តាំងតែពីដើមរៀងមកចាស់ទុំបរមបូរាណខ្មែរយើងបានបង្កើតទំនៀមទម្លាប់ ប្រពៃណី វប្បធម៌ អរិយធម៌ ពិសេសបង្កើតពិធីបុណ្យទានជាច្រើន ដើម្បីអប់រំនិស្ស័យសង្គមឲ្យជាប់នឹងព្រះពុទ្ធសាសនា ដូចជាបុណ្យកឋិន បុណ្យភ្ជុំបិណ្ឌ បុណ្យចូលឆ្នាំ បុណ្យស្រង់ព្រះ បុណ្យស្រោចស្រពដូនតាចាស់ទុំ បុណ្យបំបួសនាគជាដើម សុទ្ធតែជាកិច្ចល្អសម្រាប់ការងារសង្គមដ៏ល្អប្រពៃ ។
ការប្រមូលគ្នាទៅកាន់វត្តអារាមនេះមានប្រយោជន៍ណាស់ ព្រោះជាឱកាសល្អនាំឲ្យប្រជាបរិស័ទបានស្គាល់គ្នា រាប់រកគ្នា ប្រាស្រ័យនូវគ្នានឹងគ្នា ចេះយោគយល់គ្នា មានគំនិតរួបរួមគ្នា ដើម្បីបំពេញកុសល ឬសម្រេចកិច្ចការសន្តិសុខសង្គម ។
ឧបាសកឧបាសិកាដែលមានសទ្ធាសមាទានសីលក៏ជាកិច្ចការសង្គមមួយដ៏ប្រសើរ ព្រោះបានដុសខាត់សង្គមឲ្យស្អាតបរិសុទ្ធ ឲ្យមានចរិយាប្រសើរ មានសីលធម៌សង្គមខ្ពស់ ចំណែកឯការបំពេញទានដល់សង្ឃ ក៏ជាការងារសង្គមមួយដ៏ប្រសើរផងដែរ នាំឱ្យយើងចេះដុសខាត់សម្អាតចិត្ត ជម្រះសេចក្ដីកំណាញ់ កុំឱ្យគិតតែពីប្រយោជន៍ផ្ទាល់ខ្លួន ត្រូវបណ្តុះចិត្តគិតផ្ដល់ប្រយោជន៍និងសេចក្ដីសុខដល់អ្នកដទៃផង ។
លើសពីនេះទៅទៀត ការប្រមូលគ្នាទៅកាន់វត្តអារាមក៏ជាឱកាសមួយដ៏ប្រសើរ ព្រោះអាចយកពេលជួបគ្នានេះសម្រាប់ជជែក ពិភាក្សាគ្នាអំពីកិច្ចការសង្គមនាំឲ្យកើតសេចក្ដីសុខក្សេមក្សាន្តដល់ការរស់នៅរបស់ប្រជាពលរដ្ឋតរៀងទៅ ។
ចែករំលែកព័តមាននេះ