ខេត្តបន្ទាយមានជ័យ ៖ រឿងរ៉ាងសង្ឃលួចមានស្រី និងឆាន់ចំណីអាហារក្រៅវត្តនៅខេត្តបន្ទាយមានជ័យ ស្ទើរក្លាយជារឿងសាមញ្ញទៅហើយ ព្រោះតែច្បាប់ធូរលុងលើអ្នកបួសដែលយកសាសនាទៅជាន់ឈ្លី និងធ្វើជាមុខរបរ។
ជាក់ស្តែងគ្រាន់តែក្នុងឆ្នាំ2018នេះ ករណី៤ផ្សេងគ្នាបានកើតឡើងដោយសង្ឃទី១ ជាប់ចោទស្រីប្តឹង (រឿងឆាន់ពោត) សង្ឃទី២ ជាប់ចោទចាក់ស្រី សង្ឃទី៣ បែកធ្លាយរូបទៅលួចធ្វើខួបកំណើតមានប្រពន្ធ មានកូន និងសង្ឃទី៤ បែកធ្លាយរូបកំពុងឱបស្រី និងឆាន់ចំណីអាហារមានទាំងសុរា ក្រៅវត្តយ៉ាងត្រេកត្រអាល។
សង្ឃជាប់ចោទទី៤ ត្រូវបានគេស្គាល់អត្តសញ្ញាណហើយ ជាចៅអធិការវត្តពោធិសុវណ្ណសិលារាមឈ្មោះ តឿ ប៊ុនធឿន។ ចៅអធិការវត្តអង្គនេះ បែកធ្លាយរូបកំពុងឱបស្រីក្មេងយ៉ាងមានក្តីសុខលើអង្រឹង និងអង្គុយឆាន់អាហារមានទាំងសុរាពេញលើតុ មានស្រីក្មេងអមសងខាងជាមួយអតីតចៅអធិការវត្តទួលលក្ខរស្មីមានជ័យ ហៅវត្តទួលពង្រ ដែលទើបលាលែងពីតំណែងក្រោយបែកធ្លាយរឿងអាស្រូវ និងសុំទៅផ្សឹកនៅឯស្រុកកំណើតក្នុងខេត្តពោធិ៍សាត់ កាលពីថ្ងៃទី26 ធ្នូ 2018។
តើសាសនានឹងទៅជាយ៉ាងណា បើអ្នកបួសមួយចំនួនហើយសុទ្ធសឹងជាចៅអធិការវត្ត បែរជាជាន់ឈ្លីសាសនា និងយកសាសនាធ្វើជាមុខរបរបែបនេះ?
ក្រោយផ្ទុះរឿងជាបន្តបន្ទាប់ពាក់ព័ន្ធនឹងបញ្ហាខាងលើ ប្រភពអ្នកស្រុកនិយាយថា គួរតែក្រសួងធម្មការពិសេស និងស្ថាប័នច្បាប់គិតគូលើករណីនេះ មិនត្រូវឲ្យអ្នកប្រព្រឹត្តិខុសធ្ងន់ធ្ងរលើវិស័យសាសនារួចខ្លួនពីសំណាញ់ច្បាប់ឡើយ។ ប្រភពបន្តទៀតថា បើអ្នកយកសាសនាទៅជាន់ឈ្លី និងធ្វើជាមុខរបរចេះតែរួចខ្លួន ថ្ងៃក្រោយការប្រព្រឹត្តិខុសប្រាកដជាមានកាន់តែច្រើនធ្វើឲ្យវិស័យសាសនា ដែលជាសាសនារបស់រដ្ឋកាន់តែធ្លាក់ចុះខ្លាំងឡើងជាមិនខាន។
ជុំវិញករណីនេះ ចៅអធិការវត្តពោធិសុវណ្ណសិលារាម ហៅវត្តអណ្តូងថ្ម បានមានសង្ឃដីកាបដិសេធថា ជារឿងមិនពិតហើយថា មិនមែនជារូបព្រះអង្គឡើយ។ ដោយឡែកព្រះគ្រូអនុគុណក្រុងប៉ោយប៉ែតព្រះនាម ប៉ុក ចំរើន មានសង្ឃដីកាថា ព្រះអង្គមិនទាន់បានទទួលព័ត៌មានខាងលើនៅឡើយទេ ហើយថា បើអ្នកណាដឹង និងមានភស្តុតាង សូមយកទៅជូនព្រះអង្គ និងសុំធ្វើកាដោះស្រាយសិន។
បើទោះជាសង្ឃជាប់ចោទធ្វើការបដិសេធ ហើយព្រះអនុគុណក្រុងប៉ោយប៉ែត មានសង្ឃដិកាថា មិនទាន់ដឹងរឿងពិតប្រាកដ ប៉ុន្តែលោក យ៉ិន យឿន ប្រធានមន្ទីរធម្មការ និងសាសនាខេត្តបន្ទាយមានជ័យ ប្រាប់តាមទូរស័ព្ទក្នុងពេលវេលាខុសគ្នាមិនដល់10នាទីផងថា ចៅអធិការវត្តពោធិសុវណ្ណសិលារាម ហៅវត្តអណ្តូងថ្មមាស បានសារភាពពីកំហុសឆ្គងដែលបែកធ្លាយរូបនោះពិតប្រាកដមែន។
លោកប្រធានមន្ទីរបន្តថា ពេលនេះលោកបានឲ្យខាងធម្មការ និសាសនាក្រុង និងសាលាអនុគុណក្រុងប៉ោយប៉ែត រៀបចំផ្សឹកសង្ឃខាងលើហើយ នៅរសៀលថ្ងៃទី31 ធ្នូ 2018នេះ៕
ចែករំលែកព័តមាននេះ