឋ អធិការនគរបាលក្រុងតាខ្មៅបានអោយដឹងថា នៅវេលាកើតហេតុខាងលើ ជនរងគ្រោះបានបើករ៉ឺម៉កម៉ូតូកង់បីដែលមានផ្ទុកសម្ភារៈមួយចំនួនមកចតនៅចំណុចកើតហេតុដើម្បីយកសម្ភារៈដាក់បន្ថែមទៀត ដោយពុំបានដកកូនសោរចេញពីម៉ូតូឡើយ ហើយក៏បានដើរចូលទៅយកសម្ភារៈដែលទុកក្នុងផ្ទះជួលឲ្យជាងស្នាក់ លុះពេលត្រឡប់មករកម៉ូតូរ៉ឺម៉កកង់បីវិញស្រាប់បាត់តែម្តង។
បន្ទាប់មកជនរងគ្រោះបានរាយការណ៍ជូនសមត្ថកិច្ចដើម្បីធ្វើការស្រាវជ្រាវឃាត់ខ្លួនជនសង្ស័យបានរួមទាំងវត្ថុតាង បញ្ជូនមកកាន់អធិការដ្ឋាននគរបាលក្រុងតាខ្មៅដើម្បីបន្តចាត់ការតាមនីតិវិធី៕
ចែករំលែកព័តមាននេះ