ខេត្តមណ្ឌលគិរី ៖ បន្ទាប់ពី រកឃើញទឹកជ្រោះថ្មីៗចំនួន១២ទីតាំងក្នុងដែនជម្រកការពារសត្វព្រៃ ណាមលៀរកន្លងទៅនេះអភិបាលខេត្តមណ្ឌលគិរីបានជម្រុញលើកទឹកចិត្តដល់បណ្តាអ្នកវិនិយោគ លើវិស័យទេសចរណ៍ចូលរួមអភិវឌ្ឍន៍សហការជាមួយអាជ្ញាធរមូលដ្ឋាន ដើម្បីកែប្រែតំបន់អេកូទេសចរណ៍ទាំងនោះសម្រាប់ទាក់ទាញភ្ញៀវទេសចរជាតិនឹងអន្តរជាតិទៅលេងកម្សាន្ត ។
លោកឯកឧត្តម ស្វាយ សំអ៊ាង មានប្រសាសន៍ថា «ពាក់ព័ន្ធនឹងសក្កានុពល ក៏ដូចជា តំបន់រមណីយដ្ឋានទេសចរណ៍ខេត្តមណ្ឌលគិរីរបស់យើងឃើញថា មានទឹកជ្រោះ មានតំបន់ទេសភាព វាជាកន្លែងមួយដែលកន្លងមក ខ្ញុំតែងណែនាំទៅដល់មន្ទីរទេសចរណ៍ក៏ដូចជា អាជ្ញាធរដែលនៅមូលដ្ឋាន ឲ្យខិតខំការងារស្រាវជ្រាវរកមើលតំបន់ទីតាំងរមណីយដ្ឋាននានា ដើម្បីប្រមូលផ្តុំកត់ត្រាកំណត់ជាកន្លែង តំបន់រមណីយដ្ឋាន អាហ្នឹង! កន្លងមកខ្ញុំក៏បានជម្រុញឲ្យអ្នកពាក់ព័ន្ធពង្រីង ដើម្បីទាក់ទាញអ្នកទេសចរណ៍» ។
ឯកឧត្តមអភិបាលខេត្តបន្តថា «បន្ទាប់ពីយើងស្រាវជ្រាវឃើញនូវសក្កានុពលនេះហើយ ខ្ញុំក៏បានខិតខំឲ្យអាជ្ញាធរនឹងជំនាញពាក់ព័ន្ធរិះរកមធ្យោបាយ ទី១ បញ្ហាផ្លូវ ទី២ ការរៀបចំកែទីតាំង ជាក់ស្តែងឲ្យមានសោភ័ណ្ឌភាពនឹងសេវាកម្មនានា ។ តាមរយៈការខិតខំច្នៃប្រឌិតនេះមន្ទីរជំនាញត្រូវ សហការគ្នាជាមួយអាជ្ញាធរមូលដ្ឋាន ហើយកន្លែងខ្លះខេត្តក៏ចង់ឲ្យសហគមន៍មូលដ្ឋានគាត់សហការគ្នា ដើម្បីរៀបចំតំបន់ហ្នឹង ជាកន្លែងមានផ្លូវចូល កន្លែងអង្គុយលេង ឲ្យបានស្អាតក៏ជាការរួមចំណែកមួយ សម្រាប់ការពង្រីកតំបន់រមណីយដ្ឋានទេសចរណ៍របស់យើងថែមទៀត» ។
អភិបាលខេត្តបញ្ជាក់ថា«អាជ្ញាធរខេត្តក៏ដូចជា អាជ្ញាធរស្រុក នៅមិនទាន់មានលិទ្ធភាពគ្រប់គ្រាន់ក្នុងការ អភិវឌ្ឍន៍វិនិយោគតំបន់ទាំងនោះប្រែក្លាយទៅជាកន្លែងទេសចរណ៍ពេញសក្កានុពលតែម្តងបានទេ អ៊ីចឹង!មានតែតាមរយៈការចូលរួមចំណែក ពីគ្រប់ភាគីពាក់ព័ន្ធ ហើយខេត្តក៏ទុកឱកាសសម្រាប់ក្រុមហ៊ុន វិនិយោគណាដែលចាប់អារម្មណ៍គាត់អាចចរចាពិភាក្សាជាមួយអាជ្ញាធរខេត្តជំនាញពាក់ព័ន្ធ ដើម្បីស្នើរសុំ ទីតាំងហ្នឹងធ្វើវិនិយោគបាន នឹងតាមគោលការណ៍ច្បាប់នេះ គឺជាវិធីសាស្ត្រដែលយើងខិតខំជម្រុញ ខិតខំពង្រីងតំបន់សក្កានុពល ដើម្បីឲ្យបានច្រើនទាក់ទាញភ្ញៀវទេសចរណ៍» ។
បើតាមការឲ្យដឹងពីលោក វុធ សារុំ នាយកដែនជម្រកសត្វព្រៃណាមលៀរថា «មន្ត្រីឧទ្យានុរក្សបានសហការមួយអង្គការ CEDT និងសហគមន៍ចំនួន០២ដើររុករកតំបន់ទឹកធ្លាក់តំបន់ដាំឫស្សី និងតំបន់អភិរក្សសត្វឃ្មុំ នៅចំណុចដីសហគមន៍ពូត្រែង និងពូឡេះ កាលពីដើមខែវិច្ឆិកា ឆ្នាំ២០១៨ ជាលទ្ធផលបានរកឃើញទឹកធ្លាក់ចំនួន១២កន្លែង (មិនទាន់កំណត់ឈ្មោះ)» ។
លោកវុធ សារុំ បញ្ជាក់ថា«ទឹកជ្រោះដែលធ្លាក់ទឹកស្អាតមានចំនួន០២កន្លែង គឺទឹកជ្រោះរនៀល និងទឹជ្រោះកបាល់ ដែលមានលេខនិយាមកា៧៥៩២៣៨-១៣៧២១៨៨នឹង៧៥៨៩៤១-១៣៧៣៤៩០ ស្ថិតនៅភូមិពូឡេះ ឃុំដាក់ដាំ ស្រុកអូររាំង ខេត្តមណ្ឌលគិរី» ។ ជុំវិញចំនួនទឹកជ្រោះនៅក្នុងខេត្តមណ្ឌលគិរីមានចំនួនសរុបប៉ុន្មានគិតត្រឹមព្រឹកថ្ងៃទី២៨ ខែធ្នូ ឆ្នាំ២០១៨ លោក ងិន សុវិមាន ប្រធានមន្ទីរទេសចរណ៍ខេត្តមិនបានឆ្លើយតបជាមួយអ្នកយកព័ត៌មានកោះសន្តិភាពទេ ប្រហែលលោកមិនបានជ្រាបពីចំនួនពិតប្រាកដនៃវត្តមានទឹកជ្រោះក្នុងដែនដីគ្រប់គ្រងរបស់ខ្លួនឡើយ ។
យោងទៅលើព័ត៌មានដែលកោះសន្តិភាពទទួលបានក្នុងខេត្តមណ្ឌលគិរី មានទឹកជ្រោះដូចជា ទឹកជ្រោះ ប៊ូស្រា ទឹកជ្រោះដំណាក់ស្តេច ទឹកជ្រោះរមនា១ ទឹកជ្រោះរមនា២ ទឹកជ្រោះជ្រៃធំ ទឹកជ្រោះជ្រៃយស ទឹកជ្រោះលែងអងឡែងឃិន ទឹកជ្រោះក្បាលព្រះ ។
លោក កែវ សុភគ៌ ប្រធានមន្ទីរបរិស្ថានខេត្តមណ្ឌលគិរីឲ្យដឹងថា«វិសាលភាពធនធានធម្មជាតិលើទឹកដី ខេត្តមណ្ឌលគិរីមានទំហំធំធេងលាតសន្ធឹងពេញផ្ទៃខេត្តដល់ទៅចំនួន៩៤៣៦៩៥ហិកតា ដោយក្នុងនោះ ខេត្តមានដែនជម្រកការពារសត្វព្រៃចំនួន៥ គ្រប់គ្រងដោយមន្ទីរបរិស្ថានមានដូចជា ដែនជម្រកសត្វ ព្រៃកែវសីមាមានផ្ទៃដីទំហំ២៩២៦៩០ ហិកតា ដែនជម្រកសត្វព្រៃភ្នំព្រេចទំហំផ្ទៃដី ២២២ ៥០០ ហិកតា ដែនជម្រកសត្វព្រៃលំផាត់ទំហំផ្ទៃដី ៤៨ ៣៧៤ ហិកតា ដែនជម្រកសត្វព្រៃស្រែពកផ្ទៃដីទំហំ៣៥៨ ១៩៨ ហិកតា ដែនជម្រកសត្វព្រៃភ្នំណាមលៀរ មានផ្ទៃដី២១ ៩៣៣ ហិកតា ។
ដោយគម្រោងដែលក្រសួងបរិស្ថានកំពុងចុះពិនិត្យវាយតម្លៃនោះមានចំនួន៤គម្រោងវិនិយោគលើ ផ្ទៃដីសរុប៤០ហិកតា ។ ប្រសិនគម្រោងនេះទទួលបានជោគជ័យគេរំពឹងថា ប្រជាពលរដ្ឋក្នុងតំបន់ខាងលើ នឹងទទួលបានអត្ថប្រយោជន៏ច្រើនពីការអភិវឌ្ឍន៏ជាក់ស្តែង ព្រោះទឹកធ្លាក់ក្បាលព្រះមានទេសភាព ស្អាតមិនចាញ់ទឹកជ្រោះប៊ូស្រាទេប្រាកដជាទាក់ទាញទេសចរណ៍បានច្រើននាអនាគត៕
ចែករំលែកព័តមាននេះ