រាជធានីភ្នំពេញ ៖ ខណ្ឌចំការមន គឺជាខណ្ឌមួយដែលមានសក្ដានុពលសេដ្ឋកិច្ចខ្លាំងជាងគេ ក្នុងចំណោមខណ្ឌទាំង១២នៃរាជធានីភ្នំពេញ ពិសេសគឺតំបន់បឹងកេងកង និងតំបន់ក្នុងសង្កាត់ទន្លេបាសាក់ ។ អ្វីដែលស្ដែងឲ្យឃើញកាន់តែច្បាស់នោះគឺលើវិស័យសំណង់ក្នុងខណ្ឌនេះ បាននិងកំពុងរីកដុះដាលខ្លាំងជាងគេ…
រាជធានីភ្នំពេញ ៖ ខណ្ឌចំការមន គឺជាខណ្ឌមួយដែលមានសក្ដានុពលសេដ្ឋកិច្ចខ្លាំងជាងគេ ក្នុងចំណោមខណ្ឌទាំង១២នៃរាជធានីភ្នំពេញ ពិសេសគឺតំបន់បឹងកេងកង និងតំបន់ក្នុងសង្កាត់ទន្លេបាសាក់ ។ អ្វីដែលស្ដែងឲ្យឃើញកាន់តែច្បាស់នោះគឺលើវិស័យសំណង់ក្នុងខណ្ឌនេះ បាននិងកំពុងរីកដុះដាលខ្លាំងជាងគេ ហើយតម្លៃដីធ្លីក៏ខ្ពស់ជាងគេដែរ រហូតដល់អ្នកជំនាញនិយាយថា ជាតំបន់ខ្វះដីលក់ទៅហើយ ។
ខណ្ឌនេះមានសង្កាត់ចំនួន១២ ដែលក្នុងសង្កាត់នីមួយៗសម្បូរដោយមជ្ឈមណ្ឌពាណិជ្ជកម្ម ហាងលក់ទំនិញ និងផ្សារតូចធំ ទាំងផ្សារទំនើប និងផ្សារប្រពៃណី ។
បើតាមលោក ព្រុំ សំខាន់ អភិបាលខណ្ឌចំការមនបានឱ្យដឹងថា ក្នុងខណ្ឌនេះមានផ្សារធំៗដែលស្ថិតនៅក្រោមការគ្រប់គ្រងរបស់រដ្ឋចំនួន៤ គឺផ្សារអូឡាំពិក ផ្សារទួលទំពូង ផ្សារបឹងកេងកង និងផ្សារកាប់គោ ។ ក្រៅពីនេះ ក៏មានផ្សារទំនើបធំៗរបស់ឯកជនជាច្រើនទៀតដែរដូចជា ផ្សារទំនើបអុីអនម៉ល ផ្សារបឹងត្របែកផ្លាហ្សា ផ្សារទំនើបឡាក់គី ផ្សារសុវណ្ណា ផ្សារថៃហួត រួមទាំងម៉ាតធំតូច និងផ្សារតូចៗ តាមតំបន់មួយចំនួនទៀត ដូចជាម៉ាតតាមស្ថានីយប្រេងឥន្ធនៈជាដើម ។
លោកអភិបាលខណ្ឌ បន្ដថា ផ្សារទួលទំពូងស្ថិតនៅក្នុងសង្កាត់ទួលទំពូងទី១, ផ្សារបឹងកេងកង ស្ថិតនៅក្នុងសង្កាត់បឹងកេងកងទី១ និងផ្សារកាប់គោស្ថិតនៅក្នុងសង្កាត់ទន្លេបាសាក់។ ចំណែកផ្សារអូឡាំពិក ជាផ្សារឯកជនដ៏ធំមួយដំបូងគេដែលឯកជនស្ថាបនា ស្ថិតនៅលើទីតាំងផ្សារចាស់ សង្កាត់អូឡាំពិក ។
លោកព្រុំ សំខាន់ ក៏បានឲ្យដឹងផងដែរថា សង្កាត់ទាំង១២ នៅក្នុងភូមិសាស្ត្រខណ្ឌចំការមន រួមមាន ៖
១-សង្កាត់អូឡាំពិក ២-សង្កាត់ទួលស្វាយព្រៃទី១ ៣-សង្កាត់ទួលស្វាយព្រៃទី២
៤-សង្កាត់បឹងកេងកងទី១ ៥-សង្កាត់បឹងកេងកងទី២ ៦-សង្កាត់បឹងកេងកងទី៣
៧-សង្កាត់ទួលទំពូងទី១ ៨-សង្កាត់ទួលទំពូងទី២ ៩-សង្កាត់ផ្សារដើមថ្កូវ
១០-សង្កាត់បឹងត្របែក ១១-សង្កាត់ទំនប់ទឹក ១២-សង្កាត់ទន្លេបាសាក់
លោកអភិបាលខណ្ឌ បញ្ជាក់ថា ៖« ខណ្ឌចំការមនមានផ្ទៃដីសរុបចំនួនទំហំ១.០៥៣ហិកតា៤អា និង៦សង្ទីអា ដោយបានបែងចែកជា១២សង្កាត់ និងភូមិចំនួន៩២ ដែលមានប្រជាជនរស់នៅសរុបចំនួន១៨.៧៦៧គ្រួសារ »។
គួរកត់សម្គាល់ថា បច្ចុប្បន្ន ខណ្ឌធំៗនៅក្នុងរាជធានីភ្នំពេញ ដែលកំពុងមានសក្ដានុពលសេដ្ឋកិច្ចជាងគេ រួមមាន ខណ្ឌចំការមន ដូនពេញ ៧មករា និងខណ្ឌទួលគោក ដែលខណ្ឌទាំងអស់នេះសម្បូរដោយមជ្ឈមណ្ឌលពាណិជ្ជកម្ម និងអគារខ្ពស់ៗ ។
កំណើនការវិនិយោគនេះ ដោយសារតែមានកត្តាសំខាន់ៗជាច្រើនដែលកំពុងទាក់ទាញអ្នកវិនិយោគ ដូចជា លំហូរនៃទុនវិនិយោគផ្ទាល់ពីបរទេសកើនឡើង(FDI)។ កម្ពុជាមានច្បាប់វិនិយោគពិសេស ដែលអនុញ្ញាត្តឲ្យជនបរទេសកាន់កាប់ក្រុមហ៊ុន១០០%ដោយខ្លួនឯងបាន ។ កំណើនសេដ្ឋកិច្ចរឹងមាំរបស់កម្ពុជា ដែលធ្វើឲ្យប្រាក់ចំណូលប្រជាជនកើនឡើង ។ ការវិនិយោគលើវិស័យអចលនទ្រព្យកើនឡើងខ្ពស់ ពិសេសលំនៅឋាន អគារការិយាល័យ និងលំនៅឋានបែបសហកម្មសិទ្ឋ(ខុនដូ) ។ ការពង្រីកហេដ្ឋារចនាសម្ព័ន្ថរបស់រាជរដ្ឋាភិបាលកាន់តែមានភាពប្រសើរឡើង និង តម្រូវការប្រើប្រាស់ដីកើនឡើង ដោយសារកំណើនប្រជាសាស្ត្រ នៅក្នុងទីក្រុងភ្នំពេញបានកើនឡើងជាប់ជាប្រចាំ ៕
ចែករំលែកព័តមាននេះ