មួយថ្ងៃៗជីវិតយើងនេះតែងពើបប្រទះនូវហេតុការណ៍ជាច្រើនដែលនាំឱ្យយើងមានសុខខ្លះ មានទុក្ខខ្លះជារឿងធម្មតារបស់បុថុជ្ជនទៅហើយ។ តែភាគច្រើនអារម្មណ៍យើងតែងជួបប្រទះប៉ះទង្គិតនូវភាពតានតឹងចិត្ត ណែនក្នុងអារម្មណ៍ពោលគឺបានសុខតិចជាងទុក្ខដូចជា ទំនាស់ក្នុងគ្រួសារ, បន្ទុកការងារច្រើនពេក, ការមិនយល់ចិត្តគ្នា, ការមិនចុះសម្រុងក្នុងការងារ, ការបំពេញការងារពុំបានជោគជ័យ និងមានជំងឺប្រចាំកាយជាដើម សុទ្ធតែជារឿងទុក្ខសោក ។
កាលបើបុគ្គលកំពុងប្រឈមមុខនឹងបញ្ហាស្មុគស្មាញក្នុងអារម្មណ៍ គឺងាយនឹងធ្វើឲ្យយើងមានអារម្មណ៍មួម៉ៅ ឆេវឆាវ ឆាប់ខឹងច្រឡោត នឿយណាយធុញថប់ក្នុងអារម្មណ៍ ភ្លេចភ្លាំងច្រើន ខ្វល់ខ្វាយគិតព្រួយច្រើន នៅពេលបញ្ហាទាំងនេះកើតឡើងនាំឱ្យពិបាកផ្ចង់អារម្មណ៍ក្នុងការបំពេញការងារបំផុត ស្រួលមិនស្រួលងាយនឹងទាញចិត្តឱ្យបង្កើតអំពើហិង្សាភ្លាមមួយរំពេច ។
វិធីធ្វើឱ្យចិត្តរំសាយពីអារម្មណ៍តានតឹង យើងត្រូវខិតខំពង្រឹងផ្លូវចិត្តឲ្យបានរឹងមាំជាប្រចាំ ហើយគប្បីរកវិធីដោះស្រាយ ដើម្បីឲ្យការរស់នៅរបស់យើងប្រកបដោយស្ថានភាពល្អប្រសើរ។
មធ្យោបាយបំបាត់ការតានតឹងផ្លូវចិត្តមានច្រើនបែបច្រើនយ៉ាងដូចជា រកវិធីដោះស្រាយល្អៗ បណ្ដុះគំនិតបែបសុទិដ្ឋិនិយមប្រកបដោយគំនិតវិជ្ជមាន ព្រមទាំងមានក្ដីសង្ឃឹមជានិច្ចចំពោះអនាគត, ទទួលទានអាហារឲ្យទៀងទាត់ពេលវេលា សម្រាកឲ្យបានគ្រាប់គ្រាន់ និងធ្វើអ្វីៗបែបសប្បាយៗតាមតែតម្រូវការរបស់យើង ទាំងអស់នេះអាចនឹងធ្វើឱ្យចិត្តយើងស្រាល ស្រាកស្រាន្តបានខ្លះ ។
ចែករំលែកព័តមាននេះ