ខេត្តបាត់ដំបង ៖ យុវជនម្នាក់បានត្រូវសមត្ថកិច្ចឃាត់ខ្លួន កាលពីព្រឹកថ្ងៃទី២៩ ខែធ្នូ ក្រោយពីមានបណ្ដឹងចោទប្រកាន់ថា បានរួមភេទជាមួយក្មេងស្រីម្នាក់ ដែលទើបមានអាយុ១៤ឆ្នាំកាលពីមួយសប្ដាហ៍មុន នៅក្នុងខ្ទមចាំចម្ការមួយកន្លែង ស្ថិតក្នុងឃុំកន្ទឺ២ ស្រុកបានណន់ ។
មន្ត្រីនគរបាលស្រុកបាណន់បានឲ្យដឹងថា យុវជនដែលត្រូវបានឃាត់ខ្លួនក្នុងរឿងស្នេហានេះឈ្មោះ ឆយ រី អាយុ២១ឆ្នាំ រស់នៅក្នុង ឃុំស្នឹង ស្រុកបាណន់ដែរ ។ ហេតុការណ៍នេះ បានកើតឡើងកាលពីយប់ថ្ងៃទី២២ ខែធ្នូកន្លងទៅ ប៉ុន្តែជីដូនរបស់ក្មេងស្រីបានទៅប្ដឹងឲ្យសមត្ថកិច្ចជួយអន្តរាគមន៍នៅថ្ងៃទី២៥ ខែធ្នូ បន្ទាប់ពីបាត់ចៅស្រីមួយយប់ និងបែកធ្លាយអំពីរឿងអាស្រូវផ្លូវភេទ កាលពីយប់ថ្ងៃទី២២ ខែធ្នូនោះ ។
តាមការស្រង់សម្តីសមត្ថកិច្ចពីជីដូនរបស់ក្មេងស្រីបាននិយាយថា ចៅស្រីគាត់បានចេញពីផ្ទះបាត់មួយយប់មិនឃើញត្រឡប់មកវិញទេ ។ លុះនាងត្រឡប់មកផ្ទះវិញ គាត់សួរដេញដោលពីរឿងដើរដាច់យប់នេះ ទើបបែកធ្លាយពីរឿងអាស្រូវផ្លូវភេទនេះ ហើយគាត់ក៏សម្រេចប្ដឹងទៅសមត្ថកិច្ចឲ្យជួយអន្តរាគមន៍ ។
បើតាមចម្លើយរបស់ជនសង្ស័យឈ្មោះ ឆយ រី បន្ទាប់ពីត្រូវឃាត់ខ្លួនថា ខ្លួននិងក្មេងស្រីពិតជាបានរួមមេត្រីជាមួយគ្នានៅក្នុងខ្ទមចាំចម្ការរបស់អ្នកស្រុក កាលពីយប់ថ្ងៃទី២២ ខែធ្នូ មែន ។ ខ្លួននិងនាងមិនធ្លាប់ស្គាល់គ្នាទេ តែពេលនោះគឺជារឿងចៃដន្យបំផុត ។ នៅយប់នោះ ខ្លួនបានជិះម៉ូតូរួមគ្នា៤នាក់(ប្រុស២ ស្រី២) រាប់ទាំងនាងផង ដើម្បីទៅរាំធុងបាស់ ។ ប៉ុន្តែពេលទៅដល់ខ្ទមចម្ការនោះ ស្រាប់តែមិត្តខ្លួនប្រាប់ថា ម៉ូតូអស់សាំង ហើយទុកឲ្យខ្លួននិងនាង(ក្មេងស្រីរងគ្រោះ)ចាំនៅខ្ទមចម្ការនោះសិន រីឯមិត្តភក្ដិខ្លួននិងនារីម្នាក់ទៀត បានជិះម៉ូតូទៅកន្លែងរាំធុងបាស់បាត់ទៅ ។
អ្នកទោសស្នេហារូបនេះនិយាយទៀតថា ពេលនៅជាមួយគ្នាតែ២នាក់បែបនេះ ខ្លួននិងនាងក៏ចាប់ផ្ដើមរមួលសួតរហូតឈានដល់ការរួមមេត្រីដល់ត្រើយសុខសាន្ត តែជាការព្រមព្រៀង ។ លុះបន្តិចក្រោយមក ទើបមិត្តខ្លួនជិះម៉ូតូមករកខ្លួនវិញ ហើយនាំគ្នាដេកនៅក្នុងខ្ទមចម្ការនោះទាំងអស់គ្នា ដោយមិនបានត្រឡប់ទៅផ្ទះវិញទេនាយប់នោះ ។ ដោយឡែក ចំពោះចម្លើយក្មេងស្រីរងគ្រោះវិញ ហាក់មិនបានបដិសេធចំពោះការព្រមព្រៀងគ្នាឡើងឋានសួគ៌នេះទេ ។
ជុំវិញករណីនេះ សមត្ថកិច្ចនិយាយថា បើតាមស្ដាប់ចម្លើយរបស់គូស្នេហ៍ដូចផ្លេកបន្ទោរនេះ ពួកគេហាក់មានការព្រមព្រៀងគ្នាយ៉ាងផ្អែមល្ហែមមុនពេលឡើងឋានសួគ៌ ។ ប៉ុន្តែអ្វីដែលយុវជនរូបនេះត្រូវធ្លាក់នរក ពេលត្រឡប់ពីត្រេកត្រអាលនៅឋានលើវិញនោះ គឺដោយសារយុវជនរូបនេះ «រួមភេទជាមួយអនីតិជន» ដែលច្បាប់មិនអនុញ្ញាត ។ សមត្ថកិច្ចបញ្ជាក់ថា ជនសង្ស័យត្រូវបានកសាងសំណុំរឿងបញ្ជូនទៅសាលាដំបូងខេត្ត ៕
ចែករំលែកព័តមាននេះ