រាជធានីភ្នំពេញ ៖ ក្រសួងការពារជាតិបានរៀបចំគម្រោងទស្សនកិច្ចពិសេសមួយដោយអញ្ជើញនាំយកអនុព័ន្ធយោធាប្រចាំស្ថានទូតនានានៅកម្ពុជា១៩ប្រទេស ធ្វើទស្សនកិច្ចនៅសមរភូមិមុខព្រំដែនប្រាសាទព្រះវិហារ ទីកន្លែងដែលបាញ់គ្នារយៈពេល៤ថ្ងៃ (ថ្ងៃទី៤ ដល់ទី៧ កុម្ភៈ) ដើម្បីបង្ហាញអនុព័ន្ធយោធាទាំងនោះឱ្យបានឃើញជ្រួតជ្រាបពីកន្លែងរងគ្រោះដែលទាហានសៀមឈ្លានពាន ជាពិសេសការខូចខាត បែកបាក់របស់ប្រាសាទព្រះវិហារ ក្រោមការបាញ់កម្ទេចពីសំណាក់ទាហានសៀមដែលភ្ជាប់ជាមួយគ្រាប់បែកចង្កោម ដាក់ក្នុងកាំភ្លើងធំប្រភេទ១០៥មិល្លីម៉ែត្រ រហូតដល់១៥០មិល្លីម៉ែត្រ ។
អ្នកនាំពាក្យក្រសួងការពារជាតិ លោកឧត្តមសេនីយ៍ឯកឈុំ សុជាតិ បានមានប្រសាសន៍ឱ្យដឹងថា ដំណើរទស្សនកិច្ចរបស់អនុព័ន្ធយោធា១៩ប្រទេសប្រចាំនៅកម្ពុជា ដែលរៀបចំដោយក្រសួងការពារជាតិនេះ នឹងធ្វើឡើងនៅថ្ងៃទី៣ មីនា ២០១១ ស្អែកនេះ គឺយើងចង់បង្ហាញការពិតដល់អនុព័ន្ធយោធាឱ្យបានជ្រាបច្បាស់ឃើញផ្ទាល់ភ្នែក…កុំឱ្យយើងចេះតែថា ដោយគ្មានទឡ្ហីករណ៍ ។ សូមបញ្ជាក់ថា ការអញ្ជើញអនុព័ន្ធយោធា១៩ប្រទេសទៅកាន់ព្រំដែនព្រះវិហារនេះ គឺធ្វើឡើងបន្ទាប់ពីរដ្ឋាភិបាលថៃបាននាំអនុព័ន្ធយោធារបៀបគ្នានេះទៅកាន់តំបន់ព្រំដែនក្នុងទឹកដីរបស់គេ ដើម្បីពិនិត្យមើលការខូចខាតផងដែរ ជាពិសេសផ្ទះក្រហមរបស់ថៃនេះតែម្តង ៕
ចែករំលែកព័តមាននេះ