រាជធានីភ្នំពេញ ៖ បុរសម្នាក់បើករថយន្តស៊េរីទំនើបមួយគ្រឿងក្នុងស្ថានភាពស្រវឹងជោគជាំបានរេចង្កូតឆ្លងទៅផ្លូវម្ខាងទៀតបុកម៉ូតូមួយគ្រឿងទៀតរងរបួសបែកមុខបែកមាត់ កាលពីវេលាម៉ោង១០និង២០នាទីយប់ថ្ងៃទី៣០ ខែធ្នូ ឆ្នាំ២០១៨ ត្រង់ចំណុចខាងជើងស្ថានីយប្រេងឥន្ធនប្រមាណ១០០ម៉ែត្រ តាមបណ្ដោយផ្លូវ១០០៣ ស្ថិតក្នុងសង្កាត់ភ្នំពេញថ្មី ខណ្ឌសែនសុខ…
រាជធានីភ្នំពេញ ៖ បុរសម្នាក់បើករថយន្តស៊េរីទំនើបមួយគ្រឿងក្នុងស្ថានភាពស្រវឹងជោគជាំបានរេចង្កូតឆ្លងទៅផ្លូវម្ខាងទៀតបុកម៉ូតូមួយគ្រឿងទៀតរងរបួសបែកមុខបែកមាត់ កាលពីវេលាម៉ោង១០និង២០នាទីយប់ថ្ងៃទី៣០ ខែធ្នូ ឆ្នាំ២០១៨ ត្រង់ចំណុចខាងជើងស្ថានីយប្រេងឥន្ធនប្រមាណ១០០ម៉ែត្រ តាមបណ្ដោយផ្លូវ១០០៣ ស្ថិតក្នុងសង្កាត់ភ្នំពេញថ្មី ខណ្ឌសែនសុខ ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញបុរសម្នាក់ជិះម៉ូតូមួយគ្រឿងម៉ាក ហុងដាស្កុបភី ពណ៌ស ពាក់ស្លាកលេខ ភ្នំពេញ1BN-4333 ធ្វើដំណើរតាមបណ្តោយផ្លូវ១០០៣ ក្នុងទិសដៅពីជើងទៅត្បូង និងក្នុងល្បឿនលឿន ។ លុះមកដល់ចំណុចកើតហេតុ ស្រាប់តែមានរថយន្តស៊េរីមួយគ្រឿងទៀតម៉ាកឡិចស៊ីស LX570 ពណ៌ស្ករ ពាក់ស្លាកលេខភ្នំពេញ 2Z-6869 បើកបរដោយបុរសម្នាក់ក្នុងស្ថានភាពស្រវឹងជោគជាំ ក្នុងទិសដៅបញ្ច្រាសទិសគ្នាក៏បានរេចង្កូតទៅឆ្វេងឆ្លងទៅម្ខាងទៀតនៃផ្លូវបង្កឲ្យជ្រុលទៅបុកម៉ូតូចំពីមុខពេញទំហឹង បណ្ដាលឲ្យម៉ូតូរងការខូចខាតផ្នែកខាងមុខទាំងស្រុង ។
ចំណែកឯអ្នកបើកបរម៉ូតូបានខ្ទាតចេញពីម៉ូតូរងរបួសបែកមុខបែកមាត់ ដោយឡែករថយន្តបង្ករងការខូចខាតក្រពឹតកាងខាងមុខបន្តិចបន្តួច ។
ក្រោយពេលកើតហេតុដោយភាគីខាងរថយន្តបង្កដឹងពីកំហុសខ្លួនក៏ព្រមសម្របសម្រួលដោះស្រាយគ្នាជាមួយភាគីខាងម៉ូតូ ដើម្បីបញ្ចប់រឿង ប៉ុន្តែដោះស្រាយគ្នាមិនត្រូវក៏ប្រគល់ទៅឲ្យសមត្ថកិច្ចជំនាញធ្វើការវាស់វែងយករថយន្ត និងម៉ូតូទៅរក្សាទុកនៅអធិការដ្ឋាននគរបាលខណ្ឌសែនសុខ ដើម្បីរង់ចាំធ្វើការដោះស្រាយគ្នាទៅតាមផ្លូវច្បាប់នៅពេលក្រោយ ៕
ចែករំលែកព័តមាននេះ