ខេត្តមណ្ឌលគិរី ៖ គោយន្តកែច្នៃចំនួន៥គ្រឿងត្រូវបានប្រជាពលរដ្ឋដែលជាអ្នករកស៊ីកាប់ឈើដឹកឈើបាននាំគ្នាចូលទៅរំដោះឆៅពីសមត្ថកិច្ចជំនាញវិញ ក្រោយការបង្ក្រាបបានរយៈពេលខ្លី ។ ហេតុការណ៍នេះបានកើតឡើងកាលពីវេលាម៉ោង១នឹង៣០នាទីអធ្រាត្រឈានចូលថ្ងៃទី២៦ ធ្នូ នៅចំណុចអូរផ្លាស់ ស្ថិតក្នុងភូមិរហូត ឃុំស្រែឈូក ស្រុកកែវសីមា ។
សេចក្តីរាយការណ៍បានឲ្យដឹងថា«គណៈកម្មការថ្នាក់ខេត្តប្រចាំនៅស្នាក់ការស្រែឈូក ដឹកនាំដោយលោក ឈាង ណាក់ ប្រធានក្រុម បានដឹកនាំកម្លាំងចុះចាប់់គោយន្តកែច្នៃដឹកឈើចំនួន៥គ្រឿងនៅចំណុចខាងលើនៅវេលាម៉ោង៨នឹង៣០នាទីយប់ថ្ងៃទី២៥ ធ្នូ ។ នៅយប់ថ្ងៃដដែលនោះវេលាម៉ោង១រំលងអធ្រាត្រឈានចូលថ្ងៃទូ២៦ ធ្នូ ក៏មានប្រជាពលរដ្ឋពី៣០ទៅ៤០គ្រួសារ បានមករំដោះយកមធ្យោបាយដឹកជញ្ជូននេះទៅវិញ ដោយកាប់ខ្សែទម្លាក់ឈើចោលនៅនឹងកន្លែង ហើយបើកគោយន្តកន្ត្រៃទទេយកទៅវិញបាត់ដោយសុវត្ថិភាព ។
វត្ថុតាងដែលកម្លាំងគណៈកម្មការចាប់ឃាត់នឹងរឹបអូសបានមាន ឈើចំនួន១៩ដុំ ជាប្រភេទឈើកកោះ និងសុក្រំ ដែលមានប្រវែងចាប់ពី៣ទៅ៤ម៉ែត្រ ចំនួន១៩ដុំ ស្មើនឹង១៩៦ដើមមូល ដែលគេឡាំងជា៤ជ្រុង ។
នេះមិនមែនជាលើកដំបូងនោះទេដែលក្រុមអ្នកភូមិសំរុកទៅយកមធ្យោបាយដឹកជញ្ជូនឈើពីកន្លែងសមត្ថ កិច្ចមកវិញ ។
ក្រុមអ្នកភូមិតំបន់ខ្ពង់រាបដែលជាតំបន់សំបូរព្រៃឈើកំពុងធ្លាក់ខ្លួនជាទាសកររបស់ក្រុមឈ្មួញឈើទៅហើយ មិនឃើញឈ្មួញឈើណារងគ្រោះទេ ។ ឃើញឈ្មួញឈើបានសុខគ្រប់គ្នាក៏ក្លាយជារឿងកាប់ដឹកខ្លួនឯងវិញ ។ នាពេលនេះ អ្នកភូមិតែងតែលើកគ្នាចូលលួចកាត់ឈើនៅក្នុងព្រៃ ដើម្បីលក់ឱ្យពួកឈ្មួញខ្មែរដែលប្រមូលទិញដឹកយកទៅឱ្យឈ្មួញវៀតណាម ។
ប៉ុន្តែដោយសារតែមិនចេះប្រើល្បិចរត់ការ មិនចេះហ៊ានចំណាយប្រាក់ ក្នុងបំណងស៊ីដាច់ ទើបត្រូវបានសមត្ថកិច្ចលេងធ្ងន់ដៃ ចាប់ប្រមូលយកទាំងអស់ ដើម្បីថ្ងៃក្រោយឱ្យចេះរាង…ឱ្យចេះគិតឃើញម្ចាស់ស្រុកផង…ហេ ! ហេ!
ចែករំលែកព័តមាននេះ