ខេត្តកណ្ដាល ៖ ជនសង្ស័យម្នាក់បានប្រើល្បិចបោកលុយពីបុរសអ្នកទិញ និងលក់អេតចាយម្នាក់បានជិត១ពាន់ដុល្លារ បន្ទាប់មកបានរត់គេចខ្លួនបាត់ស្រមោល ពេលនោះបុរសជាជនរងគ្រោះមិនបានដាក់ពាក្យបណ្ដឹងនោះទេគឺបានតាមរកជនសង្ស័យគ្រប់កន្លែង ។ លុះជាង២ខែក្រោយមក ទើបប្រទះឃើញជនសង្ស័យក៏ចាប់ឃាត់ខ្លួនប្រគល់ឱ្យនគរបាលដើម្បីធ្វើការសាកសួរ និងកសាងសំណុំរឿងចាត់ការតាមច្បាប់តែម្ដង។
ហេតុការណ៍ខាងលើនេះបានកើតឡើងតាំងពីវេលាម៉ោង៩និង៣០នាទីព្រឹកថ្ងៃទី២៤ ខែតុលា ឆ្នាំ២០១៨ នៅចំណុចផ្សារមុខបែក ស្ថិតនៅក្នុងភូមិបែកចាន ឃុំបែកចាន ស្រុកអង្គស្នួល ខេត្តកណ្តាល។ លុះដល់វេលាម៉ោង១១និង៤០នាទីយប់ថ្ងៃទី៣០ ខែធ្នូ ឆ្នាំ២០១៨ ទើបជនរងគ្រោះឃាត់ខ្លួនជនសង្ស័យខាងលើនោះនាំយកទៅប្រគល់ជូននគរបាលដើម្បីចាត់ការតាមច្បាប់។
បុរសរងគ្រោះឈ្មោះជា សុវណ្ណ អាយុ២៦ឆ្នាំ មុខរបរទិញនិងលក់អេតចាយ ស្នាក់នៅក្នុងភូមិទ្រា សង្កាត់ ស្ទឹងមានជ័យ ខណ្ឌមានជ័យ រាជធានីភ្នំពេញ។ រីឯលុយដែលបាត់បង់មានចំនួន៩០០ដុល្លារ ។
ចំណែកជនសង្ស័យឈ្មោះ ជា សុខគា ភេទប្រុស អាយុ២៦ឆ្នាំ មុខរបរមិនពិត ស្នាក់នៅក្នុងភូមិព្រែកប្រា សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ។
ប្រភពពីនគរបាលបានឲ្យដឹងថា ជនសង្ស័យបានប្រើល្បិចខ្ពស់ក្នុងការឆបោកយកលុយពីជនរងគ្រោះរហូតដល់ជនរងគ្រោះជឿជាក់ដោយគ្មានការសង្ស័យថាត្រូវជននោះបោកសូម្បីតែបន្តិចឡើយ។
នៅមុនពេលកើតហេតុ បុរសជាអ្នកអ្នកទិញនិងលក់អេតចាយ និងជនសង្ស័យខាងលើបានជួបគ្នានៅក្នុងភូមិសាស្ត្រសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ពេលនោះជនសង្ស័យបានប្រើល្បិចបោកដោយនិយាយប្រាប់ជនរងគ្រោះថា «ខ្លួនមានដែកអេតចាយដែលម៉ៅពីរោងចក្រនៅម្ដុំផ្សារបែកចានបានច្រើនណាស់និងត្រូវការលក់»។
ប្រភពដដែលបានបន្តទៀតថា ពេលឮបែបនេះ បុរសរងគ្រោះបានចចារសុំទិញដែកពីជនសង្ស័យនោះ ហើយក្រោយពីនិយាយត្រូវរ៉ូវគ្នា ជនរងគ្រោះក៏បានហៅរថយន្ត១គ្រឿងទៅដឹកដែកអេតចាយនោះ លុះពេលទៅដល់មុខផ្សារបែកចាន ជនសង្ស័យខាងលើបានឲ្យរថយន្តឈប់ រួចបានទារលុយពីជនរងគ្រោះចំនួន៩០០ដុល្លារមុន ដោយជនសង្ស័យបាននិយាយថា «ខ្ញុំចូលផ្សារដើម្បីទិញអីវ៉ាន់បន្តិចសិន» ហើយជនសង្ស័យប្រាប់ឲ្យជនរងគ្រោះរង់ចាំនៅមុខផ្សារនោះសិន បន្ទាប់មកជនសង្ស័យក៏បានរត់គេចខ្លួនបាត់ស្រមោលតែម្តង។
ប្រភពខាងលើបានបន្តទៀតថា ក្រោយពីចាំបាត់ៗមិនឃើញជនជនសង្ស័យត្រឡប់មកវិញ ទើបបុរសជាអ្នកអ្នកទិញ-លក់អេតចាយដឹងថាចាញ់បោកជនសង្ស័យនេះ និងតាមរកគ្រប់ទីកន្លែងទាំងចិត្តមួរម៉ៅក្ដៅក្រហាយបំផុត ប៉ុន្តែរកជនសង្ស័យខាងលើនោះមិនឃើញឡើយ ហើយក៏នៅតែព្យាយាមតាមរកជនសង្ស័យរហូត លុះរយៈពេលជាង២ខែក្រោយមក គឺនៅវេលាម៉ោង១១និង៤០នាទីយប់ថ្ងៃទី៣០ ខែធ្នូ ឆ្នាំ២០១៨ ទើបជនរងគ្រោះប្រទះឃើញជនសង្ស័យក៏ឃាត់ខ្លួននាំយកទៅប្រគល់ជូននគរបាលដើម្បីសាកសួរនិងកសាងសំណុំរឿងចាត់ការតាមច្បាប់។
នៅចំពោះមុខសមត្ថកិច្ច សង្ស័យខាងលើបានសារភាពថា ខ្លួនពិតជាបានធ្វើសកម្មភាពឆបោកយកលុយពីបុរស រងគ្រោះនោះប្រាកដមែន ដោយខ្លួនបានកុហកថា «មានដែកអេតចាយច្រើន ដែលខ្លួនម៉ៅបានពីរោងចក្រ»។ បន្ទាប់មកឆ្លៀតឱកាសដែលជនរងគ្រោះជឿទុកចិត្តហើយនោះ ទើបខ្លួនបោកយកលុយ និងរត់គេចខ្លួនតែម្ដង៕
ចែករំលែកព័តមាននេះ