ខេត្តសៀមរាប ៖ បើតាមសេចក្តីរាយការណ៍បឋមឲ្យដឹងថា មានការភ្ញាក់ផ្អើលមួយដោយគេបានប្រទះឃើញមនុស្សម្នាក់ដេកស្លាប់នៅក្នុងព្រលានយន្តហោះអន្តរជាតិសៀមរាប ខេត្តសៀមរាប កាលពីម៉ោង១២ព្រឹក ថ្ងៃទី៣១ ខែធ្នូ ឆ្នាំ២០១៨ ។…
ខេត្តសៀមរាប ៖ បើតាមសេចក្តីរាយការណ៍បឋមឲ្យដឹងថា មានការភ្ញាក់ផ្អើលមួយដោយគេបានប្រទះឃើញមនុស្សម្នាក់ដេកស្លាប់នៅក្នុងព្រលានយន្តហោះអន្តរជាតិសៀមរាប ខេត្តសៀមរាប កាលពីម៉ោង១២ព្រឹក ថ្ងៃទី៣១ ខែធ្នូ ឆ្នាំ២០១៨ ។ ក្រោយពេលមានការភ្ញាក់ផ្អើលនោះ សាកសពជនរងគ្រោះត្រូវបានគេដឹកចេញភ្លាមៗយកទៅតម្កល់ទុកនៅក្នុងមន្ទីរពេទ្យបង្អែកខេត្តសៀមរាប ដែលមិនទាន់ស្គាល់អត្តសញ្ញាណនៅឡើយទេ។
សេចក្តីរាយការណ៍បានបន្តទៀតថា លុះដល់ម៉ោង២និង៣០នាទីរសៀលថ្ងៃដដែលនោះ កម្លាំងសមត្ថកិច្ចគ្រប់ផ្នែក រួមជាមួយនគរបាលជំនាញបច្ចេកទេសក្រោមការសម្របសម្រួលពីស្ថាប័នអយ្យការអមសាលាដំបូងខេត្ត និងមានការចូលរួមពីអ្នកគ្រប់គ្រងព្រលានយន្តហោះ បានចុះធ្វើការពិនិត្យសាកសព និងបើកការស៊ើបអង្កេតទៅលើ៣ចំណុច ៖ ១-ស្វែងរកសម្ភាសន៍សាក្សី ២-ពិនិត្យកន្លែងកើតហេតុ និង៣-ធ្វើការពិនិត្យទៅលើកាមេរ៉ាសុវត្ថិភាព ។
ជាលទ្ធផលជាក់ស្តែងតាមការពិនិត្យលើកាមេរ៉ាសុវត្ថិភាព គឺនៅម៉ោង៥និង០៣នាទីព្រឹក ថ្ងៃទី៣១ ធ្នូ បានឃើញសកម្មភាពមនុស្សម្នាក់ដើរទៅរកយន្តហោះស្កាយ បន្ទាប់មកបន្តដើរទៅ JC ហើយបន្តទៅយន្តហោះកើតហេតុ ឡានម៉ី ។ ដោយមនុស្សម្នាក់នោះបានដើរទៅដេកនៅក្នុងគម្របកន្លែងកង់របស់យន្តហោះ លុះដល់ម៉ោង១០និង២០នាទីយន្តហោះបានធ្វើការហោះហើរ ដោយមិនបានដឹងថា មានមនុស្សចូលទៅសំងំក្នុងកង់យន្តហោះនោះឡើយ ។
តាមការបំភ្លឺពីសាក្សីឈ្មោះ លឿម រុំ ភេទប្រុស បានឱ្យដឹងថា នៅម៉ោងប្រហែល១០និង២០នាទីព្រឹក ថ្ងៃទី៣១ ធ្នូ ពេលខ្លួនកំពុងធ្វើការក៏បានឃើញយន្តហោះដែលកំពុងតែហោះហើរ មានកំពស់ប្រហែល៣០ម៉ែត្រ ស្រាប់តែឃើញមានមនុស្សម្នាក់ធ្លាក់ពីកង់យន្តហោះនោះដែលមានចំងាយពីខ្លួនប្រហែល២០០ម៉ែត្រ ហើយយន្តហោះនោះក៏ហោះហើរបាត់ទៅ ។
តាមការពិនិត្យរបស់ជំនាញបច្ចេកទេសបានឱ្យដឹងថា សាកសពជនរងគ្រោះស្លាប់មានសភាព បាក់ដៃជើងរយះជើងភ្លៅ ។ ហើយសាកសពជនរងគ្រោះនៅមិនទាន់កំណត់អត្តសញ្ញាណបាននោះទេ សមត្ថកិច្ចកំពុងបន្តស្វែងរកសាច់ញាតិ ៕
ចែករំលែកព័តមាននេះ