រាជធានីភ្នំពេញ ៖ មន្ត្រីជាន់ខ្ពស់នៃរាជរដ្ឋាភិបាលកម្ពុជា បានអះអាងជាសាធារណៈថា នឹងប្ដេជ្ញាការពារទប់ស្កាត់មិនឲ្យតម្លៃកសិផលរបស់ប្រជាកសិករធ្លាក់ចុះនៅក្នុងឆ្នាំថ្មី ឆ្នាំ២០១៩នេះឡើយ ហើយសន្យាថា នឹងអនុវត្តឲ្យបានម៉ឺងម៉ាត់នូវគោលនយោបាយរបស់រាជរដ្ឋាភិបាលកម្ពុជា ក្នុងការរក្សាតម្លៃកសិផល និងផលិតផលក្នុងស្រុកដទៃទៀត…
រាជធានីភ្នំពេញ ៖ មន្ត្រីជាន់ខ្ពស់នៃរាជរដ្ឋាភិបាលកម្ពុជា បានអះអាងជាសាធារណៈថា នឹងប្ដេជ្ញាការពារទប់ស្កាត់មិនឲ្យតម្លៃកសិផលរបស់ប្រជាកសិករធ្លាក់ចុះនៅក្នុងឆ្នាំថ្មី ឆ្នាំ២០១៩នេះឡើយ ហើយសន្យាថា នឹងអនុវត្តឲ្យបានម៉ឺងម៉ាត់នូវគោលនយោបាយរបស់រាជរដ្ឋាភិបាលកម្ពុជា ក្នុងការរក្សាតម្លៃកសិផល និងផលិតផលក្នុងស្រុកដទៃទៀត ។
ក្នុងពិធីបិទសន្និបាតបូកសរុបការងារពាណិជ្ជកម្មឆ្នាំ២០១៨ និងទិសដៅអនុវត្តការងារឆ្នាំ២០១៩របស់ក្រសួងពាណិជ្ជកម្ម កាលពីថ្ងៃទី២៧ ធ្នូ កន្លងមក លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ថា ដើម្បីជំរុញពាណិជ្ជកម្មក្នុងស្រុកឲ្យកាន់តែទូលំទូលាយ និងមានទីផ្សារកាន់តែច្រើននោះ លោកនឹងជំរុញដល់ក្រសួង និងស្ថាប័នពាក់ព័ន្ធ រៀបចំអនុវត្តគោលនយោបាយជួយកសិករ ផលិតករ នៅតាមមូលដ្ឋាន និងតាមសហគមន៍ និងបង្រៀនពួកគេពីរបៀបធ្វើកសិកម្មតាមបែបទំនើប និងរបៀបប្រមូលផងដែរ ។
លោកឧបនាយករដ្ឋមន្ត្រី បានបញ្ជាក់ថា ៖« មន្ត្រីពាក់ព័ន្ធទាំងអស់ត្រូវបន្តអនុវត្តឲ្យបាននូវគោលនយោបាយរបស់រដ្ឋាភិបាលកម្ពុជា ក្នុងឆ្នាំ ២០១៩នេះ ដូចជា ធានានូវតម្លៃកសិផលរបស់ប្រជាកសិករដែលផលិតបាន ដូច្នេះកសិករដែលផលិតបានហើយ នឹងមិនមានការព្រួយបារម្ភពីការធ្លាក់ចុះនៃតម្លៃកសិផលទៀតឡើយ ហើយចំណុចទាំងនេះមានសារសំខាន់ណាស់ ក្នុងការគ្រប់គ្រងស្ថានភាពសេដ្ឋកិច្ចជារួម »។
លោកបណ្ឌិតសង្កត់ធ្ងន់ថា ៖«ក្រសួងពាណិជ្ជកម្មត្រូវសហការជាមួយក្រសួងកសិកម្ម ដើម្បីធ្វើទំនើបកម្មលើវិស័យកសិកម្ម កម្មន្តសាល ឧស្សាហកម្មកែច្នៃ-ដំឡើង ឧស្សាហកម្មផ្នែកអេទ្បិចត្រូនិក ស្របតាមគោលនយោបាយអភិវឌ្ឍន៍ឧស្សាហកម្ម(IDP ២០១៥ – ២០២៥) ហើយត្រូវរៀបចំកម្មវិធីការងារដើម្បីជួយដល់វិស័យឯកជន ដើម្បីតភ្ជាប់ការងារពាណិជ្ជកម្ម និងដឹកជញ្ជូន និងភស្តុភារកម្ម និងជំរុញកិច្ចសម្រួលពាណិជ្ជកម្ម សំដៅកាត់បន្ថយថ្លៃដើមសម្រាប់រុញការអភិវឌ្ឍសហគ្រាសមីក្រូ ខ្នាតតូច និងមធ្យម (MSMEs) របស់កម្ពុជា »។
លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម មានប្រសាសន៍ផងដែរថា ដើម្បីលើកទឹកចិត្តដល់ផលិតករ និងវិស័យឯកជនកម្ពុជា ឲ្យខិតខំបង្កើតគំនិតច្នៃប្រឌិត ផលិតចេញនូវទំនិញថ្មីៗសម្រាប់បម្រើទីផ្សារទាំងក្នុង និងក្រៅប្រទេស ក្រសួងពាណិជ្ជកម្មបានរៀបចំយុទ្ធនាការទិញផលិតផលខ្មែរ ក្នុងក្របខ័ណ្ឌទូទាំងប្រទេស ដោយបានរៀបចំពិព័រណ៍ផលិតផលខ្មែរ នាឱកាសយុទ្ធនាការទិញផលិតផលខ្មែរចំនួន៧លើកនៅខេត្តកណ្តាល ខេត្តកំពង់ឆ្នាំង ខេត្តស្វាយរៀង ខេត្តបន្ទាយមានជ័យ ខេត្តព្រៃវែង រាជធានីភ្នំពេញ និងខេត្តកោះកុង ក្នុងគោលបំណង បំផុសប្រជាជនកម្ពុជាឲ្យគាំទ្រ និងប្រើប្រាស់ផលិតផលខ្មែរ ដែលព្រឹត្តិការណ៍នេះទទួលបានការគាំទ្រយ៉ាងខ្លាំងពីសំណាក់ថ្នាក់ដឹកនាំ និងប្រជាជនកម្ពុជាទូទាំងប្រទេស ។
លោករដ្ឋមន្ត្រីបន្តថា ក្នុងទិសដៅជំរុញទំនាក់ទំនងពាណិជ្ជកម្មជាមួយបរទេស និងជំរុញការនាំចេញផលិតផលខ្មែរ ទៅក្រៅប្រទេស ក្រសួងពាណិជ្ជកម្មបានចូលរួមពិព័រណ៍ពាណិជ្ជកម្មក្រៅប្រទេសចំនួន៣០លើក និងបានរៀបចំសម្របសម្រួលឲ្យមានព្រឹត្តិការណ៍ពិព័រណ៍ពាណិជ្ជកម្មចំនួន៩៤លើក ។ ម្យ៉ាងវិញទៀត កម្ពុជាក៏បានបង្កើត និងសម្ពោធមជ្ឈមណ្ឌលពាណិជ្ជកម្មកម្ពុជានៅទីក្រុងហុងកុង ទីក្រុងក្វាងចូវ ទីក្រុងស៊ីអាន ជាដើម ដែលមានការដាក់តាំងបង្ហាញផលិតផលខ្មែរ និងឯកសារផ្សព្វផ្សាយ ទាក់ទងនឹងវិស័យពាណិជ្ជកម្ម ជាអចិន្ត្រៃយ៍របស់កម្ពុជា និងកំពុងដំណើរការរៀបចំបង្កើតមជ្ឈមណ្ឌល២ថែមទៀត នៅទីក្រុងប៉េកាំង និងទីក្រុងគុនមីង ប្រទេសចិន ។
លោកបន្ថែមថា ថ្នាក់ដឹកនាំក្រសួងពាណិជ្ជកម្មតែងតែស្វែងរកទីផ្សារសម្រាប់កសិផលិតផលរបស់ខ្មែរ នៅរាល់ពេលពេលថ្នាក់ដឹកនាំ ក្រសួងចុះទស្សនកិច្ចនៅតាមបណ្ដាប្រទេសដែលមានទីផ្សារធំៗនៅលើសាកលលោក ដូចជា នៅបណ្ដាប្រទេសអឺរ៉ុប អាស៊ី ជាដើម ។ ជាលទ្ធផល មានវិនិយោគិនបណ្ដាប្រទេសទាំងនោះ ក៏បានចាប់អារម្មណ៍ និងចង់វិនិយោគនៅកម្ពុជា និងនាំផលិតផលកម្ពុជា ទៅកាន់ប្រទេសគេទៀតផងដែរ ។
តាមរយៈកិច្ចប្រឹងប្រែងរបស់ក្រសួងពាណិជ្ជកម្ម ជាការកត់សម្គាល់ កម្ពុជាបានទទួលជោគជ័យលើការបើកទីផ្សារ និងនាំចេញទំនិញទៅកាន់ប្រទេសចំនួន១៤៧ ក្នុងពិភពលោក។ ជាមួយគ្នានេះ ទំហំនៃការផ្លាស់ប្តូរពាណិជ្ជកម្មរបស់កម្ពុជា នៅក្នុងឆ្នាំ២០១៨ ជាមួយបណ្តាប្រទេសនានា សម្រេចបានទំហំទឹកប្រាក់២៤.៩៨៥លានដុល្លារអាមេរិក កើនឡើងប្រមាណ៥% បើធៀបនឹងឆ្នាំ២០១៧ ដែលមានទឹកប្រាក់ត្រឹម ២៣.៧៩៦លានដុល្លារអាមេរិក ៕
ចែករំលែកព័តមាននេះ