ខេត្តកណ្ដាល ៖ កម្លាំងនគរបាលផ្នែកព្រហ្មទណ្ឌនៃអធិការដ្ឋានស្រុកអង្គស្នួលសហការជាមួយនគរបាលប៉ុស្តិ៍លំហាចបានធ្វើការចាប់ខ្លួនជនសង្ស័យជួញដូរគ្រឿងញៀនម្នាក់ តាមដីកាបង្គាប់ឲ្យនាំខ្លួនរបស់សាលាដំបូងខេត្តកណ្ដាល ។ ការចាប់ខ្លួននោះបានធ្វើឡើងកាលពីវេលាម៉ោង១០និង២០នាទីព្រឹកថ្ងៃទី៣០ ខែធ្នូ ឆ្នាំ២០១៨ នៅក្នុងភូមិព្រៃទទឹង ឃុំលំហាច ស្រុកអង្គស្នួល ខេត្តកណ្តាល ។
ជនសង្ស័យខាងលើឈ្មោះ ផល គីមលាង អាយុ២៤ឆ្នាំ ជនជាតិខ្មែរ មុខរបរកសិករ រស់នៅក្នុងភូមិឃុំខាងលើ គឺជាមុខសញ្ញាជួញដូរគ្រឿងញៀនសកម្មម្នាក់នៅក្នុងភូមិសាស្ត្រឃុំលំហាចនោះ ។
នគរបាលបានឲ្យដឹងថា កន្លងមកកម្លាំងនគរបាលផ្នែកប្រឆាំងការជួញដូរគ្រឿងញៀនស្រុកអង្គស្នួលរួមជាមួយកម្លាំងនគរបាលផ្នែកព្រហ្មទណ្ឌស្រុក និងនគរបាលប៉ុស្តិ៍លំហាច បានកំណត់បានមុខសញ្ញាខាងលើ និងតាមចាប់ខ្លួនដែរ ប៉ុន្តែជនសង្ស័យបានគេចខ្លួនទើបចាប់មិនបាន ។
លុះក្រោយមកលោក ហុក វ៉ានធីណា ចៅក្រមស៊ើបសួរ នៃសាលាដំបូងខេត្តកណ្តាល បានចេញដីកាបង្គាប់ឲ្យនាំខ្លួនជននេះ លេខ633 ដ.ក.ប.ច.ខ ចុះថ្ងៃទី២៤ ខែធ្នូ ឆ្នាំ២០១៨ ពីបទជួញដូរដោយខុសច្បាប់នូវសារធាតុញៀនដែលប្រព្រឹត្តនៅភូមិតារ័ត្ន ឃុំលំហាច ស្រុកអង្គស្នួល ខេត្តកណ្តាល កាលពីថ្ងៃទី០៣ ខែវិច្ឆិកា ឆ្នាំ២០១៨ ។
ប្រភពដដែលបានបន្តទៀតថា បន្ទាប់ពីទទួលបានដីកាខាងលើនោះហើយកម្លាំងបានធ្វើការតាមចាប់ខ្លួនជននេះ រហូតដល់វេលាម៉ោង១០និង២០នាទីព្រឹកថ្ងៃទី៣០ ខែធ្នូ ឆ្នាំ២០១៨ ទើបតាមរកឃើញ និងចាប់ខ្លួនបាន និងនាំទៅសាកសួរដើម្បីបញ្ជូនទៅកាន់សាលាដំបូងខេត្តកណ្ដាលចាត់ការតាមច្បាប់ ។
ក្រោយពេលចាប់ខ្លួនជនសង្ស័យបានសារភាពថា ខ្លួនពិតជាបានធ្វើសកម្មភាពជួញដូរគ្រឿងញៀនពិតប្រាកដមែន ហើយក្រោយមកត្រូវបែកការណ៍ហើយក៏ត្រូវនគរបាលចាប់ខ្លួនបែបនេះតែម្ដង ៕
ចែករំលែកព័តមាននេះ