រាជធានីភ្នំពេញ ៖ ជនសង្ស័យ២នាក់បានធ្វើសកម្មភាពឆក់កាបូបពីស្ត្រីជាអ្នកដំណើរម្នាក់បានសម្រេច ហើយជិះម៉ូតូគេចខ្លួនបាត់អស់ ។ ហេតុការណ៍ខាងលើបង្កការភ្ញាក់ផ្អើលកាលពីវេលាម៉ោង៨និង៤៥នាទីយប់ ថ្ងៃទី២៩ ខែធ្នូ ឆ្នាំ២០១៨ នៅលើផ្លូវជាតិលេខ៤…
រាជធានីភ្នំពេញ ៖ ជនសង្ស័យ២នាក់បានធ្វើសកម្មភាពឆក់កាបូបពីស្ត្រីជាអ្នកដំណើរម្នាក់បានសម្រេច ហើយជិះម៉ូតូគេចខ្លួនបាត់អស់ ។
ហេតុការណ៍ខាងលើបង្កការភ្ញាក់ផ្អើលកាលពីវេលាម៉ោង៨និង៤៥នាទីយប់ ថ្ងៃទី២៩ ខែធ្នូ ឆ្នាំ២០១៨ នៅលើផ្លូវជាតិលេខ៤ មុខប៉ុស្តិ៍ប៉ូលិស សាលាសង្កាត់ចោមចៅ៣ ខណ្ឌពោធិសែនជ័យ ។
តាមសម្តីជនរងគ្រោះជាម្ចាស់កាបូប ឈ្មោះ វណ្ណ ស្រីលក្ខ ភេទស្រី អាយុ៣៤ឆ្នាំ មុខរបរ អាជីវករ ស្នាក់នៅភូមិជម្ពូវ័ន សង្កាត់ចោមចៅ៣ បានឲ្យដឹងថា មុនកើតហេតុ ពួកគាត់មាន៣នាក់ជិះម៉ូតូមួយគ្រឿងម៉ាកស្មាស់វី (ក្នុងនោះមានប្តី ប្រពន្ធ និងប្អូនថ្លៃស្រី ) ធ្វើដំណើរចេញពីផ្ទះជួលស្ថិតក្នុងភូមិជម្ពូវ័ន គោលបំណងឌុបគ្នាទៅរកទិញនំបុ័ងដាក់សាច់ និងទឹកក្រឡុកនៅម្តុំរោងចក្រ QMI ។
ប្រភពដដែលបានបន្តថា ពេលទៅដល់ ម្តុំរោងចក្រ QMI មានភ្ញៀវច្រើន លុះចាំយូរពេក ពួកគាត់ក៏ឌុបគ្នាកាត់តាមក្នុងភូមិព្រៃព្រីងជើង ឡើងមកផ្លូវជាតិលេខ៤ គោលបំណងទៅរកទិញនំបុ័ងនៅ រង្វង់មូលថ្នល់បំបែកវិញ លុះពេលមកដល់មុខប៉ុស្តិ៍ប៉ូលិសខាងលើ រៀបនឹងជិះម៉ូតូ ឆ្លងផ្លូវទៅហើយ ស្រាប់តែមានជនសង្ស័យ២នាក់ ជិះម៉ូតូមួយគ្រឿង ម៉ាកស៊ុយហ្សុ៊យគីឡែត ពណ៌ សលាយខៀវ តាមពីក្រោយរួចក៏ធ្វើសកម្មភាពឆក់កាបូបរបស់គាត់បានសម្រេច ដែលនៅក្នុងកាបូបនោះមានលុយចំនួន១៤០ដុល្លារ លុយខ្មែរមួយចំនួន និងអត្តសញ្ញាប័ណមួយសន្លឹកផងដែរ ហើយជនសង្ស័យទាំង២នាក់នោះបានជិះម៉ូតូគេចខ្លួនបាត់ ។
ក្រោយកើតហេតុ ជនរងគ្រោះបានដើរឆ្លងផ្លូវចូលទៅដាក់ពាក្យបណ្តឹង ដើម្បីឲ្យប៉ូលិសជួយស្រាវជ្រាវ និងតាមចាប់ខ្លួនក្រុមជនសង្ស័យទាំង២នាក់ខាងលើនោះយកមកផ្តន្ទាទោសតាមច្បាប់៕
ចែករំលែកព័តមាននេះ