ទីក្រុងបាងកក ៖ប្រធាននាយកដ្ឋានសេដ្ឋកិច្ច និងគោលនយោបាយនៅធនាគារជាតិថៃ លោកស្រី Pornpen Sodsrichai បានឲ្យដឹងថា សេដ្ឋកិច្ចរបស់ប្រទេសថៃអាចនឹងបន្តលូតលាស់ក្នុងអំឡុងពេលត្រីមាសទី៤នាឆ្នាំនេះ ។
យោងតាមសារព័ត៌មានបាងកកប៉ុស្ដិ៍ ចេញផ្សាយកាលពីថ្ងៃទី២៩ ធ្នូ បានស្រង់សម្ដីលោកស្រីថា តម្រូវការក្នុងស្រុក និងការវិនិយោគគឺជាកត្តាជំរុញដ៏សំខាន់ដល់ការលូតលាស់សេដ្ឋកិច្ចក្នុងខែធ្នូ បន្ទាប់ពីមានការលូតលាស់បានយ៉ាងរឹងមាំនៅខែវិច្ឆិកា ។
កាលពីដើមខែនេះ ធនាគារជាតិបានកាត់បន្ថយការព្យាករលើការលូតលាស់សេដ្ឋកិច្ចថៃប្រចាំឆ្នាំ ២០១៨ ពី ៤,៤% នៅខែកញ្ញាមកស្មើ ៤,២% និងការព្យាករសម្រាប់ឆ្នាំ ២០១៩ ក៏បានកាត់បន្ថយពី៤,២% មកស្មើ៤%ផងដែរ ព្រោះតែការផ្អាកតម្រូវការបរទេស បន្ទាប់ពីភាពមិនប្រាកដប្រជាកើតមានឡើងពីជម្លោះពាណិជ្ជកម្មរវាងសហរដ្ឋអាមេរិក និងប្រទេសចិន ។
ផលិតផលក្នុងស្រុកសរុប (GDP) របស់ប្រទេសថៃលូតលាស់បាន៤,៩% កាលពីត្រីមាសទី១នាឆ្នាំ២០១៨ ប៉ុន្តែវាបានធ្លាក់មក ៤,៦%នៅត្រីមាសទី២ និង៣,៣%នៅត្រីមាសទី៣ ។ សម្រាប់៩ខែដំបូងវិញ សេដ្ឋកិច្ចថៃលូតលាស់បាន ៤,៣% ។
លោកស្រី Pornpen បាននិយាយទៀតថាសេដ្ឋកិច្ចក្នុងខែវិច្ឆិកាបន្តលូតលាស់ ព្រោះតែការចំណាយក្នុងវិស័យឯកជនដែលកើនឡើងបាន ៤,៤%បើធៀបនឹងឆ្នាំមុន ។ លោកស្រីថា ៖« ការទិញយានយន្តក៏មានភាពរឹងមាំដែរកាលពីខែធ្នូ ព្រោះតែការតាំងពិព័រណ៍យានយន្តអន្តរជាតិក្នុងប្រទេសថៃ »។
ការចំណាយឯកជនបានជំរុញដល់ផ្នែកផលិតកម្ម ជាពិសេសផលិតផលយានយន្តនិងប្រេងឥន្ធនៈ ។ ការវិនិយោគឯកជនបានកើនឡើង ៣,១%ផងដែរកាលពីខែវិច្ឆិកា ព្រោះតែការវិនិយោគក្នុងវិស័យម៉ាស៊ីន និងឧបករណ៍ ។ លោកស្រីបានបន្ថែមថា ចំនួនភ្ញៀវទេសចរដែលទៅកាន់ប្រទេសថៃបានកើនឡើង៤,៥%កាលពីខែវិច្ឆិកា ព្រោះតែកំណើនភ្ញៀវទេសចរពីអាស៊ី ៕
ចែករំលែកព័តមាននេះ