រាជធានីភ្នំពេញ ៖ រថយន្តបែនដឹកដីមួយគ្រឿង ខណៈអ្នកបើកបរបានបើកហួសផ្លូវ ហើយបានរយ៉ែថយក្រោយវិញក៏ជ្រុលទៅបុក និងម៉ូតូកង់បីឥណ្ឌាដែលធ្វើដំណើរមកពីក្រោយ បណ្តាលអោយបែកកញ្ចក់ខាងមុខ តែសំណាងល្អមិនមានគ្រោះថ្នាក់ដល់អ្នកបើកបរ និងភ្ញៀវដែលជិះនៅក្នុងនោះ ។
ហេតុការណ៍នេះបានកើតឡើងនៅវេលាម៉ោង១០និង៤០នាទីយប់ថ្ងៃទី១ ខែមករា ឆ្នាំ២០១៩ នៅក្រោមស្ពានអាកាសស្ទឹងមានជ័យ ផ្លូវព្រះមុនីរ៉េតកែង និង២៧១ សង្កាត់ស្ទឹងមានជ័យ២ ខណ្ឌមានជ័យ ។
ប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុគេបានឃើញបុរសម្នាក់បានបើករថយន្តបែនដឹកដីមួយគ្រឿងម៉ាកហ៊ីយ៉ានដាយ ពណ៌ប្រផេះ ពាក់ស្លាកលេខ ភ្នំពេញ 3C- 6472 ធ្វើដំណើរតាមផ្លូវព្រះមុនីរ៉េតក្នុងទិសដៅពីលិចទៅកើតដោយដឹកដីពេញមួយរថយន្ត ខណៈមកដល់ចំនុចកើតហេតុអ្នកបើកបរបំរុងបត់ស្តាំឡើងទៅផ្លូវ២៧១ តែដោយសាររថយន្តលឿនពេកក៏ហួសផ្លូវបន្តិចទើបអ្នកបើកបរបានបើករថយន្តរយ៉ែថយក្រោយ តែស្របពេលនោះដែរ ដោយសារតែខ្វះការប្រុងប្រយ័ត្នមើលក្រោយមិនច្បាស់ទើបធ្វើអោយរថយន្តជ្រុលទៅបុក និងម៉ូតូកង់បីឥណ្ឌា ពណ៌ស មួយគ្រឿងដែលកំពុងដឹកភ្ញៀវ២នាក់មកពីក្រោយ បណ្តាលអោយរងការខូចខាតបែកកញ្ចក់ខាងមុខ តែសំណាងល្អមិនមានគ្រោះថ្នាក់ដល់អ្នកជិះនៅក្នុងម៉ូតូកង់បី ។ ដោយឡែកខាងរថយន្តបង្កវិញអត់មានរងការខូចខាតអ្វីនោះទេ ។
ក្រោយពេលកើតហេតុ ឃើញមានតំណាងភាគីខាងរថយន្តបានមកសម្របសម្រួលគ្នាជាមួយនិងខាងម៉ូតូកង់បី ដោយខាងម៉ូតូកង់បីឥណ្ឌាទាមទារសំណង៣០០ដុល្លារ តែការចរចាគ្នាអស់រយៈពេលជិត២ម៉ោងទើបខាងរថយន្តសុំសងខាងម៉ូតូកង់បីចំនួន១៦០ដុល្លារ ដើម្បីបញ្ចប់រឿង ៕
ចែករំលែកព័តមាននេះ